وەستا ڕەسوڵ: هیچ هێزێك ناتوانێت لە كەركووك ڕێگری لە ئەنجامدانی ڕیفراندۆم بكات

لەگەڵ نزیك بوونەوەی وادەی سازدانی ریفراندۆم لە باشوری كوردستان, ئێستا لە ناوچە كوردستانیەكانی دەرەوەی ئیدارەی كوردستان ئامادەكاری تەواو بۆ ئەم پرسە كراوە, فەماندەی میحوەری چوار لە باشووری كەركووك ڕای دەگەیەنێت، دەبێت ڕیفراندۆم لە شاری كەركووك ئەنجام بدرێت، هەروەها هیچ هێزێكیش ناتوانێت ڕێگری لە ئەنجامدانی ئەو پرۆسەیە بكات.
وەستا ڕەسووڵ، فەرماندەی میحوەری چواری لە باشووری كەركووك بە ڕاگەیاند: “تەنیا هێزی پێشمەرگە شاری كەركووكی پاراستووە و دەپارێزێت، نەك هیچ هێزێكی دیكە، بۆیە هەركەس و لایەنێك بیەوێت ڕێگری لە هەر شتێك بكات، كە بەرژەوەندیی كەركووكی تێدا نەبێت، ئەوا ڕێگەیان پێ نادەین، مەگە بەسەر لاشەی پێشمەرگەدا تێپەڕن”.

پێشتر حەشدی شەعبی ڕای گەیاندبوو لە شاری كەركووك كە ڕێگری لە ئەنجامدانی ڕیفراندۆم دەكەن، ئەو فارماندەیەی هێزی پێشمەرگە دەشڵێت: “قسەكانی حەشدی شەعبی بێ بنەما و زۆرییش نالۆژیكن، چونكە ئەگەر ڕیفراندۆم لە هیچ شوێنێك نەكرێت، دەبێت هەر لە كەركووك ئەنجام بدرێت”.
ڕوونیشی كردەوە، پێش هەموو ناوچەكان پێویستە ڕیفراندۆم لە ناوچە كوردستانییەكانی دەرەوەی ئیدارەی هەرێمی كوردستان بكرێت، چونكە دەستوور ڕێگەی بەو ڕیفراندۆمە داوە، كارێكی دەستوورییە، هەروەها لە یەكێك لە بەندەكانی مادەی 140ی دەستووری عێراقدا ئاماژە بەوە كراوە كە پێویستە لەو ناوچانەدا ڕاپرسی ئەنجام بدرێت، یەكلای بكرێنەوە.

وەسات ڕەسووڵ، سەركەوتنی پرۆسەی ڕیفراندۆمی سەربەخۆیی لە شاری كەركووك بۆ دەنگی خەڵك دەگەڕێنێتەوە و دەڵێت: “سەركردایەتیی سیاسیی كورد لە ڕابردوودا لە ئاستی خەڵكی كەركووك كەمتەرخەمی نواندووە، بەڵام لەگەڵ ئەوەشدا ئێمە بە هەموو توانامانەوە بەرگری لەو بابەتە دەكەین”.