وه‌زیری ته‌ندروستی عێراق نامه‌ی ده‌ستله‌كاركێشانه‌وه‌ی پێشكه‌شی سه‌رۆكوه‌زیران كرد
وه‌زیری ته‌ندروستی و ژینگه‌ی عێراق، عه‌لائه‌دین عه‌لوان نامه‌ی ده‌ستله‌كاركێشانه‌وه‌ی پێشكه‌شی سه‌رۆكوه‌زیرانی عێراق، عادل عه‌بدولمه‌هدی كرد.
عه‌لوان له نامه‌كه‌یدا كه ئاراسته‌ی عادل عه‌بدولمه‌هدی كردووه و له میدیاكانی عێراقدا بڵاوكراوه‌ته‌وه ئاماژه‌ی به‌وه داوه كه، دووچاری ژماره‌یه‌ك به‌ربه‌ست بووه‌ته‌وه و هه‌ڕه‌شه‌ی لێكراوه له كاتی جێبه‌جێكردنی ئه‌ركه‌كانیدا و به‌مهۆیه‌وه له ئه‌ركه‌كه‌ی به‌رده‌وام نابێت و، ده‌ستله‌كارده‌كێشێته‌وه.
هاوکات سوپاسی ئەنجومەنی وەزیران و ئەنجومەنی نوێنەران و سەرۆکایەتییەکانی عێراقی کردووە لە بەرامبەر هاریکاریکردنیان لە بەجێگەیاندنی ئەرکەکانی.
وەزیری تەندرووستیی عێراق ئەوەی ئاشکرا کردووە کە ڕووبەڕووی فشاری سیاسی بووەتەوە و بەو هۆیەوە زیان بە پرۆسەی چاکسازی لە وەزارەتەکەی گەیشتووە.
هەروەها رای گەیاندووە: “لە ڕێگەی ئامرازەکانی گەیاندن و تۆڕە کۆمەڵایەتییەکانەوە ڕووبەڕووی هەڵمەتێکی فراوانی ناوزڕاندن و سووکایەتی بوومەتەوە”.
