میدیای یەكێتی.. ئەو شەڕە دۆڕاوەی هەر بەردەوامە!

نازانم ئەم بیركردنەوەیە كێی لەپشتە! بەڵام چەند رۆژێكە لە سەروبەندی بانگەشە بۆ هەڵبژاردنی پێشوەختەی عێراقدا، میدیای یەكێتی كەوتووەتەوە سەر قەوانە سواوەكەی جارانی (هێرش بكەرە سەر پارتی و بارزانی، هەتا دەنگی زۆرینەی خەڵكی سلێمانی بەدەست بێنیت!) ئەمەش شەڕێكی دۆڕاوە و زیاتر لە چارەكە سەدەیەكە بەردەوامە، هەرچی حزب و گرووپێك كاری لەسەر ئەوە كردووە، وەك بەفری بەر هەتاو تواوەتەوە هەر لەنێو سلێمانیدا پووكاوەتەوە، گەر مەبەستیش تەنیا خەڵكی سلێمانی بێت، ئەوە هەموو هەڵبژاردنێك دەیبینین كەمترین خەڵكی ئەو شارە دەنگ دەدەن و ناچار دەبن فەزیحەتەكانی وەكوو ئەوەی كارگەی ئەلبیسە و داخستنی بنكەكانی دەنگدان لە كاتژمێر ٥:٠٠ی تا ٨:٠٠ی شەو بۆ تەزویركردن، دووبارە بكەنەوە، كەواتە ئەو خیتابە تەنانەت بۆ ناو شاری سلێمانییش نایخوات، ئیتر نازانم بۆچی بەردەوامە!

لە چەند مانگێك پێش یەكەمین جەولەی شەڕی ناوخۆوە، بە دروستی واتە لە سەرەتای (ساڵی ١٩٩٤)ەوە تا ئێستا، یەكێتی و گۆڕان و ئیسلامیەكان و پەكەكە و هەموو ئەو حزب و حزبۆكە و تاقم و گرووپ و باڵانەی كە لە سلێمانی دروست بوون و هەر لەوێش توانەوە، چ بە میدیای فەرمییان و چ بە سێبەرەكانیانەوە، بەو پرۆژە میدیاییانەشەوە كە ناویان لێ نابوون (میدیای ئەهلی و سەربەخۆ و بێلایەن!) تا دەگاتە پەیجە علووجەكانی جەماعەتی پێش ٨ی تەمووزیش، بە ملیاران دۆلاریان لە (بە شەیتانكردنی پارتی)دا سەرف كردووە، كەچی هەموو هەڵبژاردنەكانی عێراق و هەرێمی كوردستان، پارتی وەك حزبی براوەی یەكەم، سەركەوتن بەدەست دێنێت و چەند كورسییەكیش زیاد دەكات، كەواتە ئەو ملیاران دۆلارەی میللەت كە لەو پرۆسەیەدا خەرج كراوە، ئاوەو ئاو چوو!

هەر بۆ هەمان ئەو مەبەستە واتە (بە شەیتانكردنی پارتی)، جگە لەو ملیاران دۆلارەی ئاوەو ئاو چوو! یەك سوپای گەورە لە (نووسەر، میدیاكار، رۆژنامەوان، چالاكوان، پەرلەمانتار، كەمپینچی!) هەموو هێز و تاقەت و توانای نووسین و قسە و جووڵەیان پێ خراوەتە گەڕ هەر لە سلێمانی و بۆ دژایەتیی پارتی، دیسان لە هەموو هەڵبژاردنێكدا، پارتی یەكەم دەبێت و رەنجی چەند ساڵەی ئەو سوپایەش و هەرچی نووسیویانە و گوتوویانە، بێوەر و بەفیڕۆ دەچێت.

بیهێننە بەر چاوی خۆتان، ئەگەر ئەو فەیلەقە لە (نووسەر، میدیاكار، رۆژنامەوان، چالاكوان، پەرلەمانتار، كەمپینچی!)یانی شار و دەوروبەری، كە لەدژی پارتی خراونەتە گەڕ، بۆ خزمەتی پێگەی شاری سلێمانیی ئازیز، یان بزاڤی رۆشنگەری لە كوردستان، یاخود لە خزمەت پێشخستنی كۆمەڵایەتی و فەرهەنگیی خەڵكی كوردستان و لەپێناو دۆزی رەوای خەڵكی كوردستان و دژی نەیاران و داگیركەرانی كوردستاندا، بخرانایەتە گەڕ، ئێستا كوردستان لە چ دۆخێكی سیاسی و ئابووری و كۆمەڵایەتی و فەرهەنگیی باشدا دەبووین؟

نازانم ئێستا كێ میدیا یەكێتی بەڕێوە دەبات، بەڵام ئەو بابەتانەی چەند رۆژێكە لە ماڵپەڕی رەسمیی ئەو حزبە و رۆژنامەی رەسمیی ئەو حزبەدا، لە دژی پارتی بڵاو دەبنەوە، كەس نازانێ ناویان بنێ چی! ئێستاش نازانم ئەوانە وتارن، هەواڵن، راپۆرتن، بەدواداچوونن، لێدوانن، بەیاننامەن، بەلاغن، نازانم چین! چونكە ناچنە چوارچێوەی هیچ یەك لەو ناوانەوە، بەڵام بەدڵنیاییەوە عەقڵێكی سواویان لەپشتە كە پێویستە یەكێتی پیایدا بچێتەوە.

دوێنێ هاوكارم جەمال عەبدوڵای رۆژنامەوان، بابەتێكی نووسیبوو، گەرچی ناوی (یەكێتیی نیشتمانیی كوردستان)ی نەهێنابوو، بەڵام بەكورتی بە یەكێتیی گوتبوو: ”ئاگەدار بە پارتی مونافیستە، دوژمنت نیە“، من زیاتر ئەو قسەیە بۆ بەڕێزان بەرپرسانی باڵای یەكێتی ورد دەكەمەوە، لەوە گەڕێ كە پارتی دوژمنتان نیە، بەڵام ئەگەر مونافیسشتان بێت تەنیا لە رۆژانی بانگەشەی هەڵبژاردندا مونافیستانە، دەنا دوای ئەوە شەریكتانە واتە هاوبەشتانە، ئێوە پێكەوە لەگەڵ پارتی حكوومەتی هەرێمی كوردستانتان پێكهێناوە، پێكەوە سەرۆكایەتیی پەرلەمان دەكەن، پێكەوە ئیدارەی هەرێمی كوردستان دەدەن، پێكەوە دەبنە دەنگ و نوێنەری كوردستانیان لە پەرلەمانی عێراق، پێكەوە دانوستان لەگەڵ حكوومەتی عێراق دەكەن، ئەگەر خوانەخواستە شەڕ و بەڵایەكی وەكوو داعشیش روو لە كوردستان بكات، پێشمەرگەكانتان پێكەوە لە یەك سەنگەردا دەبێ بەرگری لەم خاكە بكەن.

كەواتە ئێوە لەگەڵ پارتی، ئەوە هیچ دوژمنی یەك نین، بەڵام لە چوار ساڵدا تەنیا بۆ ماوەی مانگێك مونافیسن، ئیدی لەوەبەدواوە دەبنە هاوبەش، لێ نازانم بۆچی لەم شەڕە بێئەنجامە بەردەوام دەبن؟ دەتانەوێ تا چەند هەڵبژاردنی تر خەڵكی سلێمانی بەوە قەناعەت پێ بێنن كە بە دروشمی دژایەتیی پارتی دەنگ بە ئێوە بدات؟ بۆچی لەبرێ ئەو قسانە خزمەتێكی باشی شاری سلێمانی و خەڵكەكەی ناكەن؟ میدیای یەكێتی كە پێی وایە ”پارتی بە قیست گەڕاوەتەوە بۆ كەركووك!“، با پێمان بڵێن ئەی یەكێتی چۆن ماوەتەوە لە كەركووك؟ بە پارەی كاش یان بە چەكی بانك؟