یۆنان هەڕەشە لە توركیا دەكات دەڵێت گورزی كەمەر شكێنی لێ ئەوەشێنین
دوای ئەوەی فڕۆكە جەنگەیەكانی توركیا گێچەڵیان بە فڕۆكەی سەرۆكی یۆنان كرد لەو كاتەی كە دەیویست بەرەو دوورگەیەك لە دەریای ئیجە گەشت بكات لە بەرامبەر ئەو مامەڵەیەی توركیا یۆنان رایگەیاند، هەنگاوێكی بەهێزیان دژی توركیا گرتووەتە بەر
گوتەبێژی حكومەتی ئەسینا، ئیدانەی هەوڵەكەی توركیای كرد و راشیگەیاند، هەنگاوێكی بەهێز لە دژی توركیا دەگرینە بەر.
لە رۆژی سەربەخۆیی یۆناندا، یۆنانییەكان ئاهەنگی یادی سەربەخۆییان كردەوە، كە لە 1821 لە دەست دەوڵەتی عوسمانی بەدەستیان هێنابوو.
لەو سەروبەندەدا فڕۆكەكانی توركیا بە نزیكی ئەو هێلیكۆپتەرەدا فڕین، كە سەرۆك وەزیرانی یۆنانی دەگواستەوە بۆ دوورگەیەكی باشووری خۆرهەڵاتی دەریای ئیجە.
ئێوارەی رۆژی دووشەممەی رابردوو، سەرۆك وەزیرانی یۆنان لە بەیاننامەیەكدا، بە تەنزێكەوە رایگەیاند، پێدەچێت فڕۆكەكانی توركیا ویستبێتیان لە جەژنی سەربەخۆیی و نیشتمانی یۆناندا بەشداری بكەن.
یۆنان بەردەوام توركیا بە پێشێلكردنی سەروەری و ئاسمانی هەرێمایەتی وڵاتەكەی تۆمەتبار دەكات.
سەرچاوەیەكی دیپلۆماسی یۆنانی رایگەیاند، دوێنێ سێشەممە باڵیۆزی توركیا لە ئەسینا بانگ كراوە بۆ وەزارەتی دەرەوە و نامەی ناڕەزایی پێدراوە.
لە نیسان/ ئەپریلی 2018دا فڕۆكەوانێكی یۆنانی بە هۆی تێكشكانی فڕۆكەكەی لە ئاسمانی دەریای ئیجە گیانی لەدەستدا. ئەوەش دوای ئەوە هات، كە ئەو فڕۆكەوانە لە راونانی فڕۆكە جەنگییەكانی توركیا لە ئاسمانی وڵاتەكەی دەگەڕایەوە.
دوورگەی ئیمیا، بووەتە جێی ناكۆكی توركیا و یۆنان و لە 1996دا هەردوو وڵات بە هۆی ئەو دوورگەیەوە لە رووی سەربازییەوە رووبەڕووی یەكدی وەستانەوە.
سەرچاوە: فرانس24
