مه‌لا به‌ختیار : كۆبونه‌وه‌كانی سه‌ركردایه‌تی و مه‌كته‌بی سیاسی هیچ شه‌رعییه‌تێكی نییه‌و به‌شداری ناكه‌م

مەلا بەختیار، لێپرسراوی ده‌سته‌ی كارگێڕی مەكتەبی سیاسی یەكێتی نیشتمانی كوردستان و به‌ بۆنه‌ی ساڵیادی خیانه‌تی ۱٦ـی ئۆكتۆبه‌ر په‌یامێكی له‌ ژێر ناونیشانی ( ۱٦ی ئۆكتۆبەر رۆژە شومەكەی كوردستان) بڵاو كرده‌وه‌و ده‌ڵێت :” بەبۆنەی تێپەڕبونی ساڵێك بەسەر روداوەكانی ۱٦ی ئۆكتۆبەر (رۆژە شومەكەی كوردستان) هەمان ئەو پەیام و وتارەم بڵاودەكەمەوە كە دوو رۆژ دوای ۱۶ی ئۆكتۆبەر لە ۱۸/۱۰/۲۰۱۷ بڵاومكردەوە. من ئێستاش هەمان ئەو بۆچونانەم هەیە كە ئەوكات نوسیومن، بەڵام بەرژەوەندپەرست و هەڵپەرستەكان بۆچوونی خۆیان گۆڕی”.

لێپرسراوی ده‌سته‌ی كارگێڕی مەكتەبی سیاسی یەكێتی ده‌ڵێت :” بەش بەحاڵی خۆم، چاوەڕێ‌ دەكەم پەرلەمانی كوردستان، یان هەر كۆمیتەیەكی شارەزای بێلایەن، هەڵسەنگاندێكی قوڵی هەمەلایەنە، بەبەڵگەوە، لەسەر كۆی روداوەكان بكات، بە روداوی كارەساتباری كەركوكیشەوە، لەسەر هەركەس‌و گروپ‌و لایەنێك، هەر تاوانێك سەلمێندرا، ئەوكاتە دەبێ‌ دادگا توندترین سزایان بدات. لەناو یەكێتیشدا، بەهەمان شێوە، هەڵسەنگاندن لەسەر هۆكارە راستەقینەكانی كێشەو روداوەكانی ناو یەكێتی، بكرێ‌. هەتا سەرئەنجامی هەڵسەنگاندن، بەبەڵگەی تەواوەوە، روداوە كارەساتبارەكان، ساغنەكاتەوە، پێشوەخت، تومەت دابەشكردن لەراگەیاندن‌و لەچاوپێكەوتنەكاندا، كارێكی ناشایستەیە”.

له‌ باره‌ی ڕیفراندۆمی سه‌ربه‌خۆی كوردستان مه‌لا به‌ختیار له‌ یه‌یامه‌كه‌یدا نوسیویه‌تی و ده‌ڵێت :” من، بەردەوام لەكۆبونەوەی دووقۆڵی یەكێتی‌و پارتی‌و سێقۆڵی لەگەڵ پارتی‌و یەكگرتوشدا، هەروەها لەكۆبونەوەی لیژنەی باڵای ریفراندۆمیشدا، سور بووم لەسەرئەوەی بەدیلی ریفراندۆم قبوڵ بكەین‌و لەگەڵ ئەمریكا، بەریتانیا، دەوڵەتانی ئیقلیمی، ئەنجومەنی ئاسایشی نێودەوڵەتی‌و حكومەتی عێراق، گفتوگۆیەكی بەرپرسانە بكەین. بەڵام لەناو رای گشتی گەلەكەشماندا، دڵی یەك هاوڵاتی كوردستانیشم، لە داكۆكی بۆ مافە دیموكراسیەكان، ساردنەكردۆتەوە. چەند هەڵەو چەندیش لەو سیاسەتە راست بوبین”.

لێپرسراوی ده‌سته‌ی كارگێڕی مەكتەبی سیاسی یەكێتی له‌ په‌یامه‌كه‌یدا خه‌ڵكی كوردستان ئاگادار ده‌كاته‌وه‌ له‌ مه‌ترسی دوو ئیداره‌یی و كێشە چارەسەرنەكراوەكانی یه‌كێتی كه‌ گه‌یشتووه‌ته‌ بنبه‌ست و جیابونه‌وه‌ی گه‌وره‌تری لێ چاوه‌ڕوان ده‌كرێت ، مه‌لا به‌ختیار ده‌ڵێت :” یه‌كه‌م .مەترسییەكی گەورە لەسەر باشورو هەرێمی كوردستان هەیە، كە ببێتە دوو ئیدارەیی‌و دوو ئیدارەییش، لێكەوتەی شەڕی ناوخۆو دەستێوەردانی ئیقلیمی‌و نێودەوڵەتی نەخوازراوی لێ چاوەڕوان دەكرێ‌”.

له‌ خاڵی دووه‌م دا مه‌لا به‌ختیار له‌ باره‌ی كێشه‌ ناوخۆییه‌كانی یه‌كێتی وه‌ نوسیویه‌تی :” یەكێتی، سەرەنجامی كێشە چارەسەرنەكراوەكانی دوای نەخۆشكەوتنی مام جەلال (پێشتریش) گیروگرفتەكانی نزیك كەوتونەتەوە لە بنبەست‌و مەترسی جیابونەوەیەكی گەورە، هەڕەشە لەیەكێتی دەكات. هەلپەرست‌و هەرزە ئەقڵەكانی ناو یەكێتی‌و فەیسبوكبازەكانیش كە هەر خەریكی شێواندنی زهنیەتی خەڵكن، وەكو پێشینان وتویانە: “دز بازاڕی شێواوی هەیە”.. ئەمانەش، لەناو هەموو رەوت‌و جەمسەرەكاندا، زۆر نابەرپرسیارانە، لەرابوردودا بەگشتی‌و لە دوو مانگی رابوردودا بەتایبەتی، دەستیان هەیە، لەم دۆخەی یەكێتی تێیكەوتووە. كە بەداخەوە بەشێك لەئامانجە گڵاوەكانیان هێناوەتەدی!”.

ده‌شڵێت :” دوو ئیدارەیی‌و جیابونەوەی ناو یەكێتی، یان جیابونەوەی ناو یەكێتی‌و دوو ئیدارەیی، لەم هەلومەرجەی دوای كارەساتی كەركوك، پەیوەندییەكی توندوتۆڵیان بەیەكەوە هەیە”.

له‌باره‌ی دوو ئیداره‌یی و جیابونه‌وه‌ی باڵێكی تری ناو یه‌كێتی مه‌لا به‌ختیار ده‌لێت :” بەندە، رایدەگەیەنم، دژی جیابونەوەم لەناو یەكێتیداو دژی دوو ئیدارەییم. بەتوندی دژی ئەوەشم جگە لە چارەسەركردنی كێشەكانی ناو یەكێتی، هیچ رێگەیەكی تر بگیرێتەبەر. بۆیە پێدادەگرم لەسەرئەوەی ئۆرگانەكانی یەكێتی، تەواوی دەسەڵاتی حزبی‌و سیاسییان هەبێ‌. هیچ كەسێك‌و هیچ بنەماڵەیەك، بۆی نەبێ‌، لەباتی ئۆرگانە رەسمییەكانی یەكێتی، بڕیار بدات. یان كۆبونەوە لەگەڵ هیچ لایەكدا بكات”.

لێپرسراوی ده‌سته‌ی كارگێڕی مەكتەبی سیاسی یەكێتی چیتر بێده‌نگی ده‌شكێنێت ڕایده‌گه‌یه‌نێت :” چیكە، ناتوانم ئاژاوە لە ئاژاوەگێڕان قبوڵ بكەم. هەتا ئێستا لەبەرخاتری كەسوكاری شەهیدان‌و سەرۆك مام جەلال‌و پێشمەرگەو مێژووی یەكێتی خۆم بە نیمچەبەرپرسیار لەناو یەكێتی‌و لەویژدانی خۆمدا زانیووە، ئەوەی لەتواناشمدا بوبێ‌، هەوڵم داوە بۆ چارەسەر، بەڵام لەمەودوا ئەو نیمچە بەرپرسیارێتیەش كاریگەری نەماوە لەناو هاوكێشەكاندا، بۆیە پێشكەشی ئەوانەی دەكەم، لەناو هەموو جەمسەرەكاندا، هەڵپەیانە مەرام‌و نەخشەكانیان دوای مردنی سەرۆك مام جەلال بەدیبهێنن. تەنها بەیاننامەكان‌و چاوپێكەوتنی داهۆڵەكان بژمێردرێ‌، ئیتر ساغدەبێتەوە چ نەخشەیەكی شاردراوە، لەئارادایە. رەخنە تێكەڵ بە رق‌و رقیش پیلانی تۆڵەسەندنەوەی بۆ داڕێژراوە”.

مه‌لا به‌ختیار ده‌ڵێت:” جەماوەری گەلەكەمان هەرچی رەخنەو ناڕەزاییان هەیە بەرامبەرمان، هەقیانە. بەڵام هەلپەرست‌و بازرگان‌و ئاژاوەگێڕان، لەباتی ئەوەی دەست بە كڵاوی شكستەكانیان بگرن، نەكا رەشەبای توڕەیی خەڵك بیبات، كەچی هێشتا زمانیان پاراوەو پاساویان سازەو تەلەفزیۆنەكانیشیان داگیركردووە!”.

له‌باره‌ی په‌یوه‌ندییه‌كانی خۆی و یه‌كێتی لێپرسراوی ده‌سته‌ی كارگێڕی مەكتەبی سیاسی یەكێتی ده‌ڵێت:” لەكۆتاییشدا، جەخت دەكەمەوە، لەهیچ كۆبونەوەیەكدا بەشداری ناكەم، ئەگەر كۆبونەوەكە شەرعیی نەبێ‌‌و دوا دەسەڵاتی سیاسی‌و حزبی، نەگەڕێتەوە بۆ سەركردایەتی‌و مەكتەبی سیاسی یەكێتی. هەرگیز هەژمونگەری هیچ كەسێك‌و هیچ بنەماڵەیەك‌و هیچ دەستەگەرییەك، قابیلی قبوڵ نییە بۆم. چونكە كولتوری سیاسی یەكێتی وابووە. نەك ئەمەی دەگوزەرێ‌”.

له‌ كۆتایی په‌یامه‌كه‌یدا مه‌لا به‌ختیار لێپرسراوی ده‌سته‌ی كارگێڕی مەكتەبی سیاسی یەكێتی نوسیویه‌تی و ده‌ڵێت :” داوای لێبوردنیش دەكەم لەمكاتەدا، كە گەلەكەمان دوچاری باری نالەبار هاتووە، بەندە، ئەم پەیامە بڵاودەكەمەوە. بەدڵنیاییەوە، ئەگەر پەیامەكەم زۆر بەپێویست نەزانیبا، وەكو ساڵانی رابوردوو، خۆمم دەخواردەوەو ئەركەكانیشم رادەپەڕاند. بەڵام ئێستا، بەش بەحاڵی خۆم، ئیتر قسەنەكردن بە تاوان دەزانم، دیارە قسەی ئێجگار زۆرترم پێیە لەسەر روداوەكان‌و كێشەكان‌و دیاردە دزێوەكان، لەسەرانسەری كوردستاندا.. بەڵام نامەوێ‌ بە كارو كاردانەوە هیچ بڵێم، پێشینان گوتەنی: قسە لەكاتی خۆی‌و لەجێی خۆی. تەنها شانازیشم ئەوەیە كە هەركاتێك بێمە دەنگی تەواو، نە قەرزارباری حكومەتم‌و نە هیچ كەسێكی تر. منەتی هیچ لایەكیش نازانم بۆ ئەستۆپاكی. خۆم تەنها بەقەرزارباری كەسوكاری شەهیدان‌و پێشمەرگە غەدرلێكراوەكان دەزانم‌و بەس”.