نێچیرڤانی بارزانی چه‌ند نهێنیه‌ك له‌سه‌ر عێراق ئاشكرا ده‌كات
خواكوڕك
سه‌رۆكی حكومه‌تی هه‌رێم رایده‌گه‌ینێت، “هەرێمی کوردستان لەدوای ساڵی 2004 بارودۆخی ئابووریمان گەشەی بەخۆیەوە بینیوە و ئەو گەشەکردنە ئابوورییە نائاسایی بوو، بەڵام شەڕی داعش، هاتنی نزیکەی ملیۆنێک و 800 هەزار ئاوارە و دابەزینی نرخی نەوت بوونەتە هۆکاری سەرەکی دروستبوونی قەیرانی دارایی لە هەرێمی کوردستان”.
ئەمڕۆ پێنج شەممە 15\12\2016، لە زانکۆی ئەمریکی – دهۆک، کۆنفرانسی (سەربەخۆیی کوردستان.. بەربەست و دەرفەت) بەڕێوە دەچێت، تیایدا چه‌ند كه‌سایه‌تی جیهانی به‌شداریان تێداكردووه.
نێچیرڤان بارزانی سه‌رۆكی حكومه‌تی هه‌رێم له‌میانی به‌شداری كردنی له كۆنفرانسه‌كه وتارێكی پێشكه‌ش كرد و رایگه‌یاند، “دوای ساڵی 2014 بودجەی هەرێمی کوردستان لەلایەن حکومەتی عێراق بڕدراوە، ئەوان بەبڕیاری تاکلایەنە ئەو بودجەیان بڕی، هەروەها زۆری ژمارەی فەرمانبەرانی هەرێمی کوردستان و پێشمەرگەش هۆکارێکی دیکەبوون بۆ ئەوەی ئەرکی حکومەت لەڕووی داراییەوە قورس بێت”.
هه‌روه‌ها ده‌ڵێت، “قه‌یرانی دارایی هه‌رێمی كوردستان زۆر قورسە، بەڵام ئەزموونێکی باشبوو و پشت بە خوا ئەو قەیرانە تێدەپەڕێنین و، کۆتاییدێت، هەروەها ئەمە دەرفەتێکە بۆ ئەوەی بەخۆماندا بچینەوە و هەڵەکانمان چاک بکەینەوە، دەبێت وا بیربکەینەوە کە ئێمە نە نەوتمان هەیە و نەغاز بۆ ئەوەی پشت بەداهاتی دیکە ببەستین”.
بارزانی ده‌شڵێت، “سەرەڕای ئەو قەیرانە ئابوورییەی لە هەرێمی کوردستاندا هەیە، بەڵام ناسەقامگیریی ناوچەکە بووەتە هۆی ئەوەی ژمارەیەکی زۆر خەڵکی ناوچەکانی عێراق و سووریا روو لە باشووری کوردستان بکەن و ساڵانە ملیارێک و 400 ملیۆن دۆلار لەو ئاوارە و پەنابەرانە خەرجدەکەین”.
له‌باره‌ی عێراقه‌وه سه‌رۆكی حكومه‌ت رایگه‌یاند، “ئێمە وەکو کورد هەموو هەوڵێکمان دا بۆ ئەوەی عێراق ببێتە عێراقێکی سەرکەتوو… سەرۆک بارزانی و سەرۆک تاڵەبانی ئەوەی کاری باش بوو بۆ عێراقیان کرد، ئێمە پێشمەرگەمان رەوانەکرد بۆ پاراستنی بەغدا، بەڵام ئەگەر سیستەمی فیدراڵی لە کۆمەڵگەیەکی دیموکراسیدا نەبێت، جێبەجێ ناکرێت و سەرناگرێت”.
هه‌روه‌ها راشیگه‌یاند، “”پێشمەرگە ئازایانە و قارەمانانە بەرگری لە کوردستان و هەموو جیهان دەکات، ئێمە وەکو کورد خۆمان یەکلاکردووەتەوە کە ئێمە هۆکارێکی سەرەکین بۆ بەرگریکردن لە مرۆڤایەتی لە جیهاندا”.
له‌كۆتاییدا بارزانی رایگه‌یاند، “سەربەخۆیی کوردستان مافێکی سرووشتی خۆمانە ، ئێمە لە ناوچەکەدا زمان و کولتوورمان جیاوازە، کاتێک ئێمە باسی سەربەخۆیی کوردستان دەکەین تەنها باسی کوردستانی عێراق دەکەین، ئێمەش بەو سەربەخۆییە نابینە کێشە بۆ عێراق، نامانەوێ ئەو کێشانە بۆ نەوەکانی دوای خۆمان جێبێڵین”.
