فراکسیۆنی پارتی لە ئەنجومەنی پارێزگای کەرکووک: بەشداربوونی كورد لەو سەرژمێرییە، بۆ داهاتووی کورد لە شاری کەرکووک زۆر گرنگ و پێویستە

نوێنەرانی پارتی دیموكراتی كوردستان لە ئەنجومەنی پارێزگای كەركووك، داوا لە هاووڵاتییان و خەڵكی ناوچەكانی ماددەی 140 دەكەن، لە هەر شوێنێكن بۆ بەشداربوون لە سەرژمێری گشتی لە رۆژانی 20 و 21ی تشرینی دووەمی 2024 بگەڕێنەوە ناوچەكانیان و خۆیان تۆمار بكەن.

حەسەن مەجید، سەرۆکی فراکسیۆنی پارتی لە ئەنجومەنی پارێزگای کەرکووک، رایگەیاند، سەرژمێری بابەتێكە بۆ هەموو وڵاتێك پێویست و گرنگە، چونكە ئەگەر سەرژمێری نەبێت، وڵاتەكە ناتوانێ هەنگاو بۆ ئایندەی خۆی بهاوێت، گوتیشی: “وڵاتێك ئەگەر سەرژمێری تیادا نەكرێت و داتای نەبێت، وەكو ئەوە وایە كەسێك لە شەوێكی تاریكدا چاوەكانی داخستبێت و بڕوات، بەڵام ئەوە بۆ وڵاتێك زۆر باشە، كە هیچ كێشەی خاك و دەستووری نەبێت، كێشەی نەتەوەیی نەبێت، ئێمە لە 2005 دەستوورمان هەیە و تیایدا ماددەیەكی زیندوو هەیە، كە ماددەی (140)ە، كۆمەڵێك قۆناغی هەیە و بە دروستی نەڕۆیشتووە، یەكەمیان قەرەبووكردنەوەیە، دووەمیان، ئاساییكردنەوە و سێیەم راپرسی و ئامارە، ئەوانە هیچیان نەكراون.”

ئاماژەی بەوەشدا: “بەڵام لەم دۆخەدا كە سەرژمێری دەكرێ، وای كردووە ئێمە گومانمان هەبێت، چونكە بڕیار بوو لە ساڵی 2010 بكرێ و نەكرا، هەندێ كەس پەكیان خست، هەندێ لایەن و نەتەوەیەك بە دیاریكراوی رێگری كرد، ئێستا هەر ئەوان دەڵێن با بكرێ، چونكە دەبینن دیمۆگرافیاكە گۆڕاوە و خەڵكێكی زۆری دەرەوەی شار هێنراوەتە شارەكە، تەنانەت گەڕەك دروست كراون كە یەك نەتەوەی تیادا بێت، ئێستا كە هەر بڕیارە سەرژمێری بكرێ، لێرەدا بۆ كورد و ناوچەكانی ماددەی 140 زۆر گرنگە بێنەوە و ناویان تۆمار بکەن، چونكە خۆشبەختانە حكوومەتی هەرێمی كوردستان كۆمەڵێك رێككەوتنی باش و گرنگی لەمبارەوە كردووە، بە شێوەیەك سەرژمێریی ساڵی 1957 بكرێت بە بنەما و پێوەر بۆ ئەو سەرژمێرییە، كەوابێت بەشداربوون لەم سەرژمێرییە بووە بە ئەركی نیشتمانی و نەتەوەیی.”

سەبارەت بە بەشدارنەبوونی هاوشارییانی كەركووك و ناوچەكانی ماددەی 140، سەرۆكی فراكسیۆنی پارتی لە ئەنجومەنی پارێزگای كەركووك رایگەیاند، هەر كەركووكییەك، یان كەسانی ماددەی 140 بەشداری لەو سەرژمێرییە نەكەن، ئەوە كەركووكیبوونی خۆیان لەدەست دەدەن و شارەكە بۆ خەڵكی دیكە جێ دەهێڵن، ئەوەش جگە لەوەی زیانی گەورەی بۆ شارەکە هەیە، زیانی بۆ خۆشیان دەبێت و لە كۆمەڵێك ئیمتیاز و ماف بێبەش دەبن كە لە ماددەی دەستووریی 140 دیاری كراون، یان وەكو كەركووكییەك هەیانە، لەبەرئەوە دووبارەی دەكەینەوە، بەشداربوون لەم سەرژمێرییە ئەركێكی گەورەی نیشتمانی و نەتەوەییە.