چاودێرێکی سیاسی : بەردەوامبوونی ئەم دۆخەی عێراق وەک بۆمبێکە هەڕەشە لەداهاتووی عێراق دەکات

عێراق نزیک دەبێتەوە لە هەڵبژاردنەکانی ساڵی 2025 و چاودێرانی سیاسی هۆشداری لە بەردەوامبوونی ئەم دۆخە دەدەن و دەڵێن:” وەک بۆمبێکە هەڕەشە لەداهاتووی عێراق دەکات.

ئاراس عەبدوڵڵا چاودێری سیاسی، لەبارەی دۆخی عێراق رایگەیاند :” لاوازکردنی کەرتی تایبەت و کەرتەکانی دیكەی ئابووری، پشتبەستن بە نەوت وای کردووە کەرتەکانی دیكەی وەک کشتوکاڵ، پیشەسازی و گەشتوگوزار پشتگوێ بخرێن و گەشە نەکەن. ئەمەش دەبێتە هۆی نەبوونی هەلی کاری جۆراوجۆر بۆ گەنجان و زیادبوونی رێژەی بێکاری، بەڵام لە هەرێمی كوردستان ئەوە پێچەوانەیە، ئەگەر سەیر بكەین هەرێمی كوردستان بەتەواوی خۆی لە عێراق جیاكردووەتەوە، سەرەڕای لێبڕینی بودجە و مووچەی فەرمانبەران، بەڵام لە قۆناغێكی گەشەسەندوودایە.

ناوبراو پێیوایە: گەندەڵی بووەتە هۆی بەهەدەردانی بڕێکی زۆر لە داهاتی نەوت لە عێراقدا. ئەو پارەیەی کە دەبوو بۆ ئاوەدانکردنەوەی ژێرخانی ئابووری، باشترکردنی خزمەتگوزارییەکانی وەک کارەبا، ئاو، تەندروستی و پەروەردە بەکار بهێنرێت، بەهۆی گەندەڵییەوە بەفیڕۆ دەڕوات. ئەمەش بووەتە هۆی ناڕەزایی بەردەوامی شەقام و تێکچوونی متمانەی نێوان هاووڵاتییان و دەسەڵات، کاتێکیش داهات کەم دەکات، ململانێی سیاسی لەسەر دەسەڵات و سامان زیاد دەکات. نەبوونی خزمەتگوزاری و هەلی کار، بەتایبەتی لەنێو گەنجاندا، دەتوانێت ببێتە هۆی نائارامیی کۆمەڵایەتی و تەشەنەسەندنی توندوتیژی.

گوتیشی: “بەردەوامبوونی ئەم دۆخە، واتە پشتبەستن بە تەنیا یەک سەرچاوەی داهات و بەربڵاویی گەندەڵی، ئەوە وەک بۆمبێکە کە هەڕەشە لە سەقامگیری و داهاتووی ئابووری و کۆمەڵایەتیی عێراق دەکات، بەڵام وەك ئاماژەم پێ دا، هەرێمی كوردستان رێك پێچەوانەی ئەو دۆخەیە، كابینەی نۆیەم كار بۆ هەموو سێكتەرەكان دەكات و دەیەوێ هەرێمی كوردستان فرە سەرچاوەی داهاتی هەبێت و تەنیا پشت بە نەوت نەبەسترێ، بێگومان ئەوەش كاری زۆری بۆ كراوە و وەك دەبینین ئێستا هەرێمی كوردستان لە سێكتەری كشتوكاڵ و پیشەسازی و پشتبەستن بە سەرچاوەی دیكەی جیا لە نەوت، قۆناغی زۆری بڕیوە، كە هەر ئەوەشە وایکردووە عێراق بودجەی ببڕێت و مووچەی خەڵكی كوردستان نەدات، چونكە خەڵكی عێراق بەردەوام بۆ گەشتیاری روو دەکەنە هەرێمی كوردستان و خۆیان جیاوازییە گەورەكە دەبینن، ئەوەش بە قازانجی دەسەڵاتدارانی عێراق نییە.”