لیژنه‌ی په‌روه‌رده و خوێندنی باڵا بۆ كێشه‌ی مامۆستایانی وانه‌بێژ لەگەڵ وەزیرانی پەروەردە و خوێندنی باڵا و دارایی کۆ دەبنەوە
به‌مه‌به‌ستی گفتوگۆكردن له‌سه‌ر كێشه‌كانی مامۆستایانی وانه‌بێژ، نیوه‌ڕۆی ئه‌مڕۆ یه‌كشه‌ممه 17/10/2021 لیژنه‌ی په‌روه‌رده و خوێندنی باڵا و توێژینه‌وه‌ی زانستی لە پەرلەمانی کوردستان بە ئامادەبوون سەرۆک و جێگر و ئەندامانی لیژنەکە کۆ بوونەوە.
ته‌وه‌ری یه‌كه‌می كۆبوونه‌وه‌كه تایبه‌ت به پرسی كێشه‌كانی مامۆستایانی وانه‌بێژ بوو کە نوێنه‌ری ئه‌م توێژه ئاماده‌ی دانیشتنه‌كه بوو و سهرجهم داواكاری و یاداشته‌كانی خسته به‌رده‌م سه‌رۆك و ئه‌ندامانی لیژنه و دواتر سه‌رۆكی لیژنه و ئه‌ندامان پاڵپشتیی ته‌واوی خۆیان بۆ داواكارییه‌كانیان خسته ڕوو و بڕیار درا به نووسراوی فه‌رمی داوا بكرێت له هه‌فته‌ی داهاتوو هه‌ریه‌كه له وه‌زیرانی په‌روه‌رده و خوێندنی باڵا و دارایی حکوومەتی هەرێمی کوردستان له كۆبوونه‌وه‌ی لیژنه ئاماده بن و ڕێگه‌چاره‌ی گونجاو بۆ چاره‌سه‌ركردنی گرفته‌كه بدۆزرێته‌وه.
له به‌شێكی تری كۆبونه‌وه‌كەدا گفتوگۆ له‌سه‌ر پرسی پرۆسه‌ی پڕكردنه‌وه و وه‌رگرتنی ده‌رچوانی پۆلی 12ی ئامادەیی له زانكۆ و په‌یمانگەكان، بڕیار درا به نووسراوێكی فه‌رمی داوا له وازاره‌تی خوێندنی باڵا بكرێت كه ژماره‌ی كورسییه‌كانی خوێندن زیاد بكه‌ن بۆ ئه‌وه‌ی بتواندرێت زۆرترین ده‌رچووی به‌شه جیاوازه‌كان له زانكۆ و په‌یمانگە حكوومییه‌كان وه‌ربگیرێن.
له كۆتایی كۆبوونه‌وه‌كەدا سهرجهم ئه‌و نووسراو و یاداشتانه‌ی ئاراسته‌ی لیژنه كرابوون، خوێندرانه‌وه و بڕیاری پێویستیان له‌سه‌ر درا.
