مه‌سرور بارزانی: هاوکاری خانه‌واده‌ی شه‌هیدانی شه‌ڕی دژ به داعش ده‌کات
سه‌رۆكی حكوومه‌تی هه‌رێمی كوردستان ڕه‌زامه‌ندیی نیشان داوه بۆ ئه‌وه‌ی سێ ملیار دینار خه‌رج بكرێت بۆ قه‌ره‌بووكردنه‌وه‌ی ئه‌و كه‌سوكاری پێشمه‌رگانه‌ی له شه‌ڕی داعش شه‌هید بوونه و تا ئێستا به‌هۆی قه‌یرانی داراییەوە قه‌ره‌بوو نه‌كراونه‌ته‌وه، بۆیه له‌مڕۆوه كه‌سوكاری شه‌هیدان ده‌توانن بچن پاره‌كه وه‌رگرن.
میران به‌كر، سكرتێری ڕۆژنامه‌وانیی وه‌زیری پێشمه‌رگه‌ی حكوومه‌تی هه‌رێمی كوردستان، بۆ ماڵپه‌ڕی فه‌رمیی پارتی راگه‌یاندووه: زیاتر له هه‌زار و900 شه‌هیدی پێشمه‌رگه‌ی شه‌ڕی داعش قه‌ربوو ده‌كرێنه‌وه، كه به‌شێكیان پێشتر به پێنج ملیۆن دینار قه‌ره‌بوو كراونه‌ته‌وه و به‌شێكیشیان به‌هۆی قه‌یرانی داراییەوە مابوو، کە قه‌ره‌بوو بكرێنه‌وه، بۆیه بڕیار دراوه ئه‌وانیش قه‌ره‌بوو بكرێنه‌وه.
میران به‌كر ئه‌وه‌شی راگه‌یاندووه: سه‌رۆكی حكوومه‌ت 3ملیار دیناری ته‌رخان كردووه و ڕه‌زامه‌ندیی له‌سه‌ر داوه بۆ ئه‌وه‌ی ئه‌و كه‌سوكاری شه‌هیدانەی ماون، ئه‌وانیش قه‌ره‌بوو بكرێنه‌وه، بۆیه له‌مڕۆوه ده‌توانن سه‌ردانی وه‌زاره‌تی پێشمه‌رگه بكه‌ن و چه‌كیان بۆ ده‌كرێت و پێنج ملیۆن دیناریان پێ ده‌درێت.
