ڕاپۆرتێك.. ئەمریكا سەرەتا لە عێراقەوە دەست بە ڕووبەڕووبوونەوەی ئێران دەكات
لەگەڵ ئەوەی لە ئێستادا ئاستی دەست تێوەردانەكانی ئێران لە كارووباری ناوخۆیی وڵاتانی ناوچەكە و رۆژهەڵاتی ناوەڕاست بە گشتی زیادی كردووە, تا ئێستا ئەمریكا جگە لە لێدوان دژ بە هەنگاوەكانی ئێران هیچ هەنگاوێكی نەهاویشتووە بۆ رێگری كردن لە دەستدرێژیەكانی ئێران, ئەگەرچی سەرۆكی ئەمریكا ستراتیژی نوێی خۆی راگەیاند بۆ رووبەروونەوەی ئێران, بەڵام تادێت هەیمەنەی ئێران بەسەر ناوچەكەدا زیاد دەبێت.
ڕۆژنامەی “جمهووریەت”ی لوبنانی، بڵاوی كردەوە، كە واشنتۆن نەیویستووە لە كێشەی دەست لەكاركێشانەوەی سەعد حەریری، لە سەرۆكایەتی حكوومەتی لوبنان، ڕۆڵی هەبێت، بۆ ئەوەی دەرگایەكی تر بۆ ڕووبەڕووبوونەوەی لەگەڵ ئێران نەكاتەوە، بۆیە بۆ ئەو مەبەستە (پاریس)ی ڕاسپارد دۆخی لوبنان بگەڕێنێتەوە بۆ چوار مانگ پێشتر، بەو مەرجەی سعوودیە بەشێوەیەك دەرنەكەوێت كە بەرامبەر حزبوڵای لوبنانی، دۆڕاوە.
بەپێی سەرچاوەكانی ڕۆژنامەكە، قەیرانی حەریری بەرەو كۆتایی دەچیت و هیچ گۆڕانكارییەكی جەوهەری لەسەر ڕۆڵی “حزبوڵا” ڕوو نادات، نە لە لوبنان و نە لە دەرەوە، چونكە وادەی كردنەوەی دەرگای ئەو “جەنگە” یان ئەو “ڕووبەڕووبوونەوە سیاسییە” لەگەڵ ئێران و لەڕێگەی “حزبوڵا”وە، خواستی نێودەوڵەتی لەسەر نەبووە، ئەوەش بەچەند هۆیەك:
هۆكاری سەرەكی ئەوەیە، وەك سەرچاوەیەك بۆ ڕۆژنامەكە ئاشكرای كردووە، ماوەی دوو مانگ دەبێت، واشنتۆن بە هاوپەیمانە عەرەبەكانی ڕاگەیاندووە، لە ڕووبەڕووبوونەوەیدا لەگەڵ ئێران و ڕاگرتنی فراوانبوونی هەژموونی، لە قۆناغی سەرەتاییدا لە ناو عێراقەوە دەستی پێدەكات.
بیانووەكەشی گەڕاندووەتەوە بۆ ئەوەی، كە لە عێراقدا، قورسایی ئێران لە هەموو ناوچە عەرەبییەكانی تر زیاترە، بۆیە پێشینە دەداتە ئەوەی، بەهەموو هەوڵێكی ئەمریكا و عەرەب، هەژموونی ئێران لە عێراق بشكێنن.
بەڵام لە سووریا، واشنتۆن ماوەی زیاتر بە گرەوی خۆی دەداتە دەست مۆسكۆ بۆ ئەوەی هەژموونی ئێران ڕابگرێت، ئەگەر ڕووسیا ئەو كارە نەكات، ئەوكات بۆ گەیشتن بەو ئامانجە، بەدوای جێگرەوەدا دەگەڕێت.
بەپێی ڕۆژنامەكە، واشنتۆن لەهەوڵدایە بۆ دروستكردنی دۆخێك لە عێراق، بە ئامانجی ئەوەی هێزی سەربازی خۆی لە وڵاتەكەدا زیاتر بكات، بە پێچەوانەی سووریا كە پەنتاگۆن بەنیازە ژمارەیەكی دیاریكراوی لەو وڵاتەدا بێت.
