فراکسیۆنی پارتی دیموکراتی کوردستان راگەیەندراوێكی بڵاو كردەوە

فراكسیۆنی پارتی دیموكراتی كوردستان لە پەرلەمانی عێراق لە راگەیێندراوێکدا کەمێك پێش ئێستا رایگەیاند: دوای چەندین رۆژ لەدانیشتن و گفتوگۆی بەردەوام لە نێوان هێزە سیاسییەکانی پەرلەمانی عیراق ، دواجار بەرەبەیانی ئەمرۆ یاسای هەلبژاردنی ئەنجومەنی پارێزگاکان و ئەنجومەنی نوێنەران و قەزاکانی عێراق دەنگی لەسەر دراو پەسەند کرا ،  جێی داخە لایەنێکی سیاسی کە خۆی بەشێک بووە لە دانوستانەکان و دەنگی لەسەر یاساکە داوە و هیچ هەڵوێستێکی فەرمیان لەسەر هیچ بڕگە و مادەیەکی تایبەت بە کەرکووک نەبووە.

دەقی راگەیەندراوی فراکسیۆنی پارتی دیموکراتی کوردستان لە ئەنجومەنی نوێنەرانی عێراق .

بەناوی خودای گەورەو میهرەبان

جەماوەری خۆڕاگری کوردستان

دوای چەندین رۆژ لەدانیشتن و گفتوگۆی بەردەوام لە نێوان هێزە سیاسییەکانی پەرلەمانی عێراق ، دواجار بەرەبەیانی ئەمرۆ یاسای هەڵبژاردنی ئەنجومەنی پارێزگاکان و ئەنجومەنی نوێنەران و قەزاکانی عێراق دەنگی لەسەر دراو پەسەند کرا ،

وەکو پارتی دیموکراتی کوردستان تەواوی هەوڵەکانمان خستە گەڕ لەپێناو زامن کردنی مافی دەنگدەرانمان لەهەرێمی کوردستان و کەرکووک و تەواوی ناوچە کوردستانیەکانی دەرەوەی ئیدارەی هەرێم و تەواوی ناوچەکانی عێراق ، بەشێوەیەک لەکەرکووک هەموو ئەو رێگرییانەی هەبوون بۆ هەڵبژاردنی ئەنجومەنی پارێزگا هەڵگیران و بۆ یەکەم جار سەرژمێری سالی ١٩٥٧ دەکرێتە بنەما بۆ هەڵبژاردنی داهاتوو ، بەمەش زامنی مافی دەنگدەرانی ئەو ناوچانەی بەهۆی سیاسەتی گۆرینی دیمۆگرافی لەکەرکووک دابڕابوون ، وەکو : ( چەمچەماڵ و کفری و کەلار و دووزخورماتوو )ناوچەکانی تر بکەین ، هەروەها بابەتی دابەشکردنی پۆستەکانی کەرکووک لەسەر بنەمای یەکسانی ٣٢٪ هەڵبگرین ، جگە لەوە زامنی دەنگی دەنگدەرانمان لە سنوری شارۆچکەی (سەرگەڕان) کرد لەرێگای ( بەردەرکردن / استثنا) کردنی ئەو شاروچکەیە لە سەرژمێری ساڵی ١٩٥٧ ، ئەمە جگە لەوەی تەواوی ئەو خێزانانەی بەهۆی سیاسەتی تەعریب لەکەرکووک راگوازرابوون بەپێی مادەی ١٤٠ دیسان مافی دەنگدانیان دەبێت ، هەروەها مادەی ٣٥ لەیاسای ژمارە ١٢ ی ساڵی ٢٠١٨ و مادەی ١٢ لەیاسای ژمارة ١٤ ی سالی ٢٠١٩ هەڵگیران ، کە هەموویان رێگر بوون لەبەردەم هەڵبژاردنی کەرکووک ، بەوەش دەرفەتێکی زێڕین لەبەردەم هاووڵاتییانی کوردی شارەکە هەیە بۆ ئەوەی جارێکی تر پارێزگارێکی شەرعی بۆ ئەو شارە هەلبژێرن .

هەرلەبارەی ئاوارەکانی کەرکووک و سنجار زامنی دەنگەکانیان کرا بەوەی لەو ناوچانەی لێی نیشتەجێن دەنگی خۆیان بۆ شارەکەیان بدەن ،

لەبارەی کۆتایی مەسیحیەکانیش دوای هەوڵدانێکی زۆر سەرکەوتووبوین لەوەی مەسیحیەکانی کوردستان نوێنەری راستەقینەی خۆیان هەبێت و خەڵکی تر لەجیاتی ئەوان نەچێتە پەرلەمانی عیراق ..

بەڵام ئەوەی جێگای داخە لایەنێکی سیاسی کەخۆی بەشێک بووە لەدانوستانەکان و دەنگی لەسەر یاساکە داوە و هیچ هەڵوێستێکی فەرمیان لەسەر هیچ بڕگەو مادەیەکی تایبەت بە کەرکووک نەبووە ، بەڵام کاتێک گەیشتە ئەوەی لە دواساتەکاندا لە چەند بڕگەیەکی یاساکە کە پەیوەندی نەبوو بە کەرکووکەوە لە بەرژەوەندی گروپێک درا کە هاوپەیمان و دۆستی ئەوانن و دژی خەڵکی هەرێمی کوردستانن ، هەر وەها لە پێناو هەندێک بەرژەوەندی و پەیوەندی ژێر بەژێری حیزبی ، ئەو لایەنە سیاسیەی هەرێم دەستی کرد بە بڵاو کردنەوەی بەیاننامەی چەواشەکارانە و بێ بنەما ، دەیانەوێت بەو شێوەیە خەڵک نائومێد بکەن لەهەڵبژاردن بۆ ئەوەی دۆخی شاری کەرکووک چاک نەبێت و لەژێر دەستەیی بمێنن و هەوڵەکانی پارتی بۆ ئاسایی کردنەوەی دۆخی شارەکە بشێوێنن ، کە ناتوانن ئەوە بکەن و سەرکەوتوو نابن ..

لەکۆتاییدا پیرۆزبایی لەتەواوی خەڵکی کوردستان و کەرکووک و عێراق دەکەین و هیواخوازین هەڵبژاردنێکی پاک و بێگەرد ئەنجام بدرێت بۆ ئەوەی هەر لایەنێک قەبارەی راستەقینەی خۆی بزانێت .

فراکسیۆنی پارتی دیموکراتی کورستان لە پەرلەمانی عێراق.

٢٠٢٣/٣/٢٧