پارلەمانی بە بارمتەگیراو
ئاریان فەرەج
پیلانگێڕی كاتێك كە لە پشت پەردەی شەرعیەتی شكلی خۆی دەشارێتەوە. ئەو كاتەی پیلانگێڕان پەی بەم رێگا شەیتانییە دەبەن، ئیدی مەترسی راستەقینە سەرهەڵدەدات. خۆ ئەگەر لەبەرخاتری شەرعییەتی شكلی، رێگری لەم جۆرە پیلانگێڕییە نەكرێ، ئەوا بە ناوی خودی شەرعیەت و یاساسەروەری و ئیرادەی گەلەوە شەرعییەت بە لێدانی بەرژەوەندی گەل دەدرێ و ناحەزانی كوردستان بە هەنگوین دەمانخنكێنن.
دەیانویست ئەم رۆڵە ترسناكە بە پەرلەمانی كوردستان بگێڕن. دەیانویست لە جێی لەشكركێشی و تانك و تۆپ و تۆقاندن كە زەمینەی نەماوە، بە دوو چەكی نوێ كوردستان ببەزێنن، یەكیان برسیكردن تا شكاندنی ئیرادە و خۆبەدەستەوەدان و دووەمیان لە رێی بەكارهێنانی پەرلەمان بە دژی خواست و ئاواتەكانی گەل و بە شێوازێك كە بە روكاری دەرەوەیدا یاسایی و دیموكراتیانە بێت و بە نەتیجە ببێتە مایەی شكاندنی كوردستان و ئیرادەی سەربەخۆییخوازی و تەسلیمبونەوە و دۆڕاندنی هەموو شتێك.
ئەو دەمەی بە هەڵەیەكی سیاسی و دەسخەڕۆبوون بە بەڵێنی (چوار ساڵ ئارامی)، سەرۆكایەتی پەرلەمان درایە دەست گۆڕان، ئەو كاتەی پرنسیپی تەوافوق و سازان خرایە ژێرپێ و بە فێڵی زۆرینە و كەمینە وویستیان پەرلەمان بە بارمتە بگرن، مەرام و نیازی دواتریان كەوتە روو. ئەو دەمەی هەموو دۆستانی دیموكراتخوازی كورد بە ئەمریكا و بەریتانیاوە داوایان لە حیزبەكان كرد كۆبونەوەی 19ی ئابی پارساڵی پەرلەمان نەكەن و بەڵام سەرۆكە نامەسئول و راسپێردراوەكەی پەرلەمان بە گوێی نەكردن، ئیدی رونبۆوە كە پەرلەمان ئیختراق كراوە و بە بارمتەگیراوە و هێزێكی ئیقلیمی بۆ ئەجیندای خۆی و دژ بە بەرژەوەندی كوردستان هەڵیدەسوڕێنێ. لە گرێژنە دەرچووە و بۆتە جێی پیلان و گێرەشێوێنی و لە ئەركی راستەقینەی خۆی كە تەعبیرە لە ئیرادە و كۆدەنگیی گەل و نوخبەی سیاسی و پاراستنی بەرژەوەندی گشتیی، دوور دوور كەوتۆتەوە.
پارتی وەك هێزی یەكەمی بەرپرسیار لە چارەنوسی كوردستان كەوتە بەردەم دوڕیانێك: یان دەبوا بە دیار هەرەسپێهێنانی تەجروبەی كوردستانەوە بە ناوی شەرعیەت و یاساسەروەری، دەستەوئەژنۆ دانیشێ و لە خەمی ئەوەی پیلانگێڕان بە دژە دیموكراتی تۆمەتباری نەكەن و كاڵفامان بەو ئیدیعایە باوەڕ نەكەن، رێگا بەو پیلانە شەیتانییە بدات، یان دەبوا بە هەر نرخێك بووە رێ لەو پیلانە مەلعونە بگرێ و رێگە نەدات پەرلەمانێكی بە بارمەتەگیراو بە فێڵی تەعبیر لە ئیرادەی گەل، ئیرادەی گەل تێكبشكێنێ.
ئەو سیناریۆیەی بۆ پەرلەمانی كوردستانیان داڕشتبوو، هاوشێوەی ئەوەی بەغدا بوو، چۆن پەرلەمانی بەغدایان لە رێی مالكی و تاقمەكەیەوە بۆ روخاندنی حكومەتی عەببادی و سەرخستنی ئەجیندای ئیقلیمی و دروست كردنی فەراغی سیاسی بەكارهێنا، دەیانویست هەمان ئەرك لە رێی ئەكرادی مالكییەوە بە پەرلەمانی كوردستانیش جێبەجێ بكەن و فەراغ و بێ ئیرادەیی سیاسی لە هەولێریش دروست بكەن. دەیانویست ئەو فەوزایەی لە سلێمانییەوە بۆیان نەدەگوێزرایەوە بۆهەولێر، لە رێی پەرلەمانەوە بیگوێزنەوە.
ئەوانەی ئێستا بۆ (كاراكردنەوە !!)ی پەرلەمان و دیموكراتی موزەییەف فرمێسك دەڕێژن، بۆ شكستی پیلان و ئەجیندا پێسپێردراوەكەیان دەگرین، دەنا ئەوان هەر ئەوانەن كە رێزیان لە ئیرادەی پەرلەمانێكی بچوككراوەی وەك ئەنجومەنی پارێزگای سلێمانی و ئیرادەی دەنگدەرەكانی نەگرت، چ جای پەرلەمانی كوردستان.
پەرلەمان كاتێ كارادەكرێتەوە لە بارمتەیی قورتار بكرێ و بگەڕێتەوە بۆ خاوەنەكەی كە گەلی كوردستانە، كاتێك دەوری سازندەی خۆی وەردەگرێتەوە كە كۆی پەرلەمانتارەكانی بچنەوە سەر ئەركی پیرۆزی خۆیان و لە كولتوری رق و فەوزا و تێكدان و تەفرەقە دوور كەونەوە. پەرلەمان ببێتەوە چەكی دەستی گەلی كوردستان نەك چەكی دەستی هێزێكی ئیقلیمی و دار ودەستەكانی لە دژی خەڵكی كوردستان .
