یه‌كێتی له‌وپه‌ری بێ ئیداره‌ی دا باسی دووئیداره‌ی ده‌كات
رێكان سه‌باح
جارێكی تر یه‌كێتی كۆبوونه‌وه‌ی نێوان خۆی و پارتی هه‌ڵپه‌ساردوو به‌وه‌ڤدێكى بێ ئه‌مه‌ڵ رووی كرده‌وه به‌غدا، به‌مانشێتی سه‌ردانێكی ئامانجدار به‌رگوێی خه‌ڵكی خست، یه‌كێتی له‌میدیا ژنراوێژكاره‌كان و میداكانی خۆیدا، پێناسه‌ی ئه‌م سه‌ردانه‌ی به هه‌ره‌شه‌ی دوو ئیداره‌ی ده‌خاته روو، ئه‌م هه‌ره‌شه و گوره‌شانه‌ی یه‌كێتی دوای ئه‌وه دێت، كه یه‌كێتی له‌هه‌ردوو دانووستاندنه‌كانی دا (مه‌لا به‌ختیار) گوته‌نی، له هه‌ولێر و به‌غدا شكه‌ستی هێناوه نه‌یتوانیوه، ئه‌و ئامانجانه‌ی كه له‌ژێر ناوی سیاسه‌تی نوێی یه‌كێتی و سه‌رده‌می نه‌وه‌ی دووه‌می تاڵه‌بانی، به ئه‌نجام بگه‌ێنێت”.
ئێستا كه یه‌كێتی له‌دوای خیانه‌تی گه‌وره و ره‌شی 16ی ئۆكتۆبه‌ردا ده‌ژیت، په‌لخوركێی سیاسی گرتووه ناتوانێت هه‌نگاوێكی واقیعانه بنێت، ده‌یه‌وێت له‌ژێر ناوی كه‌له‌گایی سیاسی له‌وپه‌ری لاوازی دا ده‌سته‌به‌ری زۆرخوازیه‌كانی بكات، له‌وه‌ها دۆخێكدا گوێچكه‌ی كۆمه‌ڵانی خه‌ڵكی كوردستانی جارێكی تر به پارچه‌كردن و پچراندنی ئیداره پڕكردووه، بۆ ئه‌وه‌ی هه‌ره‌شه و گوره‌شه‌كانی بكاته كارتێكی تری نێو دانووستاندنه‌كان، به‌ڵام یه‌كێتی له‌وه‌دا بێ خه‌به‌ره سه‌ردانه دوور دیاره شكه‌ستخواردووه‌كه‌ی به‌غدا، هه‌ڵومه‌رجی دانووستاندن و داواكاریه‌كانی له هه‌ولێر لاوازتر و بێ روحتر ده‌كات، ئه‌و په‌ڵهاوێشتنه‌ی له ناوه‌خۆی كوردستان، بێ ماناتر ده‌بێت، چۆكشاوانه‌تر ده‌چێته‌وه سه‌رمێزێك كه ئه‌سته‌مه بتوانێت له‌گه‌ڵ پێش سه‌ردانه‌كه‌ی بۆ به‌غدا، هه‌نگاو بنێت”.
به‌غدا به‌درێژایی مێژوو كێشه‌ی له‌گه‌ڵ كورد له‌سه‌ر كه‌ركووك بووه، هیچكاتێك به‌غدا له‌سنوری سێ شار دا ” هه‌ولێر و سلێمانی و دهۆكدا” كێشه‌ی نه‌بووه، به‌تایبه‌تی ئه‌م به‌غدایه‌ی ئێستا كه ئاماده‌ی پێدانی پۆستێكی نیه به یه‌كێتی، هیچكات له‌گه‌ڵ سه‌رلێشێواوی یه‌كێتی دا، ناچێته ژێر هێڵی به‌زاندنی ده‌ستوور و سلێمانی له بێ ئیداره‌ی ناوه‌خۆی یه‌كێتی دا به ئیداره بكات، بۆیه سه‌ردانه‌كه‌ی بۆ به‌غدای یه‌كێتی له‌بێ ئه‌مه‌ڵ بوون له هه‌ولێر دێت، به‌شكه‌ستیش له به‌غدا سه‌رده‌رده‌هێنێت”.
واقیعی حاڵی یه‌كێتی دوای خیانه‌تی 16ی ئۆكتۆبه‌ر، پێداچوونه‌وه و به‌سزاگه‌یاندنی خیانه‌تكاران بوو، به‌ڵام یه‌كێتی بێ ئاگا له‌دۆخ و قۆناغی سیاسی له‌ژێر فێل و كلاونان له‌سه‌ر خۆی ” به‌حه‌ویجه هێشتنه‌وه‌ی ده‌نگه‌كانی له‌كه‌ركووك، به پاڵدانی ده‌رگای بنكه‌كانی ده‌نگدان له سلیمانی و پچراندنی په‌یوه‌ندی كۆمسیۆنی كوردستان به سلێمانی، له هه‌ڵبژاردنه‌كانی عێراق و كوردستان، پێناسه‌ی نه‌وه‌ی دووه‌می تاله‌بانی و سه‌رده‌می نوێی یه‌كێتی كرد، به‌ڵام بێ خه‌به‌ر له‌وه‌ی كه یه‌كێتی دۆخ وێرانی ناو گۆره‌پانه‌كه‌یه و وێنای راستی یه‌كێتی فێرژنه كۆمیدیاكانی زاری سه‌عدی پیره‌یه”.
یه‌كێتی كه ئێستا له‌وپه‌ری بێ ئیداره‌ی دایه، ناتوانێت كه‌سێك بۆ پۆستێك دیاری بكات له‌نێوان بێگه‌رد و رێواسدا جۆشداماوه، بانگه‌شه‌ی دوو ئیداره‌ی ده‌كات!! ئه‌م پارادۆكسه‌ی كه یه‌كێـتی له‌میدیاژنراوێژكاره‌كاندا ده‌خاته روو ته‌نها خۆی پێ به‌باوه‌رهاتووه، نه‌ك كۆمه‌ڵانی خه‌ڵك، هه‌موو خه‌ڵك ده‌زانێت یه‌كێتی شه‌ڕی مانه‌وه ده‌كات، به‌ڵام مانه‌وه‌ی یه‌كێتی به عه‌قلێكی نوێ و سه‌رده‌میانه به‌ركار ده‌بێت، نه‌ك به هه‌ره‌شه و گوره‌شه‌ی هه‌رزه‌كار و كه‌له‌گایی، ئایا یه‌كێتی له‌وه‌ها دۆخێك دایه كه په‌ی به قۆناغێكی نوێی خۆی ببات له سیاسه‌تدا، كه‌هاوتای قۆناغی سیاسی كوردستان و عێراق و ناوچه‌كه بێت؟ بێگومان ئه‌گه‌ر به‌دوای ئه‌و وڵامه‌دا بگه‌رێین، دووچاری یه‌ك ئاماژه ده‌بین، كه ئه‌ویش ته‌نها ئه‌و دیمه‌نه‌یه، كه پاڤێلی تاڵه‌بانی كه له‌به‌رده‌م میدیاكاندا دانی به واژووی سه‌ركردایه‌تی یه‌كێتی كرد، له فرۆشتنی كه‌ركووكدا، ئێستا سێ جار به‌كه‌ركووك، پێناسه‌ی سیاسه‌تی پارادۆكسی یه‌كێتی ده‌كات، به‌مه‌ش تێده‌گه‌یت كه یه‌كێتی چه‌ند ره‌نج به خه‌ساره”.
