(گۆڕان).. لەخشتەبراوی هیچ پێنەبڕاو!
رێبوار كەریم وەلی
(1)
وردە وردە، دەبێ هەڵسوڕاوان و سیاسەتڤانانی بزووتنەوەی گۆڕان دەركیان بەو راستییە كردبێت كە باڵی ماڵباتی یەكێتی لە یەك دوو ساڵی رابردوودا چ كڵاوێكی گەورەیان لەسەر ناون، ئەڵبەتە دەبووایە لە 17ی مایسی 2016دا، كە رێككەوتنی ستراتیژیی گەڕانەوە بۆ ماڵە گەورەكەیان پێ ئیمزا كردن، شتێكیان گوتبا، بەڵام ئەوێ رۆژێ بەسەر خۆیان نەهێنا تا گەیشتە ئێرە.
هەر لەو رۆژەوەی كە گۆڕان لە یەكێتی جیابووەوە، مەترسیی ستراتیژیی یەكێتی ئەوە بوو كە ئەو بزووتنەوە سیاسییە نەگاتە ئەو ئاستەی ببێ بە هاوپەیمانی پارتی، بۆیە یەكەمجار شەڕی گۆڕانیان بە پارتی كرد، دواییش كە دیتیان كار خەریكە لەكار دەترازێ، تێكدانی پەیوەندیی پارتی و گۆڕان كرایە ئامانج. نە بۆ باڵی ماڵبات و نە بۆ ناوەندی بڕیار، هیچ شتێك بەقەدەر دوورخستنەوەی پارتی و گۆڕان گرنگیی نەبووە. بۆیە هەر دوو باڵی یەكێتی، بە دوو ئاراستەی جیاواز، ئیشیان لەسەر ئەوە كرد كە گۆڕان تەنها یەك رێگەی لەبەردەمدا بمێنێتەوە، ئەویش گەڕانەوە بێت بۆ ناو یەكێتی. هەوڵیان بۆ دا و سەریشكەوتن.
ئێستا كە هەردوو باڵەكەی یەكێتی لەگەڵ پارتیدا رێككەوتوون بۆ دیزاینی ئیداری و سیاسیی كوردستان، بژارەكانی بەردەم گۆڕان سنووردارن، یان ئەوەتا سازشێكی سیاسی دەكات، یانیش دەكەوێتە دەرەوەی بازنەی حوكمڕانی كە ئەوەیان لەو زرووفەی ئێستادا زەحمەتە. بۆیە لە هەردوو حاڵەتەكەدا، بزووتنەوەكە فەشەل و كۆتایی خۆی بەیەكجاری رادەگەیەنێت. بۆ ئەوانەی پێشتر لەناو یەكێتیدا بوونە، هەزمكردنی ئەو واقیعەی ئێستا ئاسانە و، تێگەیشتوون لەوەی كە تابۆكانی ناو سیاسەت لە (رەشهەڵاتی ناوەڕاست) وا بە ئاسانی ناشكێندرێن، بەڵام بۆ ئەوانەی كە بە خەیاڵی گۆڕان و دروستكردنی عەدالەتی ئیلاهی ملیان لە رێ نا بوو، زەحمەتە!
بۆیە لە بارودۆخێكی وەهادا، گەڕانەوەی گۆڕان بۆ ناو یەكێتی، دوو ئامانجی گرنگ دەپێكێ. یەكەمیان: هاوسەنگیی هێز بە فیعلی بۆ تەرازووی سیاسیی كوردستان دەگەڕێتەوە و پارتیش پێشوازیی لێ دەكات. دووەمیان: ناوماڵی یەكێتیش یەكدەخرێتەوە و رێگە لە پەرتەوازەیی زیاتر دەگرێت. بۆیە باڵی ماڵباتی یەكێتی، جارێ وا وردە وردە مەرجەكانی مانەوەی ناوەندی بڕیار جێبەجێ دەكات كە بریتین لە دوورخستنەوە و پێداچوونەوە بە هەندێك لە ئۆرگانەكان و، ئەوەش وەك رێخۆشكەرییەك دەبێ بۆ گەڕانەوەی گۆڕانیش. (بەخێر بێنەوە).
ئێران براوەیە؟
(2)
راستییەكەی سەرباری ئەوەی كە پارتی زۆریش حەزی لەو سەودایە نییە، بەڵام لەبەر دڵی یەكێتی و ئەو گوشارانەی ئێران دەیكاتە سەریان، ناچارە بە پەیوەندییەكانی لەگەڵ ئێراندا بچێتەوە و، هەندێك هەنگاوی دیپلۆماسی لەوبارەیەوە بهاوێت. بۆیە چاوەڕوان دەكرێت بەستەڵەكی پەیوەندییەكانی نێوان پارتی و ئێران گۆڕانی بەسەردا بێت. بەڵام ئەوە لەو گۆشەنیگایەوە نییە كە ئێران سەركەوتووە.
رێبەری وڵات (خامنەیی) لە ئاستانەی مەرگدایە و چارەنووسی رێبەرایەتی لە ئێراندا نادیارە، ئێرانی ئەمڕۆ لە خراپترین ساتەوەختەكانی مێژووی 37 ساڵەی شۆڕشی ئیسلامیدا بەسەر دەبات، تەنانەت زۆر دژوارتر لە ساڵانی شەڕی هەشت ساڵە. چونكە شەڕی هەشت ساڵە لەگەڵ سەددامدا، نەك هەر بۆ رژێم كارەسات نەبوو، بگرە دەرفەتێكی زێڕین و نیعمەتی ئیلاهی بوو بۆ پتەوكردنی پایەكانی رژێمی ئاخوندی. ئەمڕۆ ئێران بە ئابوورییەكی داتەپاو و بەو هەموو بەرەیەی كە جەنگیان تێدا دەكات، لە پەلەقاژەی مانەوە و گیانەڵادایە.
ئێران و توركیا هەردووكیان تووشی یەك چارەنووس بوونە و، لە یەك زەلكاودا گیریان خواردووە. بەو ئومێدەی شەڕ نەگاتە ناو ماڵیان، لە دەرەوەی سنوورەكانیان شەڕ دەكەن، بەڵام جگە لەسەردەمی جەنگی جیهانیی دووەم، هیچ كاتێك ئێران بەو شێوەیە نەكەوتووەتە ژێر ركێفی رووسیاوە، بە راددەیەك كە زەمین و ئاسمانی ئێران تەسلیمی رووسیا كراوە. توركەكانیش بەهەمان شێوە. كوشتنی باڵیۆزی رووسیا لە ئانكارا، كاردانەوەیەك بوو بەرامبەر سیاسەتەكانی حكومەتی ئێستای توركیا و، بەیاننامە و تۆمەتباركردنەكان بێ بنەمان.
بۆیە بە لەبەرچاوگرتنی ئەو راستییەی كە لانیكەم نەخشەی ناوچەكە و دنیا لە دوای جەنگی جیهانیی دووەمەوە، لەسەر بنەمای ململانێی رووسیا و ئەمریكا و هەردوو بلۆكی رۆژهەڵات و رۆژئاواوە دیزاین كراوە و، تەنانەت یەكێك لەو فاكتەرانەی كە ئەمریكا رێگەی دا وا بە ئاسانی ئاخوندەكانی ئێران حوكم بگێڕن، بەرگرتن بوو بە هەژموونی رووسیا، ئەوا لەو بارودۆخە تازەیەدا كە توركیا و رووسیا وەكو دوو هەوێ لەسەر رووسیا ركابەرییانە، پێناچێ ئەمریكا تا سەر بێدەنگ و دەستەوستان دانیشێ. بۆیە هەژموونی رووسیا بەسەر ناوچەكەدا بە دەستكێشی ئێران و توركیا، هەتا سەر نییە.
پایتەختسازی
(3)
زۆر قسە لەسەر ئەوە دەكرێت كە كورد، وابەستەیی سیاسیی خۆی لە پایتەختێكەوە بۆ پایتەختێكی دیكە نەگوازێتەوە. ئەوە راستە، بەڵام ئایا هەستمان كردووە كە ئێمەش پایتەختێكمان دروست كردووە جیاوازە لەوانەی دەوروبەر؟ سەیری هەواڵێكی (رووداو)م كرد، لەو ماوەی ساڵی 2016دا، پتر لە سی شاندی پایەبەرزی سیاسی، ئابووری و سەربازیی نێودەوڵەتی لەسەرانسەری دنیاوە هاتوونەتە هەولێر.
راستە كە شەڕی داعش كاریگەر بووە، بەڵام شەڕی دژی توندڕەوی بە لەناوچوونی داعش كۆتایی نایەت و كورد ئیسپاتی كردووە كە چ ئامرازێكی كاریگەرن لەو شەڕەدا و چەندیش جێگەی متمانەن. بۆیە لە سۆنگەی ئەو پایتەختە بەهێزەوە، كورد وابەستە و ملكەچی پایتەختی دیكە نییە. پێش راگەیاندنی دەوڵەت، پایتەختەكەی ئامادەیە.
*ساڵی نوێتان پیرۆز بێت
