هەڵگورد جوندیانی بۆ عومەری سەید عەلی دورە پەرێزیتان لە پرۆسەی ریفراندۆم زیان بە گۆڕان دەگەیەنێت
ئەمڕۆ چوارشەممە هەڵگورد جوندیانی نووسەر و بەڕێوەبەری گشتیی پێشووی ڕاگەیاندنی وەزارەتی ڕۆشنبیریی حكوومەتی هەرێمی كوردستان، نامەیەكی كراوەی بۆ عومەری سەید عەلی رێكخەری گشتیی بزوتنەوەی گۆڕان نووسیوە و پێی دەڵێ دوورەپەرێزی گۆڕان لە پڕۆسەی ریفراندۆمی سەربەخۆیی كوردستان، زیانێكی سیاسیی گەورە بە بزوتنەوەكە دەگەیەنێ.
جوندیانی كە نامە كراوەكەی لە هەژماری خۆیدا لە تۆڕی كۆمەڵایەتی فەیسبووكدا بڵاوكردووەتەوە، نووسیویەتی “ئێستە ئەركی گەورەی بزوتنەوەی گۆڕان لە ئەستۆی بەڕێزتاندایە و ئەوەش بەرپرسیارییەتی بەڕێزتان وەكو رێكخەری بزوتنەوەی گۆڕان و ئەو جەماوەرەش چ هەوادار و ئەندام بن یاخود دەنگدەری هەڵبژاردنەكان، هەمووی لە چوارچێوەی ئەو ئەركە قورسانەی جەنابتاندایە”.
بۆی نووسیوە “دوورەپەرێزی گۆڕان لە پڕۆسەی ریفراندۆمی سەربەخۆیی كوردستان بە هەر بیانوێكی پاك و مەشروعیش بێت، مەودایەك بزوتنەوەی گۆڕان لە نەخشەدانانی سیاسی ئێستە و ئایندەی كوردستان دوور دەخاتەوە ، دوور نییە بزوتنەوەی گۆڕان بێبەش و بێ توانا بكات لە پەڕینەوە بۆ قۆناخی دواتر، ئەوەش دەبێتە هۆی زیانێكی سیاسی گەورە بۆ بزوتنەوە بەڕێزەكەتان”.
هەروەها نووسیویەتی “لە هەموو مێژووی جیهانی دوور و نزیكدا، دامەزراندنی دەوڵەت هەرگیز پەیوەست نەبووە بە مەرجی بوونی شەفافیەت و حوكمی رەشید و نەزاهەت، بەڵكو هەمیشە رێكەوتی سیاسی و هەڵكەوتنی هەلی مێژوویی و وەچەرخانی رووداوە سیاسییەكان وایان لە سەركردە ئازاكان كردووە بڕیار بدەن و پشت بەو ئەگەرانە و بە توانای میللەتەكەیان ببەستن بۆ وەدەستهێنانی سەربەخۆیی و بونیادنانی دەوڵەت، بەڕێزیشتان دەزانن كە جیاوازی زۆر لە نێوان دەوڵەت و حكومەتدا هەیە”.
جوندیانی لە بەشێكی تری نووسینەكەیدا دەڵێ “ئەگەر ئێستە بزوتنەوەی گۆڕان وەكو ئۆپۆزسیۆنی سیاسی و پارێزەری بەرژەوەندییەكانی میللەت خۆی وێنا كردووە، ئەوا دەتوانێ هەمان رۆڵ لە چوارچێوەی دەوڵەتی سەربەخۆشدا بە گوڕ و تینێكی زیاتر ببینێ و دوور نییە لە هەڵبژاردنەكانی گشتیی دەوڵەتی كوردستانیشدا، متمانەی میللەتیش وەدەست بهێنێ بۆ دروستكردنی حكومەتێكی شەفاف و رەشید، كە دەمێكە بزوتنەوە بەڕێزەكەتان و تەنانەت لایەنەكانی تریش كە لە دەسەڵاتن، هەوڵی بۆ دەدەن. هەرگیز پێشبینی ئەوەش ناكرێت كە دەوڵەتی كوردستان دەوڵەتێكی دیكتاتۆری بێت، لەبەر زۆر هۆكاری ناوخۆیی و دەرەكی و ستراتیجی وڵاتە زلهێزەكانیش رێگر دەبن، تەنانەت ئیمزاكردنی دەوڵەتی كوردستانیش لەسەر میساقی نەتەوە یەكگرتووەكان و رێككەوتنە پاشكۆكانیشی زامنی پرسی حوكمی رەشید و شەفافن”.
هەروەها دەڵێ “جەنابی كاك عومەر… ئێستە كوردستان بەرەو ریفراندۆم دەڕوات و هەموو ئەگەرەكانیش ئەوەمان پێدەڵێن كە گەلانی كوردستان بە رێژەیەكی زۆر بەرچاو دەنگ بۆ سەربەخۆیی دەدەن و بێگومان لە هەمان كاتیشدا بەشێكی بەرچاویش بەنەخێر دەنگ دەدەن، كە من ئەوانیش بە كەسانی دڵسۆز دەزانم! بەڵام لە ئایندەدا و لەنێو دێڕەكانی مێژوودا ئەو خۆدوورگرتنە و هەڵوێستەی بزوتنەوەكەتان، بە كارێكی ئەرێنی تۆمار ناكرێت و دووریش نییە ئەم هەڵوێستە ببێتە هۆی پەراوێزبوونی بزوتنەوەی گۆڕان و ئینتحاربوونی سیاسی و كوژانەوەی لە مەیدانی كاریگەربووندا لەسەر نەخشەی سیاسیی كوردستان”.
لە كۆتاییشدا هیوای خستووە كە عومەری سەید عەلی وەكو سەركردەیەكی ئازا لە پاڵ سەركردەكانی تر و ئەو جەماوەرەش كە متانەی بە گۆڕان داوە، هەموو ئەو گرفت و كێشە و (غوبن)انە كە لە ئەنجامی ململانێی سیاسیدا دروست بوون، وەلا بنێن، وەكو چۆن بزوتنەوەی گۆڕان لە سەرەتادا بە مۆمێكی داگیرساوەوە هاتە مەیدان، ئاوەهاش بە هەمان مۆم و هەمان وزەوە رێگای سەربەخۆیی رۆشنتر بكەنەوە و ببن بە خاوەنی ئەو پرسە كە لە مێژوودا هەر یەك جار روودەدات و دووبارە نابێتەوە.
