400 ملیۆن دینار بۆ پەرەپێدانی پرۆژەكانی ئاوی سلێمانی خەرج دەكرێت
وەزارەتی شارەوانی و گەشتوگوزار ئەمڕۆ چوارشەممە 03ـی 08ـی 2022 ئاشکرای دەکات: بڕیاری خەرجکردنی 400 ملیۆن دیناریان داوە بۆ پەرەپێدانی پڕۆژەکانی ئاو لە سنووری پارێزگای سلێمانی.
لە ڕاگەیەنراوێک وەزارەتی شارەوانی و گەشتوگوزار ڕایگەیاند: وەزارەتەکەمان لەسەر ڕێژەی 17%ـی داهاتی ئاو لە سنووری بەڕێوەبەرایەتیی ئاوی سلێمانی، بڕیاری دا بە خەرجكردنی گوژمەی 400 ملیۆن دینار بەمەبەستی جێبەجێكردنی پڕۆژەی دابینكردنی بوستەر پەمپ بۆ پرۆژەی ئاوی ((P.W.J كە بە پێی یاسا و ڕێنماییەكانی دارایی تایبەت بە داهات و یاسا و ڕێنماییەكانی دارایی بودجەی ساڵی 2013 خەرج دەكرێت.
ئاماژەی بەوەش داوە کە ئەمە لەكاتێكدایە ڕۆژی پێنجشەممە 28ـی07ـی 2022 ساسان عەونی، وەزیری شارەوانی و گەشتوگوزار لە ڕێوڕەسمێكدا كە لە شاری سلێمانی بەڕێوەچوو، تەواوبوونی پڕۆژەی ڕاكێشانی هێڵی سەرەكیی گواستنەوەی ئاوی لە تاسڵوجە بۆ سلێمانی بە درێژایی (15،800 م.د) ڕاگەیاند، سەبارەت بە ژمارەی سوودمەندبووانیش گوتی: زیاتر لە 150 هەزار كەس لە گەڕەكەكانی باشووری خۆرهەڵاتی شاری سلێمانی لێی سوودمەند دەبن و دەبێتە هۆی پەرەپێدانی زیاتری پرۆژەكانی ئاو لە سەنتەری شاری سلێمانیدا.
