پارتی چاکسازی تورکمانى : پێویستە پەکەکە رێز لە سەروەری قەوارەی هەرێمی کوردستان بگرێت و چیتر نەبێتە کێشە بۆ حکومەتی هەرێم و خەڵکەکەی
عه‌بدولقادر بازرگان، سه‌رۆكى پارتى چاكسازى توركمانى له هه‌رێمى كوردستان له‌په‌يامێكدا سه‌ركۆنه‌ى هێرشى ئه‌مرۆى چه‌كدارانى په‌كه‌كه بۆ سه‌ر هێزه‌كانى پێشمه‌رگه ده‌كات و ده‌لێ: پێویستە پەکەکە رێز لە سەروەری قەوارەی هەرێمی کوردستان بگرێت و چیتر نەبێتە کێشە بۆ حکومەتی هەرێم و خەڵکەکەی و نەبێتە هۆی تێکدانی پێکەوەژیانی ئاشتیانە و تەبایی سیاسی و یەکریزی لایەنەکان.
سه‌رۆكى پارتى چاكسازى توركمانى له هه‌رێمى كوردستان ده‌شلێ:پەکەکە دەبێت لەوە تێبگات کە هەرێمی کوردستان گۆڕەپانی سیاسی و سەربازی خۆی نیە و پێویستە کێشەکانی خۆی بباتە دەرەوەی ھەرێمی کوردستان و چیتر نەبێتە هەرەشە بۆسەر ھەرێمی کوردستان و خەڵکەکەی.
ده‌قى پەیامى پارتی چاکسازی تورکمانى.
هێرشی ئەمرۆی چەکدارانی پەکەکە بۆ سەر هێزەکانی پێشمەرگەی کوردستان بە توندی سەرکۆنە و شەرمەزار دەکەین، کە بەداخەوە بووە هۆی شەهیدبوونی (٥) پێشمەرگە و برینداربوونی ژمارەیەکی تر، لێرەوە پرسە و هاوخەمی قووڵی خۆمان بۆ بنەماڵەی ئەو پێنچ شەهیدە دەردەبرین و ئومێدی زوو چاکبوونەوەش بۆ بریندارەکان دەخوازین.
هەرێمی کوردستان خاوەنی سەروەری و قەوارەی سیاسی خۆیەتی، هێزی پێشمەرگە تاکە هێزی یاسایی و شەرعی هەرێمی کوردستانە، هەر هێرشێک بۆسەر هێزەکانی پێشمەرگە، بەهێرش و پەلاماردانی تەواوی هەرێمی کوردستان و خەڵکەکەی لێی دەروانین، بۆیە لەروانگەی هەستکردنمان بە بەرپرسیاریەتی و پاراستنی قەوارەی هەرێمی کوردستان و بەرژەوەندییە باڵاکانی گەلەکەمان، هەر هەوڵێک بۆ نانەوەی شەر و ئاژاوە ڕەتدەکەینەوە و پێویستیشە پەکەکە رێز لە سەروەری قەوارەی هەرێمی کوردستان بگرێت و چیتر نەبێتە کێشە بۆ حکومەتی هەرێم و خەڵکەکەی و نەبێتە هۆی تێکدانی پێکەوەژیانی ئاشتیانە و تەبایی سیاسی و یەکریزی لایەنەکان.
پەکەکە دەبێت لەوە تێبگات کە هەرێمی کوردستان گۆڕەپانی سیاسی و سەربازی خۆی نیە و پێویستە کێشەکانی خۆی بباتە دەرەوەی ھەرێمی کوردستان و چیتر نەبێتە هەرەشە بۆسەر ھەرێمی کوردستان و خەڵکەکەی.
عبدالقادر بازرگان
سەرۆکی پارتی چاکسازی تورکمان
٥ی ٦ی ٢٠٢١
