یه‌كگرتووی ئیسلامی ساڵیادی دامه‌زراندنی پارتی دیموكراتی كوردستان پیرۆز ده‌كات

ئه‌نجوومه‌نی جێبه‌جێكردنی یه‌كگرتووی ئیسلامی كوردستان له‌ په‌یامێكدا، 75 ساڵه‌ی دامه‌زراندنی پارتی دیموكراتی كوردستان پیرۆز ده‌كات.

ده‌قی په‌یامی ئه‌نجومه‌نی جێبه‌جێكردنى يه‌كگرتووى ئيسلامى كوردستان:

به‌رێز جه‌نابی كاك مه‌سعود بارزانی
به‌ڕێزان مه‌كته‌بی سیاسی پارتی دیموكراتی كوردستان
سڵاو و رێز …

هاتنه‌وه‌ی ساڵیادی حه‌فتاو پێنج هه‌مینی دامه‌زراندنی پارتی دیموكراتی كوردستان له‌جه‌نابتان و مه‌كته‌بی سیاسی و سه‌ركردایه‌تی و سه‌رجه‌م ئه‌ندامانتان پیرۆز ئه‌كه‌ین..

هه‌روه‌ك ئه‌و ڕۆژه‌، ڕوداوێكی مێژووی خه‌باتی گه‌له‌كه‌مان بوو، هه‌روا ئه‌و ته‌مه‌نه‌ درێژه‌و ئه‌و پێگه‌یه‌ی كه‌ هه‌یه‌تی ئه‌ركتان گران ئه‌كات و ده‌خوازێ (پارتی) له‌ئاستی به‌رپرسیاریه‌تی و چاوه‌ڕوانیه‌كانی گه‌له‌كه‌ماندا بێ..

دۆخی ناوخۆی هه‌رێم و نه‌خشه‌ی سیاسی ناوچه‌كه‌و ئاڵنگاریه‌كانی به‌رده‌م ئه‌زمونه‌كه‌مان.. زیاتر پێویستی به‌ تۆكمه‌یی ناوخۆیی و ڕێكخستنه‌وه‌ی ناوماڵی كوردستانی و دابینكردنی بژێوی و ئاسوده‌یی كۆمه‌ڵگه‌یی هه‌یه‌..

پرۆسه‌ی چاكسازی و پاكسازی و ڕاستكردنه‌وه‌ی هه‌ڵه‌و ناڕێكیه‌كان و ڕیشه‌كێشكردنی گه‌نده‌ڵی به‌بێ یه‌كڕیزی و عه‌داله‌ت و یاسا سه‌روه‌ری و ئیراده‌ی سه‌ركردانه‌ ئه‌نجام نادرێ.. هه‌موو ئه‌م كارانه‌ زۆرتر ڕوبه‌ڕوی حزبه‌كانی ده‌سه‌ڵات و به‌تایبه‌ت پارتی دیموكرانی كوردستان ده‌بێته‌وه‌..

بۆیه‌ له‌م بۆنه‌یه‌دا وێڕایی پێشكه‌شكردنی پیرۆزبایی ده‌خوازین پارتی دیموكراتی كوردستان زۆرتر شان بداته‌ به‌ر به‌رپرسیاریه‌تی قۆناغه‌كه‌ و به‌رپرسانه‌تر مامه‌ڵه‌ی بكات..

ئێمه‌ له‌یه‌كگرتووی ئیسلامی كوردستان له‌پێگه‌ی خۆمانه‌وه‌ له‌ ئۆپۆزسیۆن هه‌رده‌م پاڵپشتی چاكسازی بوین و هاوكاری بێ به‌رامبه‌ری كۆششه‌كانی یه‌كڕیزی و ئاشته‌وایی و دژایه‌تی گه‌نده‌ڵی بوین و به‌رده‌وام باجی ئه‌و هه‌ڵوێستانه‌مان داوه‌.. چونكه‌ لای ئێمه‌ هه‌رێمی كوردستان به‌رهه‌می ڕه‌نج و تێكۆشانی هه‌موانه‌و ئه‌ركی پاراستن و په‌ره‌پێدان و به‌رگری لێكردنی له‌سه‌رشانی هه‌موانه‌..

هه‌ر له‌م بۆنه‌یه‌دا بۆ په‌یوه‌ندی دووقۆڵی یه‌كگرتووی ئیسلامی كوردستان و پارتی دیموكراتی كوردستان هیواخوازی به‌رده‌وامی و گه‌شه‌پێدانین..

جارێكی تر 16ی ئاب تان لێ پیرۆز بێت …

ئه‌نجومه‌نی جێبه‌جێكردنی
یه‌كگرتووی ئیسلامی كوردستان