جه‌نه‌ڕالێكی سوپای ئه‌مه‌ریكا: ئێمه له عێراق ناڕۆین
فه‌رمانده‌ی فه‌رمانده‌یی هێزی ناوه‌ندی ئه‌مه‌ریكا ئاشكرای كرد كه واشنتۆن ته‌واوی ئه‌و سوپایه ده‌هێڵێته‌وه كه ئێستا له عێراقه و ژماره‌كه‌یان 2500 سه‌رباز ده‌بێت.
جه‌نه‌ڕال فڕانك ماكێنزی فه‌رمانده‌ی فه‌رمانده‌یی ناوه‌ندی ئه‌مه‌ریكا له چاوپێكه‌وتنێكدا له‌گه‌ڵ ئاژانسی (ئه‌سۆشه‌یتید پرێس) گوتی: هه‌رچه‌نده ڕۆلی سه‌ربازانمان له عێراق ده‌گۆڕێت بۆ نا شه‌ڕكه‌ر، به‌ڵام پاڵپشتییه ئاسمانی و هاوكارییه سه‌ربازییه‌كانی ترمان بۆ شه‌ڕكردن له عێراق دژی تیرۆریستانی داعش ده‌مێنن. جه‌ختیشی كرده‌وه كه پێشبینی ده‌كه‌ن توندوتیژی ئه‌و میلیشیایانه‌ی له‌لایه‌ن ئێرانه‌وه پاڵپشتی ده‌كرێن له‌سه‌ر هێزه‌كانی عێراق و ئه‌مه‌ریكا ئه‌م مانگه‌ش بمێنن.
ڕاشیگه‌یاند: ئه‌و میلیشیایانه ده‌یانه‌وێ سوپای ئه‌مه‌ریكا به‌ته‌واوی له عێراق بچێته ده‌ره‌وه، به‌ڵام ئێمه ناڕۆین، له كۆتایی ئه‌م مانگه‌شدا ئه‌م وه‌ڵامه ده‌بینن.
جه‌نه‌ڕال ماكێنزی گوتیشی: ئێمه ئه‌و بنكانه‌مان گواستۆته‌وه كه پێویستمان پێیان نه‌بوو، عێراقییه‌كانیش تا ئێستا ده‌یانه‌وێ ئێمه بمێنینه‌وه و هاوكارییان بین، تا ئه‌و كاته‌ی ئه‌وان بیانه‌وێ، ده‌توانین له‌سه‌ر ئه‌مه ڕێك بكه‌وین.
فه‌رمانده‌ی فه‌رمانده‌یی سوپای ناوه‌ندی ئه‌مه‌ریكا هه‌روه‌ها گوتی: تیرۆریستانی داعش تا ئێستا هه‌ڕه‌شه‌ن له‌سه‌ر عێراق و به‌رده‌وامیش خۆیان ئاماده ده‌كه‌نه‌وه، ڕه‌نگه له داهاتووشدا به‌ناوێكی تر.
گوتیشی: كلیلی چاره‌سه‌ری ئه‌وه‌یه نه‌هێڵین تیرۆریستانی داعش له‌گه‌ڵ لایه‌نی تر یه‌كبگرن له سه‌رتاسه‌ری جیهان، بێگومان ئه‌گه‌ر ئه‌مه نه‌كه‌ین به‌هێزتر و مه‌ترسیدارتر ده‌بێت.
ڕاشیگه‌یاند كه له ساڵی ڕابردووه‌وه ژماره‌ی سه‌ربازانی سوپای ئه‌مه‌ریكا له ته‌واوی ڕۆژهه‌ڵاتی ناوه‌ڕاست كه‌م بووه‌ته‌وه، ئێستاش به‌هۆی ناكۆكییه‌كان له‌گه‌ڵ ئێران 80 هه‌زار سه‌رباز له‌و ناوچه‌یه هه‌ن.
