هاوسەرۆكانی هەدەپە و نۆ پەرلەمانتاری تر دەستگیر كران
خواكوڕك
بەرەبەیانی هەینی 4-11-2016 لە ئۆپەراسیۆنێکدا سەلاحەدین دەمیرتاش و فیگەن یوکسەکداغ هاوسەرۆکانی هەدەپە لەگەڵ نۆ پەرلەمانتاری دیکەی ئەو پارتە لەلایەن پۆلیسی تورکیاوە دەستگیرکران.
بەپێی زانیارییەکان هاوسەرۆک و پەرلەمانتارانی هەدەپە لە ئۆپەراسیۆنێکی هاوبەش و هاوکاتدا لەلایەن پۆلیسی دژە تیرۆر دەستبەسەرکراون و دەبردرێنە ئامەد و لێپرسینەوەیان لەگەڵدا دەکرێت.
پێشتر سه‌ڵاحه‌دین ده‌میرتاش هاوسه‌رۆكی هه‌ده‌په لەبەرامبەر دادگای توركیا پارێزنامه‌كه‌ی به‌ناوی “هیچ داواكاری و چاوه‌ڕوانییه‌كم له ئێوه نییه، به‌هۆی چالاكییه سیاسییه‌كانم، ته‌نیا ئه‌وانه‌ی منیان هه‌ڵبژاردووه دتوانن لێپیرسینه‌وه‌م له‌گه‌ڵدا بكه‌ن” بڵاو كرده‌وه.
له به‌شێك له پارێزنامه‌كه‌ی ده‌میرتاشدا هاتووه: “حزبه‌كه‌م له هه‌ڵبژاردنی رۆژی 7 حوزه‌یرانی 2015 پتر له شه‌ش ملیۆن ده‌نگی به‌ده‌ستهێنا و به‌ربه‌ستی 10% په‌رله‌مان تێپه‌ڕی كرد و به 80 په‌رله‌مانتار چووه په‌رله‌مان.
ئه‌و چه‌نده بووه هۆی كۆتاییهێنان به ده‌سه‌ڵاتی تاك لایه‌نه‌ی ئاكه‌په. ره‌جه‌ب ته‌یب ئه‌ردۆغان رێز له ئیراده‌ی گه‌ل نه‌گرت و پێشی به پێكهێنانی حكوومه‌تی هاوپه‌یمانی گرت و كۆتایی به پرۆسه‌ی چاره‌سه‌ریش هێنا. چونكه ئه‌نجامی هه‌ڵبژاردن به دڵی ئه‌و نه‌بوو، شه‌ڕ ده‌ستپێكرده‌وه و و ئاگر به‌ردایه ووڵات. به‌هۆی ئه‌و ره‌وشه‌ی له ئه‌نجام شه‌ڕ دروست بوو و ترس و وه‌حشت له‌ناو خه‌ڵك بڵاو كره‌ده‌وه و هه‌ڵبژاردنێكی دوور له مه‌رجی یه‌كسان و دادوه‌ری ئه‌نجامدا.
له لایه‌كی تره‌وه، ئه‌و كاته‌ی ئه‌ردۆغان سه‌رۆك وه‌زیر بوو چه‌ندین تاوانی ئه‌نجامدا. له ئه‌خلاق، دزی و پاره‌ی پیس و سوود وه‌رگرتنی خراپ له ئابڵۆقه‌ی نێوده‌وڵه‌تی سه‌ر ئێران، پشتگیری گرووپه تیرۆریستییه‌كانی سوریا و چه‌ندین تاوانی گه‌وره‌ی دیكه.
بۆ ئه‌وه‌ی خۆی له‌و تاوانانه رزگار بكات، كوده‌تایه‌ك دژی دادگا ئه‌نجامدا و به زۆرداری دادگاكانی كۆنترۆڵ كرد. بۆ ئه‌وه‌ی به ته‌واوه‌تی تاوانه‌كانی بشارێته‌وه، ووڵات رووبه‌ڕووی شه‌ڕێكی سه‌خت كرد. بۆ ئه‌وه‌ی رژێمێكی دیكتاتۆر دروست بكات، هه‌موو رێبازێك به‌كار دێنێ.
ئه‌ردۆغان، هه‌ده‌په به گه‌وره‌ترین ئاسته‌نگی به‌رامبه‌ر دامه‌زراندنی رژێمی دیكتاتۆری خۆی ده‌بێنێت. چونكه حزبه‌كه‌مان له هه‌ڵبژاردنی یه‌كی كانوونی یه‌كه‌م به 59 په‌رله‌مانتار چووه په‌رله‌مان و ئه‌ردۆغان ناتوانێ به دڵی خۆی ده‌ستور بگۆڕێت و رژێمێكی دیكتاتۆر دابمه‌زرێنێت. به ئامانجی ئه‌وه‌ی 367 په‌رله‌مانتار به‌ده‌ست بێنێت، داوای هه‌ڵبژاردنێكی پێشوه‌خت یان ته‌نیا له هه‌رێمێك ده‌كات.
له به‌شێكی تر دا گوتی نام هه‌وێت وه‌ڵامی پرسیارانه‌كان بده‌مه‌وه. ئێمه نوێنه‌رایه‌تی خه‌ڵك ده‌كه‌ین و پارێزبه‌ندی په‌رله‌مانم هه‌یه و وه‌ك په‌رله‌مانتار له به‌رامبه‌ر ئیوه وه‌ستاوم. رێگه ناده‌م بێ رێزی به‌م خه‌ڵكه بكه‌ن كه منیان هه‌ڵبژاردووه. خۆم له لێپرسینه‌وه به‌رامبه‌ر دادگایه‌كی دادپه‌روه‌ر و بێ لایه‌ن ناكێشمه‌وه و هێچ شتێكیشم بۆ لێپرسینه‌وه نییه.
له به‌رامبه‌ر كه‌سایه‌تییان هیچ گومانم نییه و بێ رێزیش ناكه‌م، به‌ڵام شانۆی ئه‌م دادگایه به بریاری ئه‌ردۆغان ده‌ستیپێكردووه و نابمه به‌شێكی. وه‌ڵامی هیچ پرسیارێكتان ناده‌مه‌وه و باوه‌ریم به هیچ چالاكییه‌كی دادپه‌روه‌رانه‌ی ئێوه نییه. لایه‌نی به‌رامبه‌ری سیاسه‌تمه‌داران سیاسه‌تمه‌دارن، نه‌ك دادگا. ئه‌وه‌ی كه ئێوه ده‌یكه‌ن پێشلكردنی مافی دیموكراسی و ده‌ستوور و رێكه‌وتننامه‌كانی نێوده‌وڵه‌تییه كه توركیا ئیمزای كردووه. هیچ داواكاری و چاوه‌ڕوانییه‌كم له ئێوه نییه، به‌هۆی چالاكییه سیاسییه‌كانم، ته‌نیا ئه‌وانه‌ی منیان هه‌ڵبژاردووه دتوانن لێپیرسینه‌وه‌م له‌گه‌ڵدا بكه‌ن.
ده‌میرتاش هه‌روه‌ها ئاماژه به بوونی فره زمانی، نه‌ته‌وه‌ی دیموكراتیك، فره كلتووری، دیموكراتیك و پاراستنی ژینگه و یه‌كێتی گه‌لانی توركیا له تورك، كورد، عه‌ره‌ب، ئه‌رمه‌ن، توركمه‌ن، چه‌ركه‌ز و هه‌روه‌ها ئاینه جیاوازه‌كان و ئاشتی و ئازادی ژنان له‌ناو هه‌ده‌په ده‌كات.
