په‌كه‌كه شه‌ڕێكی دیكه‌ی ئیقلیمی به‌وه‌كاله‌ت ده‌كات
خواكوڕك
دوای خستنه خواره‌وه‌ی فرۆكه‌یه‌كی روسی له‌لایه‌ن توركیا، شه‌ڕ و ئاژاوه‌كانی نێوان په‌كه‌كه و ده‌وڵه‌تی توركیا ده‌ستی پێكردو به‌هۆیه‌وه پرۆسه‌ی ئاشتی له نێوانیان له‌بارچوو، ئه‌مجاره‌ش په‌كه‌كه به‌هۆی لێدوانه دژ به‌یه‌كه‌كانی نێوان عه‌بادی و ئه‌ردۆگان، خه‌ریكی به‌زمێكیتره له موسڵ.
ماوه‌یه‌كه له‌سه‌ر به‌شداری كردنی سوپای توركیا له شه‌ڕی گرتنه‌وه‌ی موسڵ، لێدوانی توند له نێوان عه‌بادی و به‌رپرسانی ده‌وڵه‌تی توركیا ده‌درێت، له نوێترین لێدوانیشیاندا ئه‌ردۆگان به عه‌بادی ده‌ڵێت (تۆ له ئاستی من نیت)، له‌به‌رامبه‌ردا عه‌بادی گڵۆپی سه‌وزی بۆ په‌كه‌كه هه‌ڵكرد تا به‌شداری شه‌ڕی موسڵ بكات.
چاودێرانی سیاسی پێیانوایه، پرسی به‌كارهێنانی په‌كه‌كه له به‌رامبه‌ر توركیا له‌لایه‌ن ئه‌و ده‌وڵه‌تانه‌ی ده‌كه‌ونه ناكۆكیه‌كی كاتی له‌گه‌ڵ ئه‌و وڵاته بۆته شتێكی رۆتین، به‌ڵام ئه‌وه‌ی سه‌یره به‌رده‌وام دووباره كردنه‌وه‌ی ئه‌و هه‌ڵه‌یه‌یه له‌ڵایه‌ن په‌كه‌كه‌وه.
هه‌روه‌ها چاودێران ده‌شڵێن، به‌شداری پێكردنی په‌كه‌كه له شه‌ڕی گرتنه‌وه‌ی موسڵ بۆ عه‌بادی مه‌سه‌له‌یه‌كی ته‌كتیكیه، هه‌ركات پێویستی پێنه‌ما و له‌گه‌ڵ توركیا گه‌یشته رێكه‌وتنێك، په‌كه‌كه به‌ده‌رده‌خات. به‌ڵام بۆ په‌كه‌كه ستراتیژیه، به‌تایبه‌ت كه به‌مشێوه قوڵه دژایه‌تی توركیا بكات . چونكه له داهاتوو باجی قورستری په‌كه‌كه ده‌درێت له‌لایه‌ن توركیاوه و په‌یوه‌ندیه‌كان به‌ره‌و خراپی زیاتر ده‌چن.
