هەمواركردنەوەی دەستوور عێراق بەرەو هەڵدێر دەبات

دوای ئەوەی حەشدی شەعبی و سوپای پاسداران بە ڕێ روونی گروپێكی خیانەتكاری نێو یەكێتی كەركووكیان داگیركرد, لە ئێستادا پرۆسەی تەعریبكردن لەم شارەدا دەستی پێكردووە, تەنانەت رێگە نەدرا بەرێوەبەری پۆلیسی ئەم شارە بە كوردی قسەبكات, لە ئێستاشدا هەولێك هەیە بۆ هەموار كردنەوەی چەند ماددەیەكی دەستوری هەمیشەی عێراق.
ئەگەرچی (عەرەفات كەرەم)، سەرۆكی فراكسیۆنی پارتی دیموكراتی كوردستان لە پەرلەمانی بەغدا، پێی وایە كە بە هۆی دۆخی ئێستای عێراق و كۆسپەكانی بەردەم پەرلەمانتارانی كورد و عەرەبی سوننە، “زەحمەت”ـە، دەستوور تا كۆتاییی تەمەنی ئەم پەرلەمانەش هەموار بكرێتەوە. بەڵام بۆ ئەم مەبەستە لێژنەیەك پێكهیچنراوە.
هەروەها سەرۆكی فراكسیۆنی پارتی دەلێت:” لە سەرەتای ئەم خولەدا، سەرۆكایەتیی پەرلەمان لیژنەیەكی تایبەتی پێك هێنا بە مەبەستی هەمواركردنەوەی چەند خاڵێكی دەستووری، بەڵام وەك پەرلەمانتاران ئاشكرای دەكەن، تا ئێستا ئەو لیژنەیە تەنانەت یەك كۆبوونەوەشی نەكردووە”.
هەروەها (عەرەفات كەرەم) دۆخی ناو عێراق بە شێوەیەك دەبینێت، كە پێی وایه، زەحمەتە لە ناوەڕاستی ساڵی داهاتوودا، تەنانەت هەڵبژاردنی پەرلەمانیی عێراق بەڕێوە بچێت دەشڵێت: ”سوننە ئاوارە بووە، كوردیش دیارە چی لێ بەسەرهاتووە و تەنانەت ناوماڵی شیعەش كێشەی زۆری تێدایە، بۆیە زەحمەتە هەڵبژاردن بكرێت. ئەو لیژنە پەرلەمانییەی بۆ هەمواركردنەوەی دەستوور دیاری كراوە، تەنانەت یەك كۆبوونەوەشی نەكردووە. هەمواركردنەوەی دەستووریش بە مەرجێك دەبێت، كە بە هیچ شێوەیەك دەستكاریی خاڵە جەوهەرییەكان نەكرێت، بۆ نموونە سیستەمی فیدراڵیی عێراق.”

سەرۆكی فراكسیۆنی پارتی دیموكراتی كوردستان لە پەرلەمانی بەغدا، پێی وایە ئێستا زۆرینەی سیاسی ”گەورەترین كێشه”‌یە بۆ سەر عێراق و جەخت دەكاتەوە كە ”ئەگەر زۆرینەی سیاسی دەستكاریی خاڵە جەوهەرییەكانی دەستوور بكات، ئەوا عێراق بەرەو هەڵدێر دەچێت و تووشی تەنگژەی گەورەتر دەبێت.”

یەك لەو خاڵانەی كە لیژنە تایبەتەكەی پەرلەمان بە نیازە هەمواری بكاتەوە، پێوەندی بە هەڵبژاردنە پەرلەمانییەكانەوە هەیە و بەو پێیه،‌ كە ئەگەری بەڕێوەچوونی ئەو هەڵبژاردنە زەحمەتە، پێویستە تەمەنی پەرلەمان درێژ بكرێتەوە و ئەمەش بێگومان پێویستی بەوە هەیه،‌ كە خەڵك لە پرۆسەی ڕیفراندۆمدا، دەنگ بەو گۆڕانكارییە دەستوورییە بدات. هەر بۆیە (عەرەفات كەرەم) بە زەحمەتی دەزانێت، هەمواری هیچ ماددەیەكی دەستووری بكرێت، چونكە لە دۆخی ئێستای عێراقدا، بەڕێوەچوونی پرۆسەی ڕیفراندۆم، ”كارێكی زەحمەته.”

كورد لە كاتێكدا باس لە زۆرینەی سیاسی دەكات، كە ئێستا بەشێكی زۆری پەرلەمانتارە كوردەكان لە كۆبوونەوەكانی پەرلەمانی بەغدادا بەشدار نین‌ و چاوەڕێی دەرەنجامی كۆبوونەوەكانی نێوان حكوومەتەكانی بەغدا و هەولێرن.

(عەرەفات كەرەم) ئاشكرای دەكات، كە بۆ گەڕانەوەی ئەندامانی فراكسیۆنی پارتی بۆ كۆبوونەوەكانی پەرلەمانی بەغدا، چاوەڕێی ئاساییكردنەوەی بارودۆخەكەن لە نێوان بەغدا و هەولێردا.

دوای بەڕێوەچوونی پرۆسەی ڕیفراندۆمی سەربەخۆییی كوردستان، هەوڵێكی زۆر لە پەرلەمانی بەغدا لە ئارادا بوو بۆ ئەوەی پارێزبەندی لە چەند پەرلەمانتارێكی كورد بسێندرێتەوە. هەوڵەكە زیاتر له لایەن پەرلەمانتارانی حزبی دەعوەوە دەدرا.

(عەرەفات كەرەم) دەڵێت: ”بە پێی دەستوور و یاسا، دەربڕینی بۆچوون كارێكی ئاسایی و دیموكراسیانەیە، بۆیە پەرلەمانتارە كوردەكان هیچ تاوانێكی گەورەیان نەكردووە، تا پارێزبەندییان لێ بسێندرێتەوە، ئەمە تەنیا شەڕێكی دەروونییە كە لەگەڵ كورددا دەكرێت.”