سەركردەیەكی عێراقی: ئەمریكا و نەتەوە یەكگرتووەكان گڵۆپی سەوزیان بۆ سەربەخۆیی كوردستان هەڵكردووە

لەگەڵ نزیك بوونەوەی وادەی سازدانی ڕیفراندۆمی سەربەخۆیی كوردستان, حكومەتی عێراق چەند فشارێكیان بۆ پاشگەز بوونەوە لە بڕیارە دەست پێكردووە پێچەوانەی ئەو سەركردەعێراقیانە, سەركردەیەك پێی وایە كە ئەمریكاو نەتەوە بەكگرتووەكان گولۆپی سەوزیان بۆ سەربەخۆیی كوردستان هەلكردووە.
سادق مووسەوی، سیاسەتمەدار و چاودێری سیاسی عێراقی، ڕایگەیاند: “وەك شایەتیكی حەق، مەسعود بارزانی لە كۆنگرەی سەڵاحەدین كە لە ساڵی 1992 بەڕێوەچوو، خواستی سەربەخۆیی ڕاگەیاند، هەموو سەركردە سیاسییە بەشداربووەكانیش ئەوە زۆر بەباشی دەزانن”.
جەختیشی كردەوە، كە هەموو ئەوانەی بەشداری كۆنگرەكەیان كرد، لەسەر مافی گەلی كورد بۆ سەربەخۆیی، ڕەزامەندییان نیشاندا.
سادق موسەوی، گوتیشی: “من یەكێك بووم لە ئەندامانی ئەو شەش لیژنەیەی كۆنگرەی (لەندەن)مان لەگەڵ هەریەك لە برایان: هۆشیار زێباری، فوئاد مەعسووم، عادل عەبدولمەهدی، سەڵاح شێخلی، و نەبیل موسەوی ڕێكخست، من بە سیفەتی بەرپرسی مەكتەبی سیاسی بزووتنەوەی مەلیكی دەستووری، نوێنەری شەریف عەلی، بووم”.
لەبارەی هەڵوێستە نێودەوڵەتییەكان و وڵاتانی دراوسێ و عێراق، ئەو سیاسەتمەدارە عێراقیە، گوتی: “لەلایەن وڵاتە زلهێزەكان ونەتەوە یەكگرتووەكانیشەوە گڵۆپی سەوز بۆ سەربەخۆیی هەرێمی كوردستان هەڵكراوە، بەڵام ناكۆكییەكە لەگەڵ سەرۆكی هەرێم، تەنها لە بارەی وادەی ڕیفراندۆمەوەیە”.
لەبارەی بۆچوونی خۆی وەك چاودێر و شرۆڤەكارێكی سیاسی، گوتی: “من بۆ خۆم وای دەبینم، كە پێویستە برا كوردەكانمان ڕاستەوخۆ گفتوگۆ لەبارەی سەربەخۆییەوە بكەن، تەنانەت بە بێ ڕیفراندۆمیش، كە دەزانین ئەنجامەكەی چۆنە، هیچ كەسێك لە جیهان و لە عێراقیش نازانن گەلی كورد چەند تینووی سەربەخۆیین، بەڵام گرێكە ئایندەی ئەو سەربەخۆییەیە لە پەیوەندییەكانی لەگەڵ عێراق، ئایا پرۆژەیەكی كۆنفیدڕاڵی دەبێت، یان دەوڵەت لەگەڵ دەوڵەت”.
بەدووریشی زانی دوای ڕیفراندۆم توركیا و ئێران هێزی سەربازیی دژ بەهەرێمی كوردستان بجووڵێنن، گوتیشی: “پێدەچێت لە ڕووی ئابوورییەوە بۆ ماوەیەك فشار بخەنە سەر كوردستان، سەبارەت بە وڵاتە زلهێزەكانیش، ئەوان ناچار دەبن دان بە واقعەكەدا بنێن و هەوڵیش بدەن دەستكەوتی زیاتر لەو وڵاتە تازە لەدایكبووە، بەدەست بهێنن”.

لەبارەی بەحكوومەتی عێراقیشەوە، سادق موسەوی، گوتی: “من ئاماژەیەكتان پێدەڵێم كە لە زۆربەی لایەنەكانەوە بەدەستم گەیشتووە، هیچ مەترسییەك بۆ سەر ڕیفراندۆم دروست ناكەن، تەنانەت بۆ سەربەخۆییش، بەڵام تەنها كێشەیەك لە پرسی كەركووك وناوچە (كوردستانییەكانی دەرەوەی ئیدارەی هەرێم) هەیە، كە ڕەنگە بگاتە ئاستی ڕووبەڕووبوونەوەش، دواجار فشاری ئەمریكا و ئێران حكوومەتی عێراق ناچار دەكات پەنا بۆ لایەنی ئابووری ببات، بێگومان ئەوەش كاریگەری خۆی هەر دەبێت”.