له خواكوڕك بڕياره‌كان بخوێنه‌وه … بڕیاری نوێ له لیژنه‌ی باڵای رووبه‌رووبوونه‌وه‌ی كۆرۆنا بۆ هاونیشتمانیان ده‌رچوون
دوای كۆتاییهاتنی كۆبوونه‌وه‌ی لیژنه‌ی باڵای رووبه‌ڕووبوونه‌وه‌ی كۆرۆنا له هه‌رێمى كوردستان د. جووتیار عادل، گوته‌بێژی حكومه‌تی هه‌رێمی كوردستان، له كۆنفرانسێكى رۆژنامه‌وانيدا گوتى، ره‌وشی هه‌رێمی كوردستان روو له مه‌ترسییه و له ماوه‌ی رابردووشدا هاووڵاتیان به ته‌واوه‌تی پابه‌ندی رێنماییه خۆپارێزییه‌كان نه‌بوونه، بۆیه له‌مه‌ودوا هه‌موو ئه‌گه‌رێك به قه‌ده‌غه‌ى هاتووچۆشه‌وه كراوه ده‌بێت و له‌به‌رده‌م ليژنه ده‌بێت.
گوته‌بێژى حكومه‌تى هه‌رێمى كوردستان به‌رله‌وه‌ى بڕيار و رێكار ورێنماييه‌كان بخاته روو له كۆنفرانسه رۆژنامه‌وانييه‌كه‌يدا گوتيشى:”، وه‌كو حكومه‌تی هه‌رێمی كوردستان به‌رپرسیارێتی پێویست بۆ سه‌لامه‌تی ته‌ندروستی گشتی خه‌ڵكی كوردستان هه‌ڵده‌گرن.
بڕیاره‌كانی ئه‌مڕۆی لیژنه‌ی باڵای به‌ره‌نگاربوونه‌وه‌ی كۆرۆنا له هه‌رێمى كوردستان به‌م شێوه‌يه‌ى خواره‌وه ده‌بێت:
يه‌كه‌م: پێویستە شوێنە ئایینیی و بازاڕ و مۆڵ و دوکاندار و شوێنە گەشتیارییەکان و چێشتخانە و کافترا و ھۆتێل و مۆتێلەکان، کارمەندانەکانیان ڤاکسین بەکاربھێنن، یان تێستی 72 کاتژمێری پێ بێت. لێژنەکان بە دواداچوونی بۆدەکەن و ھەر شوێنێک سەرپێچی بکات سزا دەدرێت و شوێنەکەی دادەخرێت.
دووه‌م : پێویستە ھەموو فەرمانبەرانی حکومەتی ھەرێمی کوردستان، ڤاکسین وەربگرن و بە ماسکەوە دەوام بکەن، ھەر فەرانبەرێک رێکارەکان جێبەجێ نەکات، ئەوە بەپێی یاسای بەرزەفتی فەرمانبەران مامەڵەی لەگەڵ دەکرێت، لیژنەی ھاوبەشی وەزارەتی تەندروستیی و ناوخۆ و فەرمانگەی ھەماھەنگیی و بە دواداچوونیش ھەڵسەنگاندنی بۆ جێبەجێکردنی رێکارەکان لە گشت دامودەزگاکانی حکومەت دەکات.
سێيه‌م : رێگە نادرێت بە ھیچ کەشتیارێک بێتە ناو ھەرێمی کوردستان ئەگەر ڤاکسینی وەرنەگرتبێت یان تێستی 48 کاتژمێری پێ نەبێت.
چواره‌م : ھەر کۆمپانیایێکی گەشتیاری دەرکەوت تێستی ساختەی پێیە، ئەوە ئەو کۆمپانیایە لە گەشتکردن بۆ ھەرێمی کوردستان قەدەغە دەکرێت.
پێنجه‌م : سەپاندنی بەستنی ماسک لە دامودەزگاکانی حکومەت و شوێنە گشتیی و گەشتیارییەکان تەنانەت بۆ ئەوانەش ڤاکسینیان وەرگرتووە.
شه‌شه‌م : قەدەغەکردنی بە تەواوەتی ھەموو کۆڕ و کۆبوونەوە و کۆنفرانسەکان و چوونە سەرقەبران.
حه‌وته‌م : مەلەوانگە و شوێنە وەرزشییەکان کراوەبن بە مەرجی جێبەجێکردنی رێکارە تەندروستییەکان.
هه‌شته‌م : ھۆڵی سینەماکان لە گشت مۆڵ و بازاڕەکان بە داخراوی دەمێنێتەوە.
نۆيه‌م : داخستنی تەواوی ھۆڵی بۆنە و ئاھەنگ و مەراسیم و ھۆڵەکانی ناو ھۆتێلەکان.
ده‌يه‌م : دانانی پرسە بە ھەموو شێوەیێک قەدەغەیە و ھەر کەسێک پابەند نەبێت بە بڕێک پارە سزا دەدرێت و لیژنەکانی قائیمقامیەتیش بە دواداچوون بۆ جێبەجێکردنی دەکەن.
يازده‌م : شوێنە ئایینییەکان بە جێبەجێکردنی رێکارە تەندروستییەکان کراوە دەبن و ھەر شوێنێک پابەند نەبێت ئەوە سزا دەدرێت و دادەخرێت.
دوازده‌م : ژووری ئۆپەراسیۆن لە پارێزگا و ئیدارە سەربەخۆکان دەبێت ئەم رێکارانە وەک خۆیان جێبەجێ بکەن و دەستەلاتیشیان پێ دەدرێت ئەگەر پێویست بێت رێکارەکان توندتر بکرێت.
سێزده‌هه‌م: لیژنەی باڵای بەرەنگاربوونەوەی کۆڕۆنا داوا لە میدیاکان دەکات ھاوکار بن لە ھۆشیارکردنەوەی ھاووڵاتییان.
چوارده‌هه‌م برياريش : ئەم رێکارانە بۆ ماوەی ھەفتەیێک دەبێت و لیژنەی باڵای بەرەنگاربوونەوەی کۆرۆنا لە رۆژی 3-8-2021 جارێکت دیکە کۆدەبێتەوە و ھەڵسەنگاندن بۆ پرسی کۆرۆنا لە ھەرێمی کوردستان دەکات.
