حەمە رەشید هەرەس: لە نەخۆشخانەی منداڵانی سلێمانی منداڵی لە دایك بووی عەرەب زیاترە لە هی كورد, كوردستان لە ژێر تەعریبدایە تەنها بە سەربەخۆی رێگری لە تەعریب دەكرێت

لەگەڵ زیاد بوونی تەعریب لە ناوچە كوردستانیە داگیركراوەكان و سوتاندنی گەنم و جۆی هاوڵاتیان و بەردەوامی غەدر لە هاوڵاتیانی كوردستان, نووسەرێكی ناسراوی سلێمانی ڕای گەیاند، تا ئەو كاتەی كوردستان لە چنگی عێراقی عەرەبیدا بێت، پرۆسەی بە عەرەبكردنی كورد نابڕێتەوە. هۆشداریشی لە بارەی زیادبوونی عەرەب لە ناوخۆی هەرێمی كوردستان دا و ئاشكرای كرد كە ”لە نەخۆشخانەی منداڵبوونی سلێمانی، منداڵی عەرەب لە كورد زیاتر لە دایك دەبێت“.
حەمە ڕەشید ھەرەس، نووسەر و چاودێری سیاسی ڕاگەیاند: “ھەتا كوردستان لە قورگی عێراقێكی عەرەبی چڵێس دا بێت، تەعریب نابڕێتەوە بگرە تا بێت ئەم ھێرشی تەعریبە زیاتر شاڵاو دەھێنێت، ئەگەر فریای خۆمان نەكەوین بە ئاسانی لە ناو نەتەوەی عەرەبدا ئاوەكی دەبین وەكو ئاردی ناو دڕك خۆمان پێ نادۆزرێتەوە”.
ڕوونیشی كردەوە، تەعریب وەك مێژوو دەیسەلمێنێت دیاردەیەكی ھەنووكەیی نییە، بەھۆی نیشتەجێكردنی چەند ھۆزێكی عەرەبەوە، ناوچەیەكی زۆری كوردستانیان كرد بە عەرەب، بەتایبەتیش لە مووسڵ و كەركووك، بە ئێستاشەوە ھەر خەریكی ھێنانی عەرەبن بۆ ئەو ناوچانە.
ئەوەشی خستە ڕوو، كورد لەناو عێراقی عەرەبیدا مەحاڵە و بگرە پەلەقاژەیەكی بێھوودەیە، ئەگەر بیەوێت شاڵاوی بە عەرەبكردنی كوردستان بوەستێنێت، ئەوەتا لە دەرگاوە دەریان دەكەیت، لە پەنجەرەوە خۆیان دەكەنەوە بە ژوور دا، ئیتر ئەوە عەرەبە و لە شوێنێك دایكوتا، ئیتر بە فشار نەبێت، ناڕوات، ”ئەوەش من نیم تەنھا وا دەڵێم، بەڵكوو مێژووی ھەموو ئەو دەوڵەتانەیە بە ناوی ئیسلامەوە داگیر كران و ئێستا وڵاتی عرووبەن، ئا ئەمەیە مشتەی ناو ھەمانەكە“.
بە بڕوانی حەمە ڕەشید هەرەس: ”پەرلەمانتارانی كورد لە بەغدا، ئەگەر عێراقی و پیاوی عەرەبیش نەبن، ئەوا لەوێ كەمینەن و ھیچیان پێناكرێت، ئاخر ئەم دیموكراتییەی بە فشە جاڕی بۆ دەدەن و عێراقی بە گشتی داڕزاندووە، ئەبێت كوردستان لەناو ئەمانەدا چ ئاسوودەییەكی دەست بكەوێت“.
بۆیە بە ڕاشكاوی جەختی لەوە كردەوە ”ژمارەیەكی بەرچاوی پەرلەمانتارانی كوردستان، ئەوەی بۆی نەسووتێن، كورد و كوردستانە، ئەوەتا بە چاوی خۆمان بینیمان چەند پەرلەمانتارێكی كورد بوونە لێبووكی (موھەریج)ی دیوەخانی مالیكی و عەبادی و فەتلاوی و پاشكۆی گرووپە تائیفییەكانی عێراقی عەرەبی، بۆ لایەنگیری عەرەب لێدوانیان دەدا و دوژمنایەتییان بۆ ئەو خاك و نیشتمانە دەردەبڕی كە بە دەنگی خەڵكە بەشمەینەتەكەی چوونە ئەو جێگایە، بۆیە دەسەڵاتی كوردی لەو كاتەوەی ھەڵسوكەوت لەگەڵ عەرەب دەكات، ناوی لێناون رژێم، ھەزار جارمان گوت، ئەوانە ڕژێم نین، ئەوانە عەرەبن و كلتووری داگیر كردن پیادە دەكەن، بۆیە چارەسەری كورد بۆ ئاسوودە بوون و رزگار بوونی لە دەست عەرەب، رێگا زۆرن و لە ژمارە نایەن، ھەر ھەموو رێگاكانیش دەگەنەوە یەك ئامانج، ئەویش جیابوونەوە، سەربەخۆیی، ئازادییە“.
محەمەد ڕەشید ھەرەس، باسی لەوەش كرد، بەم ڕەوشەی ئێستای كوردستانەوە، نەك كەركووك و گەرمیان، تەنانەت سلێمانی، ھەولێر، دھۆك و ھەموو كوردستان مەترسیی توانەوەی لەناو عەرەبدا ھەیە، ”ژن و مێرد و خێزانی كورد، تا منداڵێكیان دەبێت، عەرەبەكەی دراوسێیان ڕەوەیەك دەخاتەوە، ئیستا لە سلێمانی لە خەستەخانەی منداڵبوون، بڕۆن سەیری ئامارەكان بكەن، بزانن چەند عەرەب منداڵیان دەبێت و چ رێژەیەكی ترسناكیان ھەیە؟ ھەروەھا ھەموو شارەكانی كوردستانیش، عێراقی عەرەبی بەو ھەموو شەڕ و كوشتارەوە، ھەشتاكان دە ملیۆن كەس بوون، كەچی ئێستا بوون بە چەند و كوردیش چەند بوون و بوون بە چەند؟ ئەمە بابەتێكی ئاسایی نییە و قسە فڕێدان و وڕێنە نییە، ئەمە كارەساتە كارەسات، بیرێكی زانستییانەی قووڵی لێ بكەنەوە، چارەسەر هەر سەربەخۆیی و دەوڵەتی كوردییە، ئێستا لە سبەینێ زووترە، نە پەرلەمانتاری كورد لە بەغدا ئەمە چارە دەكات، نە سەرۆك كۆمارێكی كوردی پڕۆتۆكۆلی، جا وەرە عێراقچیش بن“.