سڕینەوەی قوباد تاڵەبانی

رێبوار کەریم وەلی

پەلەقاژەی لاهوور

(1)

لە روانگەی كوڕانی جەنگی تاڵەبانییەوە كە ئەندازیاری خیانەتەكەی 16ی ئۆكتۆبەرن (چونكە رێككەوتن لەگەڵ قاسم سلێمانی بۆ بەدەستەوەدانی كەركووك لە پرسەی مام جەلالدا لە تاران لەلایەن ئاراسی برای لاهوور كرا و دواتر پاڤێڵیشیان هێنایە ناو هاوكێشەكەوە)، ئەوان خۆیان پێ وارسی راستەقینەی تاڵەبانییە. هۆكاری سەرەكیش ئەوەیە كە لە دوای نەخۆشكەوتنی تاڵەبانییەوە، دەزگا ئەمنی و ئیستیخباراتییەكەی ژێردەستی لاهوور و براكانی (كە ئەنجوومەنی ئاسایشی هەرێمی كوردستان هەیكەلیەتی بەڕێوەبردنی بۆ دانان و بودجەی پێدان)، پشكی شێریان هەبووە لە پاراستنی بنەماڵەی تاڵەبانی لەبەرامبەر ئەوانەی دەیانویست ببنە شوێنگرەوەی ئەو لەناو سیاسەتدا.

ئەو روانگایە لای ئەوان وا تەشەنەی كرد كە حیساب بۆ كۆڕەكانی تاڵەبانیش نەكەن، تا وای لێهات گەلاوێژی خێزانی برایم ئەحمەد لێیان بێتە دەنگ و بڵێت ئەوێ شوێنی ئێوە نییە! چونكە بەو دەسەڵاتە رەهایە مافیاییەی كە هەیانبوو، وردە وردە جومگەكانی دەسەڵاتی ناو یەكێتییان كەوتە دەست و، تەنانەت بوون بە بەشێكی كاریگەر لەو پلانە ئیقلیمیانەش كە لەسەر كوردستان هەبوون.

پەلاماری داعش بۆ سەر هەولێر و هاتنی بەپەلەی هێزەكانی دژە تیرۆری سەر بە لاهوور، هاوشان لەگەڵ قاسم سلێمانی، نیشانەی ئەوە بوو كە بە باشی ئاگایان لە هەموو پلانەكان هەبووە. ئەوێ رۆژێش پلان ئەوە بوو كە داعش هەولێر بگرێت. لە بنەڕەتدا ئەگەر تەماشا بكەی دەبووایە لە ئابی 2014دا، داعش پەلاماری كەركووكی دابایە نەك هەولێر! (ئەگەرچی دوایی لە 2016دا، بە هاوكاریی حەشدی شیعی و ئێران داعشیان خزاندە ناو كەركووكەوە، بەڵام ئەویش سەری نەگرت تا 16ی ئۆكتۆبەر كە سەركەوتن) هەر بۆیەش دووبارە لە ئۆكتۆبەری ئەمساڵ، جارێكی دیكە ویستیان هەمان پلان بە حەشدی شەعبی (كە خۆیان بەشداری هێزەكانیان بوون)  بۆ هەولێر دووبارە بكەنەوە كە ئەمجارەش سەری نەگرت.

ئەوان پێیانوابوو دوای كەركوك، هەولێریش دەكەوێتە دەست حەشدی شیعی، لە سەرێك تۆڵەی 31ی ئاب لە پارتی دەكەنەوە، لەسەرێكی دیكەوە دەتوانن بەتەواوەتی دەست بەسەر حوكمی كوردستان و یەكێتیدا بگرن. حكومەتێكی نوێی موالیی ئێران و بەغدا رابگەیەنن و پارتی یان پەلكێشی شەڕی ناوخۆ بكەن، یانیش چاوشكێنی بكەن. ئەوە تابلۆ گشتیەكەیە و دەركەوت دووبارە لێكدانەوەكانیان هەڵە بووە، ئەوەی بە (42 ساڵ) بە مامیان نەكرا، بەوانیش ناكرێت.

سڕینەوەی قوباد تاڵەبانی

(2)
لەگەڵ نزیكبوونەوەی وادەی كۆنگرەی یەكێتی (كە بڕیارە سەرەتای ساڵی داهاتوو بكرێت)، ئەستێرەی بەختی قوباد تاڵەبانی لەسەر ئاستی ناوخۆیی و نێودەوڵەتی لەهەڵكشاندایە. بە تایبەتیش كە ئیدارەی ئەمریكا ئاگاداری ورد و درشتی دەستێكەڵكردنی لاهوور و جەماعەتەكەی لەگەڵ قاسم سولەیمانی و حەشدی شیعین و، ئاگایان لەوە هەیە كە چۆن بە نیازی دابەشكردنی كوردستانن. لاهوور لە دوای 16ی ئۆكتۆبەر وای دانابوو كە بە هاوكاریی پاڤێڵ، دەست بەسەر یەكێتیدا بگرن و، تەنانەت دەیگوت ئەوانەی بەشدار بوونە لە بڕیاری ریفراندۆم بۆیان نییە لە كۆنگرەی داهاتوودا بەرپرسیارێتی وەربگرنەوە! ئەوەی لە حیساباتی لاهووردا نەبوو ئەوە بوو كە قوباد تاڵەبانی بەو شێوەیە بۆ داهاتووی حوكمڕانیی كوردستان و یەكێتی بەرجەستە ببێت.

بۆیە ئێستا بە هەموو لایەكەوە، جەماعەتی 16ی ئۆكتۆبەر خەریكی پاكانەكردن بۆ خۆیان و پەلاماردانی پارتی و حكومەتن. بەو پێیەی كە قوباد تاڵەبانی لەلایەن پارتییەوە پشتیوانی لێدەكرێت (چونكە ئەوان لای پارتی كۆتاییان هاتووە) و لەناوخۆی یەكێتیش ئیش بۆ ئەوە دەكرێت جێگەی باوكی بگرێتەوە و شانسیشی زۆرە. دەیانەوێ قوباد وەكو دەستەمۆی پارتی وێنا بكرێت (بۆیە چەپ و راست كەوتوونەتە پەلاماردانی هاوپەیمانی ستراتیژیی مامی گەورەیان!) تا مەركەزییەتێكی بڕیاردان لەناو یەكێتیدا درووست نەبێت و ئەو پاشاگەردانییەی ئێستا هەیە، ئاوا بەردەوام بێت.

هاوتەریب لەگەڵ ئەوەش هانی خەڵك دەدەن كە پەلاماری حكومەت و پارتی بدەن و وەزعی سلێمانی بە ئاراستەیەكدا ببەن، خەڵك 16ی ئۆكتۆبەری لەبیر بچێتەوە، كەشێك درووست بكەن كە كۆنگرەی یەكێتی نەبەسترێت، هەڵبژاردن نەكرێت و حكومەتیش (كە ئەمڕۆ وا خەریكە هەموو دنیا پشتیوانیی بێ قەیدو شەرتی بۆ دەردەبڕن) لەكەدار بكەن. ئەوان دەیانەوێ لە داهاتوویەكی نزیكدا هەرچۆنێك بێت لە سلێمانی خوێن بڕژێت، تا بەكراسێكی وەبكەن و بەوەش خیانەت و هەرزەیی خۆیانی پێ پەردەپۆش بكەن.

ئەگەر راست دەكەن!
(3)
بانگەشە بۆ خۆپێشاندانی سەرتاسەری! و پێكهێنانی حكومەتی كاتی لەكاتێكدایە كە دەبێ ئەم حكومەتەی ئێستا تا چەند مانگێكی دیكە وادەی ئەنجامدانی هەڵبژاردن دیاری بكات. بۆیە ئەگەر هێزە سیاسییەكانی سلێمانی بڕوایان بە خۆیان و دەنگدەرانیان هەیە و نییەتیان رووخاندنی حكومەت و فەوزا نییە، دەتوانن چەند مانگێكی دیكەش سەبر بكەن. خەڵك لە چەمچەماڵ دێننە سەر جادە، هەمان ئەو جادەیەی بەسەدان تانكەر نەوتی كەركووكی پێدا تاڵان دەكرێ، بەڵام ناپرسن ئەو تانكەرانە هی كێن و ناشچن ئاگریان تێبەردەن، بەڵام ئامادەن بارەگای پارتی بسووتێنن!
ئەوانەی بانگەشە بۆ راپەڕین و رووخاندنی حكومەت دەكەن، گەیشتوونەتە لوتكەی ئیفلاسی سیاسی، هەم لەناو حزبەكانی خۆیاندا و هەمیش لەناو جەماوەری كوردستان. تا بینەقاقا غەرقی قەیرانی ناوخۆیین و تەنها ئارامبەخشیش ئەوەیە كە خەڵك لەدژی پارتی هان بدەن، لەكاتێكدا پارتی هیچ دەسەڵاتێكی لە زۆنەكەی ئەواندا نییە.

خۆ ئەگەر دەتوانن بچنە ژێرباری ئیدارەدانی خەڵكی خۆیان، ئەوا پارتی پێش هەموو كەس پیرۆزباییان لێدەكات! چونكە لە ئەمری واقیعدا، دوو ئیدارەیی و دووڕوویی ئیداریش هەیە. بۆیە پارتی تەمەننا دەكات ئەوان لە یەكێك لەو دووانە دەرباز بن.
ئێستا ئەركی بەپەلەی حكومەت ئەوەیە كە بێ گەڕانەوە بۆ حزبەكان و بە هەماهەنگی لەگەڵ كۆمیسیۆنی باڵای هەڵبژاردنەكان (كە ئێستا وا خەریكی پاككردنەوەی تۆماری دەنگدەرانیشن)، وادەیەك بۆ هەڵبژاردنەكان دیاری بكات و كۆتایی بەو موزایەداتە بێنێت.