وەزارەتی ناوخۆ رێنمایی نوێ بۆ 18 ھەزار ئۆتۆمبێل دەردەكات
وەزارەتی ناوخۆی ھەرێمی كوردستان رێنمایی نوێ بۆ 18 ھەزار ئۆتۆمبێلی حكومی دەردەكات و 500 ئۆتۆمبێلی دیكەی حكوومەت دەفرۆشرێنەوە.
سامی جەلال، بریکاری وەزارەتی ناوخۆی هەرێمی کوردستان لە لێدوانێكی رۆژنامەوانیدا رایگەیاند: “رێنمایی نوێ لەبارەی ئەو ئۆتۆمبێلانە دەرچووە كە حكوومەتی ھەرێم سوودیان لێوەرناگرێت، تائێستا كارمان لەسەر 500 ئۆتۆمبێل كردووە، كە بەھیچ شێوەیەك حكوومەت سوودیان لێوەرناگرێت و مەسروفاتیان زۆرە”.
روونیكردەوە: “ژمارەیەك لەو ئۆتۆمبێلانە یان فرۆشراون بەو فەرمانبەرانەی ئۆتۆمبێلەكانیان لایە، یان لە رێگەی ئەو لیژنەیەی پێكھێنراوە بە شێوەی موزایەدە دەفرۆشرێنەوە”.
گوتیشی: “بابەتێكی دیكە رێكخستنی سوتەمەنییە بۆ ئۆتۆمبێلە حكومییەكان، بۆ ئەمەش سیستمێكی ئەلیكترۆنیمان پەیڕەو كردووە، بۆ ھەر ئۆتۆمبێلێك كارتی ئەلیكترۆنی دروست دەكرێت و بڕی پێویست دیاركراوە و ھیچ ئۆتۆمبێلێك ناتوانێ لەجیاتی ئەوی دیكە بچێتە بەنزینخانە و بەنزین وەربگرێت”.
سامی جەلال، راشیگەیاند: “ئێستا 18 ھەزار ئۆتۆمبێلی حكوومەت ھەیە و لۆگۆ لە دەرگای ئۆتۆمبێلەكان دەدرێت و بە ھیچ شێوەیەك نابێ لێ بكرێتەوە. ئەگەر تا 31/5/2019 ھەر ئۆتۆمبێلێكی حكومی نوسراوەكانیان ئاراستەی لیژنەی باڵا نەكرێت، بۆ دیاركردنی بڕی سوتەمەنی پێویست، گشت خەرجییەكانیان رادەگیرێت”.
ئاماژەی بەوەشدا: “یەكێكی دیكە لە بابەتە گرنگەكان مامەڵە كردنە لەگەڵ ئۆتۆمبێلەكانی خزمەتگوزاری دوای دەوام، لەمەودوا ئۆتۆمبێلەكان لە گۆڕەپانێك رادەگیرێن و كاتی ھاتن و چوونیان دەنوسرێت”.
باسی لەوەشكرد: “ھەر بەپێی رێنماییە نوێیەكان موەلیدەكانی دامودەزگاكانی حكوومەت بەكاردەھێندرێن و بڕی سوتەمەنی پێویستیش دیار دەكرێت”.
