رایان كرۆكەر لەسەر ریفراندۆم رەخنە لە ئیدارەی ترەمپ دەگرێت
رایان كرۆكەر لای زۆربەی سیاسەتمەدارەكانی عێراق كەسێكی ئاشنایە. بۆ ماوەی دوو ساڵ لە 2007 – بۆ 2009 باڵیۆزی ئیدارەی جۆرج دەبلیو بۆش بوو لە عێراق. كرۆكەر ئەمڕۆ هاتووەتە ریزی رەخنەگرانی ئیدارەی ترەمپەوە بەرامبەر ریفراندۆم سەربەخۆیی كوردستان.
رایان كرۆكەر دەڵێت “ئێستا رەخنەگرتن لە ریفراندۆم و ئەنجامەكەی خزمەت بە هیچ كەس و لایەنێك لە عێراق و لەڕاستیدا ناوچەكەش ناكات. پێویستە بزانین دەتوانین چی بكەین تا ئەو پرۆسەیەی لەپێشە پرۆسەیەكی بێگرفت و سەقامگیر دەبێت. دەبێت كاریگەریمان بۆ ئەوە بەكاربهێنین”.
رایان كرۆكەر ئەو قسانەی رۆژی سێشەممە لەنێو كۆنگرێسی ئەمریكا بۆ (كەناڵی رووداو) كردووە, سەبارەت بە بەیاننامەیەكی وەزیری دەرەوەی ئەمریكا، رێكس تیلەرسن، كە گشپترسی كوردستان و ئەنجامەكەی بە ناشەرعی ناودەبات.
كرۆكەر كەسایەتییەكی سەربەخۆییە كە هەم دیموكراتەكان و هەم كۆمارییەكان گوێی بۆ دەگرن و رێزی لێدەگرن. هەرچەندە لەسەردەمی ئیدارەی بۆشدا باڵیۆز بوو، كە ئۆباما هاتە سەر دەسەڵات دووری نەخستەوە، بەڵكو كردییە باڵیۆز لە ئەفغانستان.
كرۆكەر روونیكردەوە كاتێك باڵیۆز بوو لە بەغدا دژایەتی كوردستانێكی سەربەخۆی كردووە، كارێك كە ئەمڕۆ تاڕادەیەك پەشیمانە لێی.
كرۆكەردەشڵێت “ئەو كاتەی كە من لەوێ بووم، ئامۆژگاری هاوڕێ كوردەكانم كرد كە زۆر وریابن لە ئەنجامدانی كارێكی لەو شێوەیە. بەڵام ئەوە كاتێك بوو كه نزیكەی 180 هەزار سەربازمان له وڵاتەكەدا هەبوو. بەداخەوە نەك تەنیا هێزەكانمان كشاندووەتەوە، بەڵكو بەشدارییەكی جددی سیاسیشمان لەوێ نەماوە. ئەوەی خوازیارم بمانكردایە ئەوەبوو كە بمانگووتایە ئەم بڕیارانە بۆ عێراقییەكان لەمبەر و ئەوبەری هێڵی سەوز بیدەن. ئێمە ئامادەین ئاسانكاری بۆ ئەنجامدانی گفتوگۆ بكەین ئەگەر لایەنەكان بیانەوێت ئێمە رۆڵبگێڕین”.
ئەم هەفتەیە كرۆكەر و چەند پسپۆڕێكی دیكەی ناسراو بانگهێشتی كۆنگرێس كرابوون تاوەكو راوێژیان پێبكەن بۆ داڕشتنی سیاسەتی نوێی ئەمریكا دوای داعش و ریفراندۆمی كوردستان له عێراق. یەكێك لە پسپۆڕەكان پێشنیازی هێشتنەوەی هێزێكی ئەمریكای كرد كە ئەركی تەنیا سەربازی نەبێت.
كێن پۆڵاك، لێكۆڵەری باڵای پێشووی سی ئای ئەی دەڵێت “پێویستە هێزێكی ئەمریكا لە وڵاتەكە بمێنێتەوە. ئەركی هێزەكە بەشێوەیەكی سەرەكی سیاسی دەبێت. هەندێك ئەركی سەربازیشی لەسەر دەبێت كە دەتوانێت و دەبێت بیانكات. بەڵام دەبێت جەخت بكەینە سەر رۆڵە سیاسییەكەی وەكو گرنگترین رۆڵ. دەبێت عێراقییەكان دڵنیابكاتەوە كە هێز لە دژیان بەكارنایەت، جا چ ئەو هێزە هی حكومەتی خۆیان بێت یاخود گروپە نیمچە حكومییەكان”.
هەبوونی بنكەیەكی سەربازی ئەمریكا لە عێراق مەسەلەیەكە كورد هەمیشە پێشوازی لێكردووە، هەرچەندە سیاسییەكانی عێراق لەژێر كاریگەری ئێراندا بەتووندی دژایەتی ئەو دەستپێشخەرییەیان كردووە.
