ئەنجوومەنی رۆحانیی کوردانی ئێزدی:كه‌رامه‌تی یه‌كێتی و گۆڕان و كۆمه‌ڵ له‌سه‌ر شنگال ده‌شكێنن
راوێژکاری ئەنجوومەنی رۆحانیی کوردانی ئێزدی، ئەو دەنگۆیانەی لەم بانگەشەی هەڵبژاردنەدا دەکرێن و پارتی پێ تۆمەتبار دەکرێ، ڕەت دەکاتەوە و ڕایدەگەیێنێ، پاش رووداوەکانی ١٦ی ئۆکتۆبەر، کوردانی ئێزدی بۆ بڕیاردان لە دۆخی شنگال سەرپشک کران و “خۆمان بڕیارمان دا نەک پارتی.”
کەریم سلێمان، راوێژکاری ئەنجوومەنی رۆحانیی کوردانی ئێزدی، جەخت دەکاتەوە، ئەو خیانەتەی لە رۆژی ١٦ی ئۆکتۆبەر کرا، “خیانەتێکی گەورە بوو. بەوھۆیەوە زیانی زۆری گەیاندە خەباتی رزگاریخوازی کورد.”
ڕاوێژکاری ئەنجوومەنی ڕۆحانیی کوردانی ئێزدی بۆ ماڵپەڕی فەرمیی پارتی دیموکراتی کوردستانی دەشڵێ، لە کاتێکی زۆر ھەستیاردا ئەو خیانەتە کرا و “لە کاتێکدا خیانەت کرا، ئێمە ریفڕاندۆمی سەربەخۆییمان ئەنجام دابوو، بەو ھیوایە بووین بگەینە ئەنجامێکی زیاتر لە مافەکانمان لە کوردستانی باشووردا.”
کەریم سلێمان لەبارەی دەنگۆ ناڕەواکانەوە، کاتێک باسی خیانەتی ١٦ی ئۆکتۆبەر دەکرێت لە کەرکووک و ناوچەکانی دیکەی کوردستان، دووپاتی دەکاتەوە “ھەرکەسێک پەنجەی تۆمەت بۆ پارتی درێژ بکات لەبارەی چۆڵکردنی شنگال و دەشتی نەینەوا، بەتایبەت شنگال، ناهەقییە دەیکات. چونکە ڕاستییەکەی ئەوەیە کە ھێزی پێشمەرگەی سەر بە فەرماندەییی شنگال لەو ناوچەیە بوون کە ھەموویان کوردی ئێزدین، ئەوان واتە پێشمەرگە ئێزدییەکان بە رەزامەندیی خۆیان ئەو کارەیان کرد و رێگەیان بە ھاتنی ھێزە عێراقییەکان دا بێنە نێو شنگالەوە. هەڵبەت تا ئێستایش بەشێک لەو پێشمەرگانەی ئێزدی سەربە فەرماندەییی شنگال لە قەزای شنگال ماونەتەوە، هەروەها ھێزی شنگالیش ھەیە تایبەت بە کوردانی ئێزدی کە لە ناوچەی سحێلا جێگیر کراون.”
راوێژکاری ئەنجوومەنی رۆحانیی کوردانی ئێزدی هەروەها دەڵێ “من ئەو راستییە بۆ خەڵکی کوردستان روون دەکەمەوە. لە رووداوەکانی ١٦ی ئۆکتۆبەر پارتی دیموکراتی کوردستان و سەرۆک بارزانی ھێزەکانی کوردانی ئێزدییان سەرپشک کرد لەوەی چ بڕیارێک لەبارەی ناوچەی خۆیانەوە دەدەن. بەو ھێزانەی کوردانی ئێزدی راگەیێندرا، ئەگەر دەتانەوێ شەڕ بکەن ئەوە ئازادن، ئەگەریش دەرفەت دەدەن بە ھاتنی ھێزە عێراقییەکان خۆتان بڕیار بدەن و لە دەستی خۆتانە.”
دەربارەی ئەو هێزەشی کە بە ناوی هێزە چەکدارەکانی عێراقەوە ڕووەو شنگال دەهاتن، کەریم سلێمان زانیاریی دەدات “ئەو ھێزەی سەرەتا لە مووسڵەوە ھات بۆ شنگال بە ناوی حەشدی شنگال بوو، ھەموویشیان کوردی ئێزدی بوون، لەبەر ئەوەش کە کوردی ئێزدی بوون، فەرماندەیی شنگال بڕیاری دا شەڕی براکوژی نەکرێت، چونکە ئێمە خۆمان تازە کارەساتێکمان بەسەردا ھاتبوو کە ئەویش ھێرشی تیرۆریستانی داعش بوو، نەمانەویست جارێکی دیکە لە ناوچەکەماندا خوێن بڕژێتەوە و خەڵکی دیکە ببنەوە بە قوربانی، وەکچۆن داعش بەسەری هێناین، لەبەر ئەوەبوو کە ڕێ درا ھێزەکانی عێراق بێنە نێو شنگالەوە.”
لە بۆنەگەلی جیا و لەسەر زاری فەرماندەکانی پێشمەرگەی کوردستان و چەندان بەرپرسی پارتییەوە ئەوە ڕاگەیێندراوە کە، چونکە هێشتا برینی برینی قووڵی برایانی ئێزدی، بە هۆی هێرشی ڕێکخراوە تیرۆیستەکەی داعشەوە ساڕێژ نەبووە، بڕیاری شەڕکردن یان پاشەکشەی پێشمەرگە بدرێتە دەست کوردانی ئێزدی خۆیانەوە، کەریم سلێمان لەوبارەوە ڕوونکردنەوەی زیاتری دا و گوتی “وەک وەڵامێک بۆ ئەو حزب و ھێزانەی پارتی بە تۆمەتبار دەزانن، لێرەوە رایدەگەیەنم، فەریق بابەکر زێباری لەسەر زاری سەرۆک بارزانی ئەو پەیامەی گەیاندە بەرپرسانی کوردی ئێزدی، لەوەی کە (ئێوە ئازاد بن خۆتان بڕیاری خۆتان بدەن)، لەبەر ئەوەش بە ھیچ شێوەیەک پارتی بەرپرس نییە لەو بابەتەدا، چونکە پارتی زۆر بە ئاشکرا ئێزدییەکانی سەرپشک کردووە و خۆیان بڕیاریان دا نەک پارتی.”
١٦ی ئۆکتۆبەری ٢٠١٧، ئەو ڕۆژە بوو کە کەرکووک و خورماتوو و ناوچەکانی دیکە، کەوتنە ژێر حوکمی پۆستاڵی میلیشیاکانی حەشدی شەعبی و هێزەکانی عێراقەوە.لە سەروبەندی ئەم خیانەتەدا کە نزیکەی نیوەی خاکی باشووری کوردستان ڕادەستی نەیایارانی کورد کرا، کۆسرەت ڕەسووڵ عەلی، جێگری یەکەمی سکرتێری گشتیی یەکێتیی نیشتمانیی کوردستان و شێخ جەعفەر، فەرماندەی یەکەی ٧٠ی هێزی پێشمەرگەی یەکێتی و د. نەجمەددین کەریم پارێزگاری کەرکووک کە هاوکات ئەندامی مەکتەبی سیاسیی یەکێتییشە، ئەوەیان ئاشکرا کرد کە گرووپێکی نابەرپرسی نێوخۆی یەکێتی، بە ڕێککەوتن لەگەڵ ناحەزانی کورد، ناوچەکەیان بەم دەردە برد.
