پەكەكە شنگال چۆڵ دەكات؟
رێبوار كەریم وەلی
(1)
سەرباری ئەوەی كە موراد قەرەیڵان رایگەیاندووە پەكەكە ئامادەیە شنگال چۆڵ بكات، بەڵام پێناچێ پەكەكە وا بە ئاسانی دەستبەرداری ئەو پێگەیە بێت كە لە ئەنجامی هەوڵێكی مێژوویی و لە مێژینە دەستی كەوتووە. جارێ هەر خودی ئەوەی كە پەكەكە چۆن و بۆچی خۆی خزاندە ئەو ناوچەیەوە جێگەی پرسیارە. پەكەكە زۆر لەمێژە و تەنانەت ئەو كاتەی كە سەددامیش لەسەر حوكم بوو، بەهۆی بوونی بنكە و بارەگاكانی لە مووسڵ، توانای دەستڕەسییان بە خەڵكی ناوچە كوردنشینەكانی دەرەوەی هەرێمی كوردستان هەبوو، بۆیە ئەو ناوچانە و بەتایبەتیش ناوچە ئێزدینشینەكان بە درێژایی دەیەی رابردوو مەیدانی ململانێی نێوان پارتی و پەكەكە بوونە. هەردووكیان بەو ئاراستەیە كاریان كردووە كە وا خۆیان نیشانی رای گشتی بدەن، پارێزەری نەتەوە، ئایین و ئایینزاكانی كوردستانن، تا لەو رێگەیەوە پشتیوانیی زیاتری نێودەوڵەتی بەدەست بهێنن. هاوكات پردەكانی پێكەوەبەستنەوەی بەشەكانی دیكەی كوردستان كە جێگەی تەماح و نفوزی هەردووكیانن، كۆنترۆڵ بكەن. نیگایەكی خێرا بە هەڵكەوتەی جوگرافیی بنكەكانی پەكەكە لە ناوچە سنوورییەكان ئەوە دەردەخات كە پەكەكە چۆن سنوورەكانی كۆنترۆڵ كردوون.
شنگال كارتێكی گرانبەهایە كە كەوتووەتە دەست پەكەكە و وا بە ئاسانی نایداتەوە بە پارتی. لەو پێناوەدا، دەبێ پارتی هەندێك شت بۆ پەكەكە دەستبەر بكات. ئەولەوییەتی داواكانی ئێستای پەكەكە لە پارتی ئەوەیە كە بیپارێزێت، داشی پارتی لە هەموو لایەكەوە سوارە و پەكەكە لە پاشەكشەدایە. بۆیە زامنكردنی دانوستاندنێكی شەرافەتمەندانە لە نێوان پەكەكە و توركیا، ئیمتیازێكی گەورەیە بۆیان و، باشیش دەزانن كە كشانەوەیان لە شنگال مەتڵەبێكی نێودەوڵەتییە، جا ئەوە لە رووی بەرژەوەندییەوە بێت، یان ئەوەی كە پارتی توانیبێتی بیكاتە رۆژەڤی ئەو وڵاتانە. بە هەردوو باردا دەردەكەوێ كە پارتی لەو هاوكێشەیەدا دەستی زۆر بەهێزە و كەسیش وەكو جاران بە فریای پەكەكەوە نەهات، چونكە ئامانجی سەرەكی بە خۆشی بێت یان بە ناخۆشی، بەستنەوەی رۆژئاوای كوردستانە بە باشوورەوە، ئەوەیش كە بیەوێ رێگری لەوە بكات، بە دەردی ئەنسارولئیسلام و كۆمەڵ دەچێ لە تەوێڵە و بیارە.
بارزانی مەرجەعە
(2)
كوردستانی رۆژئاوا كە ئێستا لە سایەی حوكمڕانیی پەكەكەوە، پێناسەكەی لە هەموو بەها نیشتمانی و نەتەوەییەكان داماڵدراوە و كراوەتە ناوچەیەكی جوگرافیی رووت (باكووری سووریا) لە گێژاودایە. گێژاوێك كە بەرئەنجامی سیاسەت و تاكتیكە بێماناكانی پەكەكەیە. كەس نازانێ ئەمڕۆ دەسەڵاتەكەی پەكەكە كە خەڵكی خۆیشی لەگەڵدا نییە، لەگەڵ كێدایە؟ كێ پشتیوانیەتی و چۆن درێژە بە مانەوە دەدات؟ سەیر ئەوەیە بە درێژایی چەند ساڵی رابردوو، خەڵكی كورد و دنیا وا تێگەیەندراوە كە پارتی و بارزانی دوژمنی سەرسەختی دەسەڵاتی پەكەكەن لە رۆژئاوا! رەنگبێ لە دەرەوەڕا وا بینرابێت، بەڵام لەڕاستیدا، بارزانی لە هەموو روویەكەوە گەورەترین پشتیوانیی لە پەكەكە كردووە لە رۆژئاوا. چونكە لێگەڕێ لەوەی كە چۆن پەكەكە چەكدارەكانی خۆی بردنە ئەوێ و باڵادەستیی سەربازیی بۆ خۆی دەستەبەر كرد، بارزانی لە رووی هاوكاریی سەربازی، مرۆیی و ئابووری و هاوكات بەدەستهێنانی پاڵپشتیی نێودەوڵەتیش پارێزەری رۆژئاوای كوردستان بووە. هەر بۆیە هەموو ئەوانەی ئەمڕۆ دەیانەوێ نەخشەی داهاتووی سووریا دابڕێژنەوە، باش دەزانن كە وجودی پەكەكە و ئەو باڵادەستییەی بە زەبری چەك دەستەبەری كردووە، كاتی و راگوزەرە، بۆیە روویان لە بارزانییە.
ئەوەی ئەمڕۆ پەكەكە بۆ رۆژئاوای كوردستان وەكو ماف دەیبینێ، 5 ساڵ پێش ئێستا لە سایەی بارزانییەوە بۆ گەلی كورد لە كوردستانی رۆژئاوا بە زیاتریشەوە دەستەبەر كرابوو، ئەگەر پەكەكە بەڵێنەكانی خۆی بردبایە سەر. ئەوانەی ئەمڕۆ پاڵپشتی سیاسەتەكانی پەكەكە دەكەن لە رۆژئاوا، ئایا قەت لە خۆیان و پەكەكەیان پرسیوە كە مادام دەسەڵاتەكەتان هێندە دیموكراتییە، ئەو هەموو پەنابەرەی رۆژئاوا بە چییان لە ژیانی زەحمەتی نێو كەمپەكانی كوردستانی باشوور داوە!
بۆیە پەكەكەش دەبێ مەرجەعییەتی بارزانی بۆ داهاتووی كوردستان قەبوڵ بكات، وەك چۆن هێزەكانی باشوور و رۆژهەڵات قەبوڵیانە. لە غەیری ئەوە ئەو (گەل) ەی كە وێردی سەر زمانیانە، چیدی ئەو موزایەدە و ساختەكارییەیان لێ قەبوڵ ناكات. دەرفەتێك هەیە كە پەیەدە، بە ئاگری پەكەكەوە نەسووتێ و بزووتنەوەی كوردایەتی لە رۆژئاوا لە شەڕی دژی تیرۆرەوە نەبێ بە جوڵانەوەیەكی تیرۆریستی. ئەگەر پەكەكە بیەوێ لەسەر تاكڕەوی بەردەوام بێت، بارزانی پشتیان ناگرێ و قسەی خێریشیان بۆ ناكات. بۆیە هەقە پەكەكە لە سۆنگەی ئەو بارودۆخەی كە دەرئەنجامی هەڵە ستراتیژییەكانی بووە لە دیاریكردنی دۆست و دوژمن، جارێكی دیكە بە وردی بەخۆیدا بچێتەوە، چونكە (كات) رەحم بە كەس ناكات.
كەچەڵ حەسەن
(3)
پڕۆژەكەی گۆڕان، سەراوبنكردنەوەی پڕۆژەكەی پارتی و پەیامەكەی بارزانییە. راستییەكەی چارەسەری قەیرانی سیاسییە بە میتۆدی دروستكردنی قەیران.. ئەولەویەتی چارەكردنی قەیرانی سیاسی و وەگەڕخستنەوەی پەرلەمان و كاراكردنەوەی حكومەت، گۆڕینی سەرۆكی هەرێمی كوردستان نییە. پارتییەكان جاران خەونیان بەو رۆژەوە دەدیت كە مام جەلال نەمێنێ، بەڵام ئێستا كاڵەك بە ئەژنۆی خۆیان دەشكێنن! ئەوانەی كە خۆیان بە خەمخۆر دەزانن، دەبێ زۆر شوكر بن كە هێشتا هەم پارتی و هەم كوردستان كەسێكی وەك كاك مەسعودی تێدا ماوە. كاك مەسعود، رابەرایەتییەكەی بەرهەمی تەوافوقی سیاسی نییە و پێگەكەشی پۆست نییە، بەڵام ئەگەر ئیسرارێك هەیە لەسەر ئەوەی پێگەكەی بەرهەمی پۆستە، دە كەواتا یەكێك بدۆزنەوە بۆ ئەو پۆستە و ئینجا ئەوكات گۆڕینی ئاسانە.
