ورده‌كارى رێككه‌وتنى پارتى و يه‌كێتى لە كۆنگرەیەكی رۆژنامەوانیدا باسكرا
دوای كوتایی ھاتنی كۆبوونەوەی پارتی و یەكێتی، وتەبێژانی ھەردوو حزب كۆنگرەی رۆژنامەوانایان سازكرد و ئاماژەیان بە ناوەرۆكی كۆبوونەوەكەكرد.
مەحمود محه‌مه‌د، گوته‌بێژى پارتى ديموكراتى كوردستان، رايگه‌ياند، له رێككه‌وتنى نێوان پارتى و يه‌كێتييدا، ئاليه‌تى چاره‌سه‌ركردنى كێشه‌كانى كه‌ركووك و دانانى وه‌زيرى داد له به‌غدا ده‌ستنيشان كراوون.
گوتيشى: گره‌نتى هه‌موو رێككه‌وتنێك، متمانه‌يه، ئه‌و متمانه‌يه له نێوانماندا هه‌يه.
هه‌روه‌ها گوتى: ليژنه‌يه‌ك بۆ جێبه‌جێكردن و چاودێريكردنى جێبه‌جێكردنه‌كه‌ى ده‌ستنيشان كراوه.
ئاماژه‌ى بۆ ئه‌وه‌شكرد، كاتێك رێككه‌وتنه‌كه چووه بوارى جێبه‌جێكردنه‌وه، خاڵ به خاڵى بۆ خه‌ڵك روون ده‌كرێته‌وه.
ئه‌مڕۆ له كۆبوونه‌وه‌ى نێوانياندا، هه‌ريه‌ك له پارتى ديموكراتى كوردستان و يه‌كێتى نيشتمانى كوردستان له‌سه‌ر دابه‌شكردنى پۆسته‌كان رێككه‌وتن.
دواتر له مه‌راسيمێكدا، هه‌ريه‌ك له نێچيرڤان بارزانى، جێگرى سه‌رۆكى پارتى و كۆسره‌ت ره‌سوڵ عه‌لى، جێگرى يه‌كه‌مى سكرتێرى گشتيى يه‌كێتى نيشتمانى كوردستان واژوويان له‌سه‌ر ده‌قى رێككه‌وتنى نێوانيان كرد.
