ئازاد جندیانی: سەبرێكی شۆڕشگێڕانەمان گەرەكە
ئازاد جندیانی، سیاسەتمەداری كوردستان، داوا لە خەڵكی كوردستان دەكات، نەكەونە ژێر باری بێئومێدییەوە و لەوە دڵنیابن كە هاوشێوەی سەد ساڵی ڕابردوو، سەرەڕای شكستەكان، كورد دەتوانێت هەڵسێتەوە, هەروەها دەڵێت:” سەبرێكی شۆڕشگێڕانە” مان گەركە.
ئازاد جندیانی، سیاسەتمەدار، لە وتارێكیدا بە ناوی (ئێستا چیتر؟) نووسیویەتی، ئاماژەی بەوە داوە، رەنگە بەردەوام بوون لەسەر نووسین لە ھەلومەرجێكی وەك ئێستادا كە ھێشتا شۆكی رووداوەكان و خەمی شەھیدەكانمان بەری نەداوین و ھێشتا تەمتومانی ڕووداوەكان نەڕەویوەتەوە، كارێكی ئاسان نەبێ.
ئەوەشی دووپات كردووەتەوە كە جارێكی دیكە بە دەنگی بەرز دەیڵێتەوە، ئێستا و لە ئایندەشدا كار و تێكۆشانی بۆ سەربەخۆیی كوردستان بەردەوام و بگرە گەرم و گوڕتر دەكات. بۆیە داوای لە هاوڕێ نووسەرەكانی كرد، بۆ بەرگریكردن لە سەربەخۆیی كوردستان، لە نووسین و لێكدانەوە و توێژینەوە و ھاندان و ورەدانەوە بەو ملیۆنانەی دەنگیان بە سەربەخۆیی دا بەردەوام بن، چونكە ”ئێستا دەقاتی دوێنێ، جەوھەری بەرگریكردن لە نەتەوە بەرگریكردنە لەسەربەخۆیی“.
جندیانی دان بەوەدان دەنێت كە دەیزانێ لە بەرامبەر ئەو بۆچوونەدا، دەنگی پێچەوانە لەناوخۆی كوردستاندا لەدژی بەرز دەبێتەوە، ”بەتایبەت لەلایەن ئەو نووسەر و سیاسییانەی كە تەنیا مەبەستییانە ئەم دۆخە تازە خەمناكە و دەرھاوێشتەكانی تەنیا بۆ ئەوە تەوزیف بكەن كە ئەوان راست و ئێمە ھەڵەبووین“.
جندیانی دەڵێت: ”پابەندبوونی من و سەدان ھەزاری وەك من بە سەربەخۆیی كوردستان مەسەلەیەكی رۆمانسی نییە و لەززەت بردن نییە لە خەونێك كە رەنگە ئێستا زۆربەی خەڵكی كوردستان لێرە و لە پارچەكانی تریشدا بێ ئومێدییەكە وای لێكردبن كە پێیان وابێ ئیتر تا سەد ساڵی تریش سەربەخۆیی كوردستان دواكەوت“. بۆیە ئەوەی وەبیر هێناوەتەوە كە لە 100 ساڵی ڕابردوودا، كورد دەیان شۆڕش و ڕاپەڕینی كردووە و زۆربەی جارەكانیش بە قەتڵ و عامی سەركردە و رێبەر و تێكۆشەرەكانی كۆتایی ھاتووە و داگیركەران چی پێیان كراوە بۆ سڕینەوەی ناسنامەی نەتەوەیی و لە پەل و پۆخستنی نەتەوەی كورد، لەھیچ تاوانێك نەك ھەر دەستیان نەپاراستووە، بەڵكو لێشی نەسڵەمیونەتەوە، بەڵام لەبەرامبەردا كورد نەوەیەكی تر یان ھەمان نەوە كە شكستی كەمەر شكێنیشی بینبوو، ھەڵدەسایەوە و دەستی بە تێكۆشان دەكردەوە. بەھیچ لێكدانەوەیەك نە لای خۆمان و نە لای مێژوونووس و لێكۆڵەرەوە بیانییەكانی بواری مێژوو و سیاسەت، ئەو ھەمیشە ھەڵسانەوەی كوردیان بە گێلی و نەزانی نەداوەتە قەڵەم، بەڵكو وەك نیشانەی زیندوویی نەتەوەی كورد ناودێریان كردووە. وەك جندیانی دەڵێت: ”لەڕاستیشدا ئەم ھەڵسانەوانە لێرە و لە پارچەكانی تری كوردستان شكستی بەھەموو ھەوڵ و سیاسەت و پیلانەكانی داگیركەران ھێناوە لەوەی كە بتوانن كورد دەستەمۆ و زەلیل بكەن و وەك كۆیلەی ئەبەدی بیھێڵنەوە. ئەمە خەسڵەتێكی نەتەوەی كوردە كە نەوەی ئێستا و ئایندە و رابردووش دەبێ شانازی پێوە بكا، ھەر ئەم خەسڵەت و دیاردەیە وای كردووە كە داگیركەران بەردەوام تووشی شكست و بێ ئومێدی بكا، لەوەی كە كۆتایی بە كورد و مەسەلەكەی بێنن“.
ئەو سیاسەتمەدارە كوردە نووسیویەتی: ”ئەمجارەش كۆبوونەوەی چوار وڵاتە داگیركەرەكە پێكەوە لەدژی كورد، ئەوەی سەلماندەوە كە ئەوان ھێشتاش گیرۆدەی مۆتەكەی كوردن كە لە ماوەیەكی كورتی داھاتوودا دەرھاوێشتەكانی و كاریگەرییەكانی بەسەریانەوە بەڕوونی دەردەكەون و دڵنیاشم لەوەی كە زۆر ناخایەنێ، خۆشییەكانی ئێستایان چۆن و چۆنی لێ دەكەوێتەوە، ئەو مۆتەكەیە لەسەرجێی خەوتنی سەركردەكانیشیان بەرۆكیان بەرنادات“.
دووپاتیشی كردووەتەوە: ”چۆن نەوەكانی سەد ساڵی رابردووی نەتەوەكەمان، تەسلیم نەبوون، دەبێ ئێمەش وابین، ئەم دۆخە نالەبارەی ئێستا و خەمگینییەكانی نەمانترسێنێ و وەك باوك و باپیرانمان دەبێ تێھەڵچینەوە كە بێگومان ھەلومەرجی تێھەڵچوونەوەی ئێمە لەچاو ھی نەوەكانی پێش خۆمان زۆر لەبارترە“.
لە كۆتاییشدا نووسیویەتی: ”ئێستا ئاماژە رووكەش و دەستبەجێكان ئەوەمان نیشان دەدەن، كە جارێكی تریش ویستی سەربەخۆیی نەتەوەكەمان بەپیلانێكی ناوچەیی و بە پشتیوانیێكی نێودەوڵەتی پڕ لەشەرمەزاری بۆیان و ھێندێ بەدحاڵییانی نێوخۆمان زیندەبەچاڵ كرابێ، بەڵام با پەلە نەكەین و ببینین كاتێ ئێمەش لە شۆكی پیلانەكە دەربازمان بووە، دەبینین لەم ناوچەیەدا كە لەبەردەم دەیان كێشە و گێچەڵ بەیەك كردن و دوژمنایەتیی نێوان چوار ووڵاتەكە لەناوخۆیان و لەنێوان وڵاتانی تری زلھێزیش لێرە، لەم ناوچەیەدا چۆن بەرژەوەندییەكانیان بە توندی و زۆر بەتوندی بەریەك دەكەون و كورد گوتەنی، دان و ماشیان ھەرگیز پێكەوە ناكوڵێ، ھەموو خوێندنەوەكانیش ئەوەمان پێ دەڵێن كە بۆ بینینی ئەو ڕووداوانە سەبری ئەیوبمان پێویست نییە، بەڵكو تەنیا (سەبرێكی شۆڕشگێڕانە)مان گەرەكە“.
