له‌سه‌ر پێشمه‌رگه به‌توندی وه‌ڵامی مالكی ده‌درێته‌وه
خواكوڕك
نوری مالكی سه‌رۆكی حزبی ده‌عوه‌ی عێراقی، كه به‌سه‌ركرده‌یه‌كی نه‌یاری كورد هه‌ژمارده‌كرێت، له‌چه‌ند هه‌وڵێكیدا نیگه‌رانی خۆی به به‌رپرسه ئه‌مریكه‌كان له‌باره‌ی پێشره‌ویه‌كانی پێشمه‌رگه به‌ره‌و موسڵ راگه‌یاندبوو، سه‌رۆكی فراكسیۆنی پارتییش له په‌رله‌مانی عێراق ده‌ڵێت، “پێشمەرگە نەگەیشتوەتە ئەو شوێنانەی کە پێش هاتنی داعش سنووری بووە”.
دوای ئه‌وه‌ی له‌نێو هه‌ندێك لایه‌نی عێراقی ناره‌زایی له‌باره‌ی پێشره‌ویه‌كانی پێشمه‌رگه به‌ره‌و موسڵ بڵاوبووه‌وه، له نێویاندا مالكی و حه‌نان فه‌تلاوی و حزبی ده‌عوه، زۆرتریان لێدوانیان له‌و باره‌یه‌وه داوه و هه‌وڵی دروستكردنی ئاسته‌نگ له‌به‌رده‌م به‌ره‌و پێشچوونه‌كانی پێشمه‌رگه‌ده‌ده‌ن.
ئەمرۆ شەممە، (10\9\2016) خەسرۆ گۆران، سەرۆکی فراکسیۆنی پارتیی دیموکراتیی کوردستان، لە ئەنجوومەنی نوێنەرانی عێراق، بە (باسنیوز)ی راگەیاندووه: پێشمەرگە نەگەیشتوەتە ئەو شوێنانەی کە پێش هاتنی داعش سنووری بووە، هێشتا بەشێکی زۆر سنووری کودستان، ماوە کە پێش ئەوەی داعش بێت پێشمەرگەی لێ بووە و تائێستا پێشمەرگە نەیگرتووەتەوە، بۆیە قسەکانی نووری مالیکی، هیچ بنەمایەکی بۆ نییە، هیچ پێشرەوییەکی نوێ نییە، ئەمەریکییەکان پێش نوری مالیکیش، دەزانن پێشمەرگە و سوپای عێراق لەکوێ بووە.
ئه‌و ئه‌ندام په‌رله‌مانه‌ی پارتی ده‌شڵێت، “ئێمە خاکی هیچ لایەکمان داگیر نەکردووە، و خاکی هیچ لایەنێکیش داگیرناکەین، بەڵام ئەوە ماوەیەکە سەرانی حزبی دەعوە، لەسەر راگەیاندنەکان بانگەشەی ئەوەدەکەن، (دەبێت پێشمەرگە سنووری بۆ دابنرێت و باسی گۆڕینی دیمۆگرافیایی ناوچەکان دەکرێت)، لە کاتێکدا کورد دیمۆگرافیایی هیچ لایەنێکی نەگۆڕیووە و نایکات، نە لە کەرکووکو نە لە شوێنەکانی دیکە، بەپێچەوانەوە ئەوەی کراوە، دیمۆگرافیای کوردە گۆڕاوە، کورد دەیەوێت، ئەو شوێنە کورد نشینانە رزگاربکاتەوە، کە ئێستا لەژێر دەستی داعشدان، دواتر خۆیان بڕیار دەدەن سەر بەچ لایەنێک بن و بەشێوەیەکی ئازاد بڕیار خۆیان بدەن”.
خه‌سره‌و گۆران، له‌باره‌ی ده‌ربڕینه‌كانی مالكی و حزبه‌كه‌ی له‌سه‌ر مه‌ترسیه‌كانی دابه‌شكردنی عێراق، رایده‌گه‌یه‌نێت، “مووسڵ موڵکی مالیکی و غەیری مالیکی نییە، مووسڵ خاکی عەرەب و کوردە، هیچ نووسرێکی پیرۆز لەو عێراقە نییە، بڵێت، سنوور ناگۆڕێت، لەوەتەی عێراق دامەزراوە تائێستا هەر سەرۆکو مەلیکێک، بە ئارەزووی خۆی گۆڕانکاری کردووە، کەی سەڵاحەدین، پارێزگاربووە؟ ئەی بۆ ناگەرێتەوە بۆ ئەو شوێنانەی کە پێشووتر لەسەری بووە؟، دووزخوورماتوو، بۆ دابڕێنرا و لکێنرا بە سەڵاحەدیننەوە؟”.
