عه‌بدوڵڵا كوێخا موباره‌ك: چۆن دەبێت نەشێروان و گۆڕان بۆ خەلکی و سەروەت و سامانەکەشی بۆ کوڕەکانی نەوشیروان بێت
دوای ئەوەی کوڕەکانی نەوشیروان مستەفا تەواوی سەروەت و سامانی بزووتنەوەی گۆڕانیان بە مولکی خۆیانیان ناوبرد وەک مولکی باوکیان، عه‌بدوڵڵا كوێخا موباره‌ك هه‌ڵسوڕاوی بزووتنه‌وه‌ی گۆڕان ڕەخنە لە بنەماڵەی نەوشیروان مستەفا دەگرێ و رایدەگەیەنێ كە نابێ نەوشیروان مستەفا و بزووتنەوەکەی موڵکی گۆڕانخوازان بن، كەچی کۆمپانیا و سەروەت و سامانەكەی تەنھا میراتی خێزانەكەی بن.
عه‌بدوڵڵا كوێخا موباره‌ك لە هەژماری خۆیدا لە (فەیسبووك) بابەتێكی ڕەخنەئامێزی بەناوی (کاک نەوشیروان بچوک مەکەنەوە) نووسیوە و تێیدا دەڵێ “ئایا کاک نەوشیروان کۆمپانیای وشەی دروست کرد بۆ بازرگانی و پارە کۆکردنەوە؟ ئایا دەکرێت خۆ بەکوشتدان، خۆ خستنە مەترسیەوە، کاری خۆبەشی بەپارەی گیرفانی خۆت، لەپێناو سەرخستن و پاراستنی ڕێباز و بەرنامەی کاک نەوشیروان ئەرکی ھەموو گۆڕانخوازان بێت؟ چونکە کاک نەوشیروان و بزوتنەوەکەی موڵکی ھەموو گۆڕانخوازانن، بەڵام کۆمپانیا و سەروەت و سامانی تەنھا میراتی خێزانێکی چەند کەسی بێت و نابێت باسی بکرێ و نابێ بخرێتە خزمەتی بزوتنەوەکەی خۆیەوە؟”.
هەروەها پرسیویەتی “ئایا کاک نەوشیروان ھەلی بۆ گەنج ڕەخساند بۆ ئەوەی بەرگری لە مافی خەڵک و خزمەت بکەن؟ یان بۆ پیلانگێڕی و ملشکاندنی یەکتری و وەدەرنانی ھاوڕێکانی خۆی و بچوککردنەوەی گۆڕان لەپێناو پۆست و پێگەی بەرزتر بۆ خۆیان؟”.
دواتر ئاماژەی بۆ منداڵەكانی نەوشیروان مستەفا ڕێكخەری گشتیی كۆچكردووی بزوتنەوەكە كردووە و دەڵێ “کوڕ و کچی کاک نەوشیروان مافی خۆیانە و شایستەی ئەوەیان تێدایە بۆ ھەر پلە و پۆستێکی حکومی، پەرلەمانی، حزبی بەڕێکخەری گشتیشەوە خۆیان ھەڵبژێرن و بەپێی بەرپرسیاریەتیان تەداخولی ھەر کارێک بکەن کە لێی بەرپرسن، نەک لە دەرەوەی بەرپرسیاریەتییەوە بڕیار بدەن، با کۆمپانیای وشە بەناوی ئەوانەوە بێت و ئەوان لە ھەموو کەس ئەمینترن، با خەرجی تەواویان بە دە قاتی خەرجی خێزانێکی ئاسایی بێت، بەڵام باقی داھاتی کۆمپانیای وشە و ھەر سەرچاوەیەکی دارایی گۆڕان کە ھەیەتی، لەلایەن لیژنەیەک سەرپەرشتی بکرێت کە جڤاتی نیشتیمانی ھەڵیبژاردبێ و ئەو لیژنەیە ئاگاداری ھەموو داھاتی گۆڕان بێت”.
عه‌بدوڵڵا كوێخا موباره‌ك لە كۆتاییدا نووسیویەتی كە ئەگەر لەپێناو دەسەڵات و پارە کۆکردنەوەدا، کاک نەوشیروان بچوک بکرێتەوە بەوەی خێزانێکی چەند کەسی خاوەن و میراتگری ئەون، ئەوا خەبات و ڕێباز و مێژووی کاک نەوشیروان بچوک دەبێتەوە و بزوتنەوەکەش دەبێتە هێزێکی لاوازی بێ کاریگەر.
ماوەیەكە دەنگی ناڕەزایی لە ئۆرگانەكانی بزوتنەوەی گۆڕان و بنكەی جەماوەری بەرز بووەتەوە بەرانبەر دەسەڵاتی رەهای بنەماڵەی نەوشیروان مستەفا و پەیوەندیی ناڕوونیان لەگەڵ بنەماڵی تاڵەبانی لەبارەی بابەتی پارە و دەسەڵاتەكانی بزوتنەوەكەوە.
پێش چەند رۆژێكیش ژمارەیەكی بەرچاو لە سەركردە و هەڵسوڕاوانی بزوتنەوەی گۆڕان داوای سنووردانانیان بۆ دەستێوەردانەكانی كوڕەكانی نەوشیروان مستەفا لە كاروباری بزوتنەوەی گۆڕان كرد و رایانگەیاند ئەگەر ئەمە نەكرێ، واز لە بزوتنەوەكە دێنن.
به‌پێى سه‌رچاوه‌یه‌كى نزیك له سەركردایەتی بزوتنه‌وه‌ى گۆران، ماوه‌یه‌كه له‌ناو بزوتنه‌وه‌ى گۆڕاندا و له ئاستى ئه‌ندامانى جفاتى گشتى و نیشتمانى و به‌رپرسى ژووره‌كاندا، ئاماده‌كارى ده‌كرێ بۆ پێشكه‌شكردنى چه‌ند داواكارییه‌ك به‌خانه‌ى ڕاپه‌ڕاندن و رێكخه‌رى گشتى.
ئه‌و به‌رپرسانه‌ى گۆڕان كە به‌شێكیان په‌رله‌مانتارەكانی گۆڕانن، لەلایەن هه‌ریه‌ك له قادرى حاجى عه‌لى و عوسمانى حاجى مه‌حمودەوە سه‌رپه‌رشتی ده‌كرێن و داواكانیان له دوو خاڵى سه‌ره‌كى پێك هاتووه، سنووردانان بۆ كوڕەكانی نەوشیروان مستەفا و ڕزگاركردنی گۆڕان لە پەیوەندییە گوماناوییەكانی نێوان كوڕەكان نەوشیروان مستەفا و بنەماڵەی تاڵەبانی
