وەزیری هەرێم لەپشكی یەكگرتوو: توركیا دژی سەربەخۆیی هەرێم نابێت
خواكوڕك
دوای بەرەو پێشڤەچوونی بەرچاوی پەیوەندیەكانی نێوان حكومەتی هەرێمی كوردستان‌و وڵاتی توركیا, لە ئێستادا پرسی سەربەخۆی كوردستان زیاتر باسی لێوە دەكرێت, وەزیرێكی حكومەتی هەرێمی كوردستان لە پشكی یەكگرتوو دەلێت:” توركیا دژی سەربەخۆیی هەرێم نابێت”
غازی سەعید وەزیری هەرێم لە حكومەتی هەرێمی كوردستان، كە هاوكات ئەندامی ئەنجوومەنی جێبەجێكاری یەكگرتووی ئیسلامی كوردستانیشە لە چاوپێكەوتنێكی لەگەڵ ئاژانسی ئانادۆلی توركی گوتوویەتی: “ئەوەندەی ئێمە مامەڵەمان لەگەڵ توركیا كردووە و سەرنجمان داوەتێ پارتی داد و گەشەپێدان(ئاك پارتی) تاكە حزبە كە بە گرنگییەوە لە دۆزی كوردی روانیوە، ئەگەر بەراوردی بكەین بە حكوومەتەكانی پێشووی توركیا ئاك پارتی سیاسەتێكی زۆر جیاوازی هەیە بەرامبەر بە هەرێمی كوردستان، ئەمەیش بووەتە جێگەی ئومێدی ئێمە”.
ئەو وەزیرەی حكومەتی هەرێم گوتیشی: “هەر كاتێك گەلی كورد بڕیاری سەربەخۆیی هەرێمی كوردستان بدات، گەشبینین بەوەی توركیا پاڵپشت و هاوكار دەبێت و دژی سەربەخۆیی هەرێمی كوردستان نابێت، لە سایەی ئاستی پەیوەندییەكانمان لەگەڵ توركیا و حكوومەتی ئێستای توركیا ئەو گەشبینییەمان بۆ دروست بووە”.
