فەلاح مشعەل، ڕۆژنامەنووسی ناسراوی عێراق: ئەگەر كوردستان بە دوژمنی خۆتان دەزانن، مافی چارەی خۆنووسینیان پێ بدەن
نووسەر و رۆژنامەنووسێكی ناسراوی عێراقی، بابەتێكی سەبارەت بە بڕیاری وەزارەتی دارایی عێراق بۆ نەناردنی مووچەی مووچەخۆرانی كوردستان و لێكەوتەكانی نووسیوە و ئاماژەی بۆ ئەوە كردووە، جێی داخە بژێویی یەك ملیۆن فەرمانبەری هەرێمی كوردستان ببێتە كارتی یاریی سیاسی دژی بە فەرمانبەرانی هەرێم، هەرگیز لە واقع و بەپێی دەستووریش ڕەوا نییە ملیۆنێك خێزانی كوردستانی لە مافەكانی ژیان بێبەش بكات.
فەلاح مشعەل، نووسەر و ڕۆژنامەنووسی عێراقی، بابەتێكی لە پێگەی خۆی لە تۆڕی كۆمەڵایەتیی (فەیسبووك) لەژێر ناونیشانی (كوردستانی عێراق، یان كۆنفدڕاڵیی عێراق؟) نووسیوە و ئاماژەی بۆ ئەوە كردووە: ”تەنگژەكانی نێوان بەغدا و هەولێر پەرە دەسێنن و ڕەنگە بگەن بە هێڵی كشانەوە لە پرۆسەی سیاسی. وەزارەتی دارایی عێراق دروستكەری تەنگژەی ئەمجارەیە، ئەویش بە بڕیاری نەناردن و بێبەشكردنی یەك ملیۆن فەرمانبەری هەرێمی كوردستان وەك كارتێكی فشار و هەڕەشە، كە هەموو جارێك حكوومەتی عێراق ئەو كارتە دژ بە حكوومەتی هەرێمی كوردستان بەرز دەكاتەوە.“
دەشڵێ: كرۆكی كێشەكە دەگەڕێتەوە بۆ نەبوونی یاسای نەوت و غاز، كە دەتوانێ پەیوەندی و شێوازی سامان و داهات لە نێوان بەغدا و هەولێر دابەش بكات. ئەو تەنگژەیە لە ساڵی ٢٠٠٧- ٢٠٠٨ دروست بوو، كاتێ حسێن شەهرستانی وەزیری نەوتی عێراق بوو، بە عینادییەوە مامەڵەی خراپی لەگەڵ بەرپرسانی كورد كرد.
ئەو نووسەر و رۆژنامەنووسە عەرەبەی عێراق هەروەها نووسیویەتی: ”ناكۆكییەكانی نێوان بەغدا و هەولێر زۆرن، هەندێكیان دەگەڕێنەوە بۆ نەڕەخساندنی بواری دیموكراسی و دەستووری و فیدڕاڵی، هەندێكیشیان پەیوەستن بە ململانێی دەرەكی و دەستوەردانی هەرێمی.
فەلاح مەشعەل دەشڵێ: جێی داخە بژێویی ملیۆنێك فەرمانبەری هەرێمی كوردستان ببێتە كارتی یاریی سیاسی دژی بە فەرمانبەرانی هەرێمی كوردستان، هەرگیز لە واقیع و بەپێی دەستووریش ڕەوا نییە ملیۆنێك خێزانی كوردستانی لە مافەكانی ژیانی بێبەش بكرێن.
ئەو نووسەرە ئەوەشی روون كردووەتەوە: بابەتەكە روونە كە عێراق دەیەوێ فشار بكاتە سەر هەرێمی كوردستان و حكوومەتەكەی تووشی ئیحراجی بكات، بەڵام پێویستە ئەوەش بزانێ كە حكوومەتی هەرێمی كوردستان دیلی دەستی حكوومەتی ناوەند نییە و ملكەچی ئەو بڕیارانە و تاكتیكەكانیان و گەمەی هەڵبژاردن و دابەشكارییەكان نابێ، پێدەچێ هەندێ لایەنی ناوخۆی عێراقی ئەو دیمەنەی هەرێمی كوردستان و گۆڕانكارییەكانی بەدروستی نەخوێندبێتەوە.
ئەم نووسەر و رۆژنامەنووسەی عێراق دەشڵێ: ”لە دیدی هێزە كاراكانی نێودەوڵەتییەوە، كوردستان خاڵی هاوسەنگیی عێراقە، ناوەندی ئاڵوگۆڕی سیاسییە لە عێراق، كاتێ دوای هەموو هەڵبژاردنێك روو دەكەنە هەولێر بۆ پێكهێنانی حكوومەتی نوێی عێراق، ئەو كوردستانەی كە بە جۆرەها ناو و ناتۆرە تۆمەتباری دەكەن، توانیویەتی ببێ بە نموونەیەكی پێشەكەوتوو بەسەر عێراقەوە لە بواری سەقامگیری و ئاسایش و خزمەتگوزارییەكان و دابینكردنی كارەبای ٢٤ كاتژمێری بۆ هاووڵاتییانی، لە كاتێكدا حكوومەتی عێراق شكستی خواردووە لە دابینكردنی سەرەتاییتریین خزمەتگوزارییەكان و ژیانێكی مرۆییانە بۆ هاووڵاتییان.
فەلاح مەشعەل لە كۆتایی نووسینەكەیدا روو دەكاتە بەرپرس و لایەنەكانی عێراق و دەڵێت: پوختەی قسە ئەوەیە، ئەگەر پێتانوایە هەرێمی كوردستان نیشتمانی هەموو عێراقییەكانە، دەبێ بە رێز و باشییەوە مامەڵە لەگەڵ كوردستاندا بكەن، بەو پێیەی بەشێكی جیانەكراوەیە لە مافی هاووڵاتیبوون لە عێراق. ئەگەریش بە دوژمنی خۆتانی دەزانن و پێتانوایە لایەنێكی ركابەرتانە و كێبركێتان لەگەڵدا دەكات لەسەر هێز و سامان و رۆڵی دەرەكی، ئەوا مافی چارەی خۆنووسینیان پێ بدەن، بۆ ئەوەی ببن بە دەوڵەتێكی كۆنفیدڕاڵی، نەچێتە ژێر هیچ فشار و هەراسانكردن و مامەڵەی دوژمنكارانە.
