لە تونس ڕۆژنامەنووسێک خۆی سوتاند خۆپیشاندان دەستی پێکردەوە
دوای ئەوەی هەشت ساڵ لەمەوبەر موحەمەد بو عەزیزی، دەسفرۆشێکی سەرشەقامی تونسی لە ساڵی 2010 لەبەر دۆخی ئابووری و ڕێگرتنی پۆلیس لە شوێنی کارەکەی، ئاگری لە جەستەی خۆی بەردا و بەمشێوەیە خۆپیشاندانەکانی بەهاری عەرەبی دەستیپێکرد
هەشت ساڵ پاش ئەم ڕووداوەش ڕۆژنامەنووس عەبدوڕزاق زەڕقی تونسێ 32ساڵە لەشاری قیسرین لە ڕۆژئاوای تونسیش ئاگری لە جەستەی خۆی بەردا و پاش ماوەیەک لە خۆ سووتاندنەکەی بەهۆی ڕێژەی زۆری سووتانەکەیەوە گیانی لەدەستدا.
پێشتر لە تۆڕە کۆمەڵایەتیی فەیسبووک هەوڵدانی خۆسووتاندنی خۆی ڕاگەیاندبوو کە ئەم هەنگاوی لەبەر دۆخی خراپی ئابووری و بێکاری لە وڵاتدا دەکات.
ئەم ڕۆژنامەنووسە پێشتر لە ڤیدیۆیەکدا ڕایگەیاندبو “من خۆم 20خوولەکیتر دەسووتێنم و بەتەنها دەست دەدەمە شۆڕشێک لە وڵاتەکەمدا.”
عەبدوڕەزاق لە پەیامی ڤیدیۆکەیدا لە دۆخی هەلومەرجی ئابووری و ژمارە زۆری بێکاران لە قیسرین ڕەخنەی گرتبوو و حکومەتی تونسی بەوە تاوانبار کردبوو کە هەر خۆپیشاندان و دژایەتییەک بەناوی تیرۆرەوە سەرکووت دەکات.
چەند کاتژمێرێک پاش لە خۆسووتاندنی زەڕقی دەیان نەفەر ڕژانە سەرشەقامەکان و بەداخستنی شەقامەکان دژی حکوومەت خۆپیشاندانیان کرد و پۆلیسی ئەم وڵاتەش هەوڵی کۆنتڕۆڵردنی خۆپیشاندانەکان دەدات.
وەزارەتی ناوخۆی تونسیش دەڵێت، کە چەند پۆلیسێک لەم خۆپیشاندانە بریندار بوون و چەندها خۆپیشاندەریش دەستگیر کراون. یەکێتی ڕۆژنامەنووسانی تونسیش داوای خۆپیشاندانی سەرانسەری بەهۆی کۆچی دوایی عەبدوڕەزاق زەڕقیەوە دەکات.
یەکێتی ڕۆژنامەنووسانی تونس هەروەها حکومەت بەوە تاوانبار دەکات کە لە ئاست گەندەڵی دارایی کەمتەرخەمە و ئەمەش هۆکاری خۆسووتاندنی ئەم ڕۆژنامەوانەی هاوڕێیان بووە.
شاری قیسرین لە270کێلۆمەتری تونسدایە و ئەمشارە کۆی دانیشتوانی 100هەزارنەفەرەو لە ساڵانی 2010و 2011ەش یەکێک لە شارانە بووە کە هەمیشە خۆپیشاندانی دژی دەسەڵاتدارێتی وڵات تیادا کراوە و لە ماوەی ئەم ساڵانەی کۆتاشدا لەمشارە خۆپیشاندانی جۆراوجۆر، دژی هەلومەرجی خراپی ئابووری تیادا ئەنجامدراوە.
