رێژه‌ی گه‌شتیاران زیادی كردووه و رۆژانه 5 هه‌زار گه‌شتیار روو له شاره‌كانی كوردستان ده‌كه‌ن
له‌م وه‌رزه‌ی گه‌رما به‌هۆی بوونی چه‌ندین شوێنه‌واری دێرین و هاوینه‌هه‌واری فێنك و ڕه‌نگین له شاره‌كانی هه‌رێمی كوردستان، رۆژ به رۆژ رێژه‌ی گه‌شتیاران له زیادبووندایه و گوته‌بێژی ده‌سته‌ی گه‌شتوگوزاری هه‌رێمی كوردستانش رایده‌گه‌ێنێت” رێژه‌ی گه‌شتیاران له‌هه‌رێمی كوردستان ڕوو له‌هه‌ڵكشان ده‌كات، ئه‌مه‌ش كاریگه‌ری له‌سه‌ر زیادبوونی داهاتی گه‌شتیاری هه‌یه.
(نادر ڕۆستی) گوته‌بێژی ده‌سته‌ی گه‌شتوگوزاری هه‌رێمی كوردستان رایده‌گه‌یه‌نێـت” ئه‌مساڵ ژماره‌ی گه‌شتیاران زۆر زیادی كردووه و رۆژانه زیاتر له پێنج هه‌زار گه‌شتیار ڕوو له هه‌رێمی كوردستان ده‌كه‌ن، ئه‌مه‌ش مایه‌ی دڵخۆشییه و ده‌بێته هۆكاری زیادبوونی داهاتی گه‌شتیاری، چونكه داهاتی گه‌شتیاری به‌نده به مانه‌وه‌ی گه‌شتیاران و زیادبوونی رێژه‌كه‌یان.
گوته‌وویژی ده‌سته‌ی گه‌شتوگوزاری هه‌رێمی كوردستان، ئه‌وه‌شی راگه‌یاندوه” به‌رده‌وام كار بۆ ئه‌وه ده‌كه‌ین گه‌شتیاران زۆرترین ماوه له‌هه‌رێمی كوردستان بمێنه‌وه، ئه‌مه‌ش له‌پێناو زیادكردنی داهاتی گه‌شتیاری، به‌ڵام مانه‌وه‌ی گه‌شتیاران ته‌نیا په‌یوه‌ندی به ئێمه‌وه نییه، به‌ڵكو به بازگه‌كان و شوێنه گه‌شتیارییه‌كانه‌وه هه‌یه، كه چۆن مامه‌ڵه له‌گه‌ڵ گه‌شتیاران ده‌كه‌ن، ئه‌گه‌ر به‌شێوه‌یه‌كی باش مامه‌ڵه له‌گه‌ڵ گه‌شتیار كرا، ئه‌وا گه‌شتیار زیاتر ده‌مێنێته‌وه، ئه‌وه‌ش وا ده‌كات كه داهات زیاد بێت.
رۆستی ئه‌وه‌شی باسكردووه” كه به‌پێی ئه‌و كۆنفڕانسانه‌ی كه پێشتر كردوویانه و ئه‌و پێشانگا و دیدار و ووركشۆپانه‌ی بۆ كۆمپانیا گه‌شتیارییه‌كان كراون، ژماره‌یه‌كی زۆر له كۆمپانییه‌كان بانگهێشتی كوردستان كراون، ئێستا رۆژانه نۆهه‌د كۆمپانیای گه‌شتیاری له خوارو و ناوه‌ڕاستی عێراقه‌وه گه‌شتیار بۆ هه‌رێمی كوردستان ده‌هێنن.
