هەڵكردنی ئاڵا لە كەركووك لەپێناوی چی بوو؟
رێبوار کەریم وەلی
(1)
هەڵكردنی ئاڵای كوردستان لە كەركوك و بەتایبەتیش بە دەستپێشخەریی یەكێتی نیشتمانی و مەیدانخوازیی ئەو حیزبە بۆ بەغدا و وڵاتانی ئیقلیمی، جێگەی ستایشە، بەڵام لەپشتی پەردەوە چی هەبوو؟ جارێ حەقیقەتێك هەیە كە دەبێ هەموو كەس بیزانێت: بەغدا، تاران و ئانكارا، تازە دەستیان لەوە شووشتووە كە بتوانن جارێكی دیكە تەحەكوم بە كەركوكەوە بكەن و ئەو باسە بە چەند هەنگاوێكی پێشووتر كۆتایی هاتووە، یەكەم: لە 2014 ەوە حكومەتی هەرێمی كوردستان یەكلایەنە بەشێكی نەوتی كەركوك بە پێش چاوی هەموو دنیاوە بە بۆڕیی كوردستان دەفرۆشێت. دووەم: حكومەت پارەی پەترۆدۆلاری كەركوكی وەئەستۆ گرتووە و بەغداش پارساڵ بۆ بێدەنگبوون، رازی بوو كە بڕێكی كەمی نەوتی كەركوكی پێ بدرێت.
سێیەم: بەپێی رێككەوتنی نێوان بارزانی و عەبادی، ئیدارەی سیاسی و ئەمنیی كەركوك و ناوچە كوردستانییەكانی دیكە كە دوای شەڕی داعش و پێش ئۆپەراسیۆنی موسڵ بەدەست پێشمەرگەوەن، ئیتر جێی موناقەشە نییە و بەشێكن لە كوردستان. هاوكات لەگەڵ ئەوانەشدا، حكومەتی ئێستای بەغدا لاریی لەوە نییە كە ئاڵای كوردستان لە كەركوك هەڵبكرێت تەنیا لەو شوێنانە نەبێت كە تائێستا بە دەسەڵاتی فیدراڵی بەڕێوە دەچن و، ئەوانەش تەنیا یەك دوو شوێنن!
ئەو هێزە رەشەی یەكێتی كە هەڵیكوتایە سەر بیرە نەوتەكانی كۆمپانیای نەوتی باكوور، لە خەمخۆریی (بەرپرسی مەڵبەندی یەكێتی، پارێزگار و جێگری یەكەمی سكرتێری گشتی) نەبوو، بگرە كاردانەوەیەك بوو بۆ بێبەڵێنیی وەزارەتی نەوتی بەغدا لە بەرامبەر رێككەوتنێك كە پێشتر كرابوو بۆ دامەزراندنی پاڵاوگەیەك كە ئەو سێ زاتەی سەرەوە بەناوی كۆمپانیای (بەرهەم) لەپشتییەوە بوون. كاتێك بەغدا پێشنیازێكی دیكەی باشتری لە كۆمپانیاكانی سەر بە باڵی دەستڕۆیشتووی یەكێتییەوە پێگەیشت، كۆمپانیای بەرهەمی بەلاوەنا و، ئەوەش بووە هۆی ئەوەی هێزە رەشەكە بجووڵێ و، دواتریش ئاڵایەكی كوردستانیان بەسەر كەیسەكەدا دا و بابەتەكە كپ بوو. پارتی لەو كەیسەدا تەماشاچی بوو، بەڵام پارتی نابێ رێگە بدات، هەنگاوەكانی پێشووتر بكرێنە قوربانیی دەستكەوت و داهاتی نەوت (چونكە گرەوێكی گەورە و دیوێكی مەترسیداری ئەو حەملەیە و ئانوساتی كردارەكە ئەوە بوو كە پەیوەندیی بارزانی لەگەڵ توركیا و عەبادیدا تێكدەچێت)، وەك چۆن ئێستا لەناو یەكێتی و ناوەندی بڕیاری ئەو حیزبەشدا، (بەرهەم)ێكی زۆر كراوەتە قوربانیی داهاتی بەرهەم! ئاواش خەریك بوو، ئاڵاكەش بە دەردی (ئاڵا) بچێ.
لێدە لێدە! فەرهاد پیرباڵ
(2)
فارس دەڵێ: سووژنێك لە خۆت بدە، ئینجا دەرزییەك لە بەرامبەرەكەت! بەداخەوە هەفتەی رابردوو هەموومان لە تۆڕە كۆمەڵایەتییەكاندا، دیمەنی قێزەونی هێرشی دوو چەكدارمان بۆ سەر فەرهاد پیرباڵ بینی. بەس كەس نەیویست سەیری ئەو دیمەنانەش بكات كە چەند دەقیقەیەك پێش ئەو رووداوە تۆمار كرابوون. لەوێ كەسێكی وەكو فەرهاد پیرباڵ كە لەسەر نوخبەی رۆشنبیری كوردستان مەحسوبە، ناشیرینترین جوێن و قسەی سووك بە پارێزگاری هەولێر دەدات! ماوەیەك پێش ئێستاش فەرهاد پیرباڵ، جنێوی لەوانە پیستری بە نەوشیروان مستەفاش دەدا و لە لێدوانەكانی دوای لێدانەكەشی (كە بە تەلەفۆنێك هەموو كێشەكانی چارەسەر بوون!) هەوڵی دا دزران یان ونبوونی لاپتۆپەكەی بە پیلانی نەوشیروان مستەفاوە ببەستێتەوە و وای نیشاندا كە ئەو لە پشت هێرشكردنە سەری بووە! كەچی پێشتر ناوی چەند كەسێكی دیكەی دەهێنا.
كەس وا تێنەگات كە ئەو چەند دێڕە، پاساوە بۆ پەلاماری سەر فەرهاد پیرباڵ، بەڵام پەلاماری دوو چەكدار و لێدان لە كەسێكی سیڤیل ئەگەر لاپەڕەیەكی رەش بێت، ئەوا ئاست، رەفتار و گوفتاری كەسێكی وەكو فەرهاد پیرباڵیش بۆ بەناو نوخبەی رۆشنبیری كە بتوانن ستایشی بكەن، شەرمەزارییە. فەرهاد سەردەمانێك ئانارشیست بوو (بە مانا كۆمەڵایەتییەكەی)، بۆیە خەڵك زۆر شتی لێ قەبوڵ دەكرد، بەڵام ئێستا ئانارشیست نییە و تەمسیلی هیچ جۆرە یاخیبوونێك ناكات، جگە لە تێكچوونی دەروونی كە ئەویش دەرهاوێشتەی ژیانی تایبەتی خۆی و حەزی ئەوەیە كە بەردەوام خەڵك باسی بكات. یانیش ئەوەی كە هەر كردارێكی بتوانێ دەستكەوتێكی ماددی بۆ فەراهەم بكات و بەو شێوەیە باجگری بكات.
پشتیوانیی كوێرانە لەوەی كە فەرهاد پیرباڵ دەیكات، گەورەترین زوڵمە كە لە فەرهاد پیرباڵ و مێژووی كاری ئەدەبی و رۆشنبیریی ئەو دەكرێت. ئەژدیهایەك لەناو دەروونی ئەو پیاوەدا دروست بووە كە پەلاماری هەموو شتێك دەدات (بە رابردووی بیروباوەڕ، فیكری و ئەدەبیی خۆیشییەوە)، بۆیە فەرهاد پێویستی بە یارمەتییە بۆ ئەوەی بتوانێ بەردەوام بێت، فەرهاد پیرباڵ میراتێكی نەتەوەیی و نیشمانییە كە دەبێ وەك چۆن میللەتانی دنیا هی خۆیان دەپارێزن، ئاوهاش ئێمە بیپارێزین و، لە گەمەی هەرزانی سیاسەت و رانتخۆریدا بەكاریان نەهێنین.
دیكتاتۆری یان چارەسەری؟
(3)
ئەردۆغان لە ریفراندۆمی دەستووریدا جارێكی دیكەش بردییەوە. دیسان دەرفەتێكی دیكەی گەورەی سیاسی لە كیس كورد چوو. ئەڵبەتە لەوەیاندا پەكەكە تۆمەتبارە، چونكە 15 ساڵە رێگە بە نزیكبوونەوەی ئاكەپە لە جوڵانەوەی سیاسیی كورد لە توركیا نادات و هەر كاتێكیش دەرفەتێك بێتە پێشەوە، ئەوا دەكەوێتە دوای دەنگی دەهۆڵی كەمالیزم! پەكەكە دەیەوێ دۆزی كورد لە توركیا بەشێك بێت لە ئۆپۆزیسیۆنی هەر رژێمێك كە دێتە سەر كار. ئەردۆغان دەتوانێ بە پێچەوانەی چاوەڕوانییەكان، دەسەڵاتەكانی بخاتە خزمەت ئاشتی و بە تایبەتیش، بارودۆخی نێودەوڵەتی و ناوچەیی حوكم دەكات كە توركیا بێ كێشە پێ بنێتە ناو قۆناغی دوای سایكس پیكۆ.
