چاودێرێکی سیاسی:دوو سیناریۆ ئاشكراده‌كات كه پێشمەرگە پێی ده‌گه‌ڕێته‌وه ناوچه داگیركراوه‌كان
له‌گه‌ڵ دروست بوونی بۆشایی ئه‌منی له ناوچه‌داگیركراوه‌كان و زیاد بوونی نا ئارامی ئێستا له هه‌ر كاتێك ده‌نگی گه‌ڕانه‌وه‌ی پێشمه‌رگه بۆ ئه‌و ناوچانه ده‌بیسترێت, شاره‌زایه‌كی سیاسیش له‌باره‌ی گه‌ڕانه‌وه‌ی پێشمه‌رگه بۆ كه‌ركووك و ناوچه كوردستانییه داگیركراوه‌كان، ئاشكرای ده‌كات، دوو رێگەچارە لەبەردەم دەسەڵاتدارانی بەغدا هەیە، لە هەردوو حاڵەتەكه‌شدا پێشمەرگە براوە دەبێ، هاوكات بۆ ئه‌مریكا و ڕووسیا و ئێران و توركیاش، باشتروایه كه‌ركووك له میلیشیا شیعه‌كان ڕزگار بكرێت.
ته‌نیا كوردی، نووسه‌ر و چالاكوانی كورد، له وتارێكیدا له‌باره‌ی دۆخی كه‌ركووك و گه‌ڕانه‌وه‌ی پێشمه‌رگه بۆ ناوچه داگیركراوه‌كان، له په‌یجی تایبه‌تی خۆی له فه‌یسبووك، نووسیویه‌تی: “دوو رێگەچارە لەبەردەم دەسەڵاتدارانی بەغدا هەیە بۆ ناوچە داگیرکراوەکانی کوردستان، یان دەبێ ڕازی بن داعش و قاعیدە و سوونەی پڕچەککراو داگیریان بکات، یان دەبێ رێگە بدات پێشمەرگە بگەڕێتەوە”.
جه‌ختیش ده‌كاته‌وه، كه لە هەردوو حاڵەتەدا پێشمەرگە براوە دەبێ، لە ئەگەری یەکەمیاندا بەهێز پێشمەرگە دەتوانێ وەریبگرێتەوە، لە دووەمیاندا بە ئاشتی دەتوانێ وەری بگرێتەوە.
ئه‌و نووسه‌ره، كه شاره‌زای سیاسه‌تی ناوچه‌كه‌یه، ئاماژه‌ی به‌وه‌ش داوه، كه ئەمەریکا پێویستی بە گەڕانەوەی پێشمەرگە بۆ ناوچه كوردستانییه داگیركراوه‌كان هەیە، هۆكاره‌كه‌شی بۆ ئه‌وه گه‌ڕاندووه‌ته‌وه، كه: “لە هێڵی 47ی نێوده‌وڵه‌تی لە شنگال تا بەکەرکوودا تێپەڕ دەبێ و دەچێتە خانەقین، بۆ ئەمەریکا گرینگە ئەو ناوچەیە ئیدی پێشمەرگەی لێ بێ”.
هه‌روه‌ها وه‌ك نووسه‌ر نووسیویه‌تی: “بۆ بەریتانیا زۆر گرینگە ئەگەر بیەوێ وەبەرهێنان لە نەوتی کەرکووکدا بکات و شاره‌كه ئارام بێت، دەبێ پێشمەرگەی لێ بێت، ئەگەر پێشووتر بەریتانیا دژی کورد لە کەرکووک جوڵەی دەکرد، ئێستا دۆخەکە پێچەوانەیە و سەردانی شاندەکانی بەریتانیاش بۆ هەرێم روونە”.
له‌لایه‌كی تریشه‌وه، بۆ فەرنسا زۆر گرینگە ئەگەر بیەوێ بێتە دەشتی نەینەواو، لەوێ وەبەرهێنان لە کەرتی وزەدا بکات، بەڵام: “وەک هەمیشە گوتوومە پێویستە کورد خۆی دەستی فەرەنسا بگرێ و رایکێشێتە نێو ناوچەکە”.
به‌بۆچوونی نووسه‌ره‌كه، بۆ رووسیایش گرینگە ئەگەر بیەوێ “رۆسنەفت” بچێتە قووڵایی کێڵگەنەوتییەکانی کەرکووک و ناوچە کوردستانییەکانی دیکە، بۆ ئێرانیش گرینگە چونکە ئەوان دەزانن، کە هەندێ ناوچە لایان هێڵی سوورە گه‌ر سوونەی لێ بەهێز بکرێت، بۆیە لە ئێستادا لە نێوان بژاردەی سوونە و کورددا بۆ ئێران بە دڵنیاییەوە کورد هەڵدەبژێرن.
گه‌ڕانه‌ویه پێشمه‌رگه بۆ كه‌ركووك، وه‌ك شاره‌زاكه نووسیویه‌تی، بۆ بەغداش گرینگە، چونکە هاوسه‌نگیی هێز لەم کاتەدا بەهۆی پێشمەرگەوه، دەبێتە هۆکارێک بۆ سەقامگیری شیعە و سوونە و کورد لە عێراقدا. هاوكات بۆ تورکیاش روونە، کە ئەگەر بیەوێ لە کەرتی وزەی هەرێمدا سوودمەندی بەردەوام بێ، دەبێ گەڕانەوەی پێشمەرگەی قبووڵ بێ، ئەمەش زیاتر لە هۆکارێکی هەیە.
