حکومەتا هەرێمێ دڤێت چ بێژیتە تورکیا
![](https://xwakurk.com/wp-content/uploads/2017/09/5-9.jpg)
هۆزان عەبدولا
دگەل گەرمبوونا بابەتێ کرنا رێفراندومێ د رۆژەڤا سیاسی یا هەرێمێ دا، وەلاتێن دەوروبەر و بەغدا دژاتییا خوە بۆ وێ پرسێ رادگەهاند، لێ سەرەرای هەموو گەفان سەرکرداتیا کوردی ودگەل مللەتی بریاردا رێفراندوم بهێتە کرن، پشتی سەرکەفتنا وێ پروسەیێ ژی هەلویستێ چەندین وەلاتان هاتیە گهورین، تورکیا ئێک ژ وان وەلاتانە کو پتریا بەرژەوەندیێن ئابوری دگەل هەرێمێ دا هەنە، تا وی رادەی گەر بریارا سزادانا ئابوری ل سەر هەرێمێ سەپاند دەرەنجام دێ بەروڤاژی خواستا وێ بن.
حکومەتا هەرێما کوردستانێ، ل ڤان سالێن داویێ شیایە پەیوەندیێن ئابوری و سیاسی دگەل وەلاتێ تورکیا بگەهینیتە ئاستەکێ هەرە بلند، حکومەتا هەرێمێ ب گرێدانا گرێبەستێن ئابوری یێن دوم درێژ، بۆ تورکیا ژ مێژە سەلماندیە کو چ دەمەکی هەرێم نابیتە گەف بو تورکیا، ئەنقەرە ژی ژ مێژە تێگەهشتیە کو بەرژەوەندا وێ یا ئابوری دگەل هەرێمێ یە نەک ئیراقێ، د رۆژا پرۆسەیا رێفراندومێ دا سەرۆک وەزیرێن هەرێما کوردستانێ، نێچێرڤان بارزانی د گوتارەکێ دا ئاماژە دا پەیوەندیێن هەرێما کوردستانێ دگەل وەلاتێ تورکیا، سەرۆکوەزیران دوپاتی ل بەردەوام بوونا وان پەیوەندیان کر و راگەهاند: ب چ رەنگا رێفراندوم نابیتە گەف ل سەر ئاسایشا نەتەوەیی یا تورکیا و مە زەحمەت بریە تا ئەم شییاین ڤان پەیوەندیان بگەهینیە ڤی ئاستی، ئەم دێ هەر مینین جیرانێن باش دگەل وی وەلاتی بێی کو دەستی بۆ کاروبارێن ناڤخوە یا وی وەلاتی درێژ بکەین.
د ڤێ پەیاما سەرۆکێ حکومەتا هەرێما کوردستانێ دا دیار بوو، کو تورکیا باش دزانیت د کاودانێن نها رۆژهەلاتا ناڤەراست تێدا دەرباز دبیت و هەبوونا گەفا رێکخراوا تیروری یا داعشێ ل دەڤەرێ، خراب بوونا پەیوەندیێن تورکیا دگەل چەندین وەلاتان ب تایبەت روسیا و ئەلمانیا ، د نها دا هەرێمێ باشترین دوستە بو وێ، و بۆ پارستنا بەرژەوەندیێن ئابوری یێن وەلاتێ خوە مەجبوورە پەیوەندیێن خوە و هەرێمێ تێکنەدەت.
ئیراق و هەرێما کوردستانێ ب پلەیا دووێ، پشتی ئەلمانیا دهێن بۆ داخلبوونا بەرهەمێن تورکی، د نها ژی دا پەیوەندیێن ئەلمانیا و تورکیا د خرابترین ئاستێ دۆپلۆماسی دانە، دیسان دگەل ئیراقێ تا رادەیەکی د باش نینن، د ڤی دەمی دا تورکیا، ب تنێ هەرێما کوردستانێ دمینیت هەم ژ لایێ ئابوری و هەم ژ لایێ دۆپلوماسی پەیوەندیێن خوە دگەل دا ب پارێزێت دا کو مەترسی نەکەڤیتە سەر ئاسایشا ناڤخوە یا وی وەلاتی.
د وێ پەیاما سەرۆکوەزیران دا بیرا مە ل گرێبەستەکا پێنجی سالی د وارێ نەفتێ دا ، دیسان یا بیست و پێنج سالی ژی د وارێ گازا سروشتی دا دگەل تورکیا دا دئینیت، کو ئەڤە ئەگەرەکێ سەرەکی یە تورکیا نەشێت چ پێنگاڤەکێ ل دژی هەرێمێ بهاڤێژیت.
رەوشا ناڤخوە یا تورکیا و نەمانا پیڤاژوویا ئاشتیێ، بەردەوامبوونا شەری ل دژی پەکەکێ و گرتنا لایەنگرێن فەتحولا گویلەنی ژی ئەگەرن، بۆ نە سەپاندنا سزایێن ئابوری ل سەر هەرێمێ.
ل داوی یا گرنگە بزانین، هەبوونا وان رێکەفتنێن حکومەتا هەرێما کوردستانێ دگەل تورکیا د وارێن نەفت و گازێ دا ئیمزا کرین بووینە ئەگەرێ سەرەکی تورکیا نەشێت گەفێن ئابوری و سەربازی ل دژی هەرێمێ بکەت، گرێبەستا روزنەفت ژی تا رادەیەکێ زوور د بەرژەوەندا تورکیا دا و دگەل هەرێمێ و روسیا دێ بنە ژێدەرێن سەرەکی بۆ دابینکرنا بەشەکێ زوور ژ گازا سروشتی بۆ یەورۆپا.