یەكێتی هانا بۆ پارتی دەهێنێت و داوای گفتوگۆی لێدەكات
دوای ئەوەی ئەمڕۆ مەكتەبی سیاسیی یەكێتیی كۆبووەوە , یەكێتی رێككارەكانی دەستپێكردنی گفتوگۆ لەگەڵ پارتی و لایەنە سیاسیەكانی دیكەی هەرێمی كوردستان, پرسی پێكهێنانی كابینەی نوێی حكومەتی هەرێمی كوردستان تاوتێكراوە.
بەپێی هەواڵێكی ماڵپەری فەرمی یەكێتی لە كۆبوونەوەكەدا بارودۆخی سیاسی عیراق و پێشهات و گۆڕانكارییەكانی ناوچەكە هەڵسەنگێنراوە، جەخت لە شەراكەتی ڕاستەقینە لە حوكمڕانی و جێبەجێكردنی دەستوور كراوەتەوە، هەروەها دووپاتی ئەوەش كراوەتەوە كە لە قۆناغی نوێ سیاسی و حوكمڕانی عیراق بەگفتوگۆ و لەژێر رۆشنایی دەستوور كێشەكانی نێوان هەرێم و ناوەند چارەسەر بكرێت.
ماڵپەڕەكە ئاماژەی بۆ ئەوەش كردووە كە یەكریزیی لایەنە سیاسییەكان و رێكخستنەوەی نێوماڵی كوردستان تەوەرێكی تری كۆبونەوەكە بووە و لەمبارەیەوە جەختكراوەتەوە، كە باشترین رێگاش بۆ ئەو مەبەستە گفتوگۆی بەرپرسیارانەیە لەنێوان یەكێتی و پارتی و لایەنە سیاسیەكانی تری كوردستان، بۆ پێكهێنانی كابینەی نوێ، یەكێتی لەم رووەوە هەنگاو دەنێت بۆ رەخساندنی زەمینەی لەبار بۆ دەستپێكردنی گفتوگۆكان.
