نووسەرێكی عەرەب:پشتیوانی كردنی ده‌وڵه‌تی كوردی واته دۆستایه‌تی 40 ملیۆن كورد
خواكوڕك
نووسەرێكی عەرەبی عێراق لە وتارێكدا لە ژێر ناونیشانی “كوردستان لە پێناوی عێراق و عەرەب دا”ئاماژەی داوە، ئێمەی عەرەب 40 ساڵ دژی كوردەكان شەڕمان كرد و كیمیابارانمان كرد، بەڵام یەك كورد خۆی لە بەغدا نەتەقاندەوە،. هەروەها دەڵێ پێویستە دان بەو ڕاستییە دابنێن كوردەكان دۆزێكیان هەیە و بە دەسپێشخەری كردن و قبوڵكردنیان دۆستایەتی 40 ملیۆن كورد بەدەست دێنین.
عەلی بەدای نووسەری عەرەبی عێراق لە وتارەكەی دەڵێ، كەس هێندەی ئێمەی خەڵكی رۆژهەڵاتی ناوەڕاست دوور نین لە واقع. بۆ نموونە تەماشای ئێمەی عەرەب بكەن، كاتی خۆی نیوەی فەلەستینیان داینێ و گەرەنتی نێودەوڵەتیشی لەگەڵدا بوو، كەچی نەمانوویست، گوتمان هەموویمان دەوێ! دوایی هەمویمان لەدەستدا و دوای نیو سەدە هەموو عەرەب كۆبوینەوە و تكای دنیامان لە نەتەوە یەكگرتووەكان كرد ئەو نیوەیەمان پێ رەوا ببینن كە كاتی خۆی نەمانویست!. لەسەرینی ئەو هەڵوێستەشەوە كارەساتەكانی ئەیلولی رەشی ئۆردن و شەڕی ماڵوێرانكەری لوبنان و شكستی حوزەیران و شەڕی شومی عێراق ئێران و ملیۆنان كوژراو و ملیۆنان مناڵی بێ باوك دەسكەوتمان بوو!..
خۆمان لە دروستكردنی دەوڵەتانی ئارام و سەقامگرتوودا شكستمان خوارد، كەچی خەتاكەیمان خستە ئەستۆی دەرو دراوسێ و دنیای دەرەوە و تەنانەت ئاسمانیشمان خەتابار دەكرد و كەچی بۆ یەك جاریش لە ماڵی خۆماندا بۆ هۆكاری فەشەلی خۆمان نەگەڕاین. ئەرێ تاكەی چاومان دادەخەین و راستییەكان نابینین؟.
بەدای بەردەوام دەبێ و نووسیویەتی، ئەرێ تاكەی هەر خەریكی دروستكردنی دوژمن دەبین؟ من پرسیارێك لە عەرەب دەكەم دوور لە سیاسەت و دوور لە بارزانی و تاڵەبانی و مالكی و سەدام. پرسیارێكی ویژدانی كە هیوادارم هەر خاوەن ویژدانێك لێی وردبێتەوە پێش ئەوەی وەڵام بداتەوە، وای دابنێین واقعی عێراق بە پێچەوانەوە بوایە. واتا عەرەب نەتەوەی دووەم بونایە و كورد نەتەوەی یەكەم و باڵادەست. وای دابنێین كورد عەرەبی ئەنفال كردبایە و سەد و هەشتاو دوو هەزار عەرەبی بێ تاوانی لە سەماوە و حللە و رەمادی لەیەك رۆژدا كردبایە بەژێر گڵدا. بیهێننە بەرچاوی خۆتان كورد كیمیابارانی عەرەبی مەدەنیی بێگوناهی لە شەرگات كردبایە، تو ویژدانتان كاردانەوەی ئێوە چی دەبوو؟ با وەڵامەكەی بەجێبێڵین بۆ ویژدان زیندووان و دووبارە بگەڕێینەوە بۆ باسی واقیعەكە.
لەبەشێكی تری وتارەكەی دەڵێ، كاتێ دەوڵەتی عێراق داڕما و دڕندەكانی عەرەب و ئیسلام داخڵی عێراق بوون، لەو هەزاران چیچانی و سعوودی و یەمەنی و سوری و جەزاییری و مەغریبی و میسری و لیبی و سودانی و عیراقی سوننە و شیعەیە، چەند كورد خۆی تەقاندەوە؟ عێراق چل ساڵ لەگەڵ كورد لە شەڕدا بوو، بە درێژایی ئەو ماوەیە بەغدا سەدان هەزار كوردی هەواداری بارزانی لێ بوو،چەند تەقینەوە لە سەدر و كەرادە روویان دا؟ ئایا بیسستان كوردێك خەڵك بڕفێنێت و بەقەنناس نیشانە لە كەسێك بگرێتەوە؟ كوردێك تەقینەوەیەكی لە بازاڕێكدا كرد كە خوێن و گۆشتی بەشەر و ئاژەڵ و تەماتە و سێوی تێدا تێكەڵ بێت؟ ئەوە ئێمەی عەرەب بۆ پشت دەكەینە گوڵ و بەدوای خاشاكدا دەگەڕێین؟ بۆ هەر شەیدای زبڵخانە و تێكدان و وێرانكاریین؟. بۆ دەبێ هەموو جارێك بكەوینە داوی عەقڵ سوكی و توندرۆیی بەدەوی و خێڵایەتی خۆمان و بە (ها ها ها)یەك بوروژێین؟.
هەروەها نووسیویەتی، نەوت تێكیشكاندین، ژەهرخواردووی كردین،عەقلی لێ تێكداین و بە كوشتیداین، ئێستەش ئەو هەموو نەوتەمان هەیە لە بەسرە و كوت و ناسریە و رەمادی و موسل و دیالە، ئیتر بەس نییە. تاكەی بە كێشەی كوردستانەوە سەرمان دەیەشێنن، جگە لە دواكەوتنی خۆمان چ كێشەیەك لە دۆزی كورددا هەیە. ئەدی ئەم پێداگیرییە بێ جەدوایە چییە لەسەر پێكەوەژیانی شیعە و سوننە لە نیشتمانێكدا كە ناتوانین دروستی بكەین. ئەری مایەی پێكەنین نییە كە ئێمەی عەرەب بە بیانووێك دژی مافەكانی كوردین كە هەمان بیانوو بۆ بەرگری لە مافەكانی نەتەوەی خۆمان بەكاردێنین ؟. بۆ نموونە: ئێمە دژی سیاسەتی ئەمری واقع و بەجولەكەكردنی قودس و دروستكردنی موستەعمەرات و گۆڕینی واقعی دیمۆگرافی ناوچەكانی فەلەستینین، كەچی ئەو ئەمری واقیع و تەعریبە دەپەرستین كە سەدام لە ناوچە كوردییەكان كردی. ئەرێ خێرە ئێمە داوای مافی دیاریكردنی چارەنوس و دروستكردنی دەوڵەتی سەربەخۆ بۆ فەلەستینییەكان دەكەین و بەڵام بۆ كورد هەمان ماف بە كوفرو حەرام ئەزانین؟.باشە من لەوانە دەپرسم كە دژی فیدرالیزم و ماددەی سەدو چل بوون، بۆچی دژ بوون، بەدیلتان چی بوو؟ بۆچی خراپ بوو ئەگەر داوای سەركردایەتی كوردتان قبوڵ كردبایە كە پێیان وابوو بە جێبەجێكردنی ماددەی سەدو چل و پابەندبوون بە دەستوور، لە ناو كۆماری عێراقی دیموكراتیدا دەمێننەوە و نەوتیش دەبووە موڵكی هەموو خەڵكی عێراق؟ بۆچی كۆنگرەیەكی میللی گەورەتان نەبەست و تێیدا مەسعوود بارزانی بە ئاشكرا ئەو بەڵێنە بدات بە هەموو خەڵكی عێراق؟ بۆ مالكی دژی ئەم هەڵوێستە بوو، ئەی ئەو بەڵێنانەی لە هەولێر بە كوردی دا، بۆ خۆی لێ دزینەوە؟.ئێستاش مادام عێراقێكی فیدرالی شەراكەتمان ناوێت، تەنیا دوو رێگەمان لە پێشە: یان بگەڕێینەوە بۆ شەڕ و كۆمەڵكوژییەكەی جاری جاران كە هەموومان لەناو دەبات. یان رێگەی عەقڵ و مەدەنیەت هەڵبژێرین و تەسلیم بین بەو راستییەی كە دۆزێك هەیە بە ناوی دۆزی گەلی كورد و كێشەیەكی ئیقلیمییە و با ئێمەی عەرەبی عێراق دەسپێشخەر بین بۆ چارەسەركردنی و بەوەش دۆستایەتی چل ملیۆن كورد بۆ خۆمان مسۆگەر بكەین. كوردستان ناگوێزێتەوە بۆ مەریخ، لە جێی خۆی دەمێنێ و پەناش نابات بۆ ئیسرائیل كە هیچ پێوەندییەكی جوگرافی و مێژویی و ئابوری پێكیانەوە نابەستێ. كورد لەگەڵ ئێمە دۆست و دراوسێ و تێكەڵە، كورد بۆ سەقامگیریی ناوچەكە هەوڵ دەدەن. لەوەشدا دەیانەوێ لەگەڵیان بەشدار بین و بەرژەوەندی هەردولامان لەوەدایە. مێژوویش سەلماندویەتی كە ئەوان لە ئایندەدا دەستوەردان لە كاروبارماندا ناكەن و وەك برا نەتەوەیی و ئایینییەكانمان سەیارەی مینڕێژكراو و خۆكوژمان بۆ نانێرن. ئەوان كە دوژمانیەتیمان كردن، كاری وایان نەكرد، جا ئەگەر دۆستیان بین چی!.
ئاماژەی داوە، دەزانم ئێستا كەس گوێ لەم نەغمەیەی من ناگرێ و نێو هات و هاواری قەومەچییەكاندا بە نەشازی دەزانن، بەڵام من دڵم بۆ نامەردیی داعش لە مووسڵ و كردەوەكانی جەیشی ئیسرائیلی دژی فەلەستینییەكان و وێرانبونی سووریا و ئاگری رومادی و لەنێوچونی عێراق دەسوتێ. سەرم سوڕماوە ئێمەی عەرەب بۆ ئەم خزمەتە بەلاشانە پێشكەشی نەتانیاهۆ دەكەین! من دەزانم ئاوازەكەی من لە نێو جەوقەی عەرەبدا نەشازە، بەڵام مێژوو پێمان دەڵێ: هەر ئاوازە نەشازەكانی ئەمرۆیە سبەی دەبنە سرودی نیشتمانی. دەزانم ئەم وشانەی من حەسرەت دەبن لە دڵی نەوەكانی داهاتووماندا. وەك چۆن ئەوانەی پێش ئێمەش بە رەتكردنەوەی نیوەی فەلەستین حەسرەتیان كردە دڵی ئێمەوە و نائومێدیان كردین. وایانلێكردین لە ئەیلولێكی رەشەوە بەرەو ئەیلولێكی رەشتر بچین..تاكەی ئەی عەقڵمەندانی ئوممەتی عەرەب . تاكەی؟
