له 16ـی ئۆكتۆبه‌ریش ته‌نها شه‌ش رۆژ به‌رگری به‌س بوو تا وه‌ك رۆژئاوای كوردستان كۆمه‌ڵگای نێوده‌وڵه‌تی بێنێته ده‌نگ
هێڕشی داگیركاری سوپای توركیا بۆسه‌ر رۆژئاوای كوردستان كه ئامانج لێی هه‌لته‌كاندنی ریشه‌ی كورده له رۆژئاوا و گۆڕینی دیموگرافیای ناوچه‌كه‌یه، ئه‌مڕۆ پێی نایه شه‌شه‌مین رۆژ، یه‌كێك له گه‌وره‌ترین هێزی ناتۆ،له‌سه‌ر زه‌وی و ئاسمان به هه‌موو شێوه‌یه‌ك رووبه‌ڕووی هێزه كوردیه‌كانی رۆژئاوا بوونه‌ته‌وه، به‌ڵام تا ئه‌مڕۆ نه‌یتوانیووه هیچ شوێنێك له‌و شوێنانه‌ی به ئامانجی گرتووه كۆنتڕؤل بكات، ئه‌گه‌ر به‌راوردی چه‌ك و بالانسی هێزی هه‌ردوو لایه‌ن بكه‌ین ده‌بینین نا به‌رامبه‌ریه‌كی گه‌لێك گه‌وره به‌دی ده‌كه‌ین، چ له جۆری چه‌ك و چ له ژماره‌ی هێزه شه‌ڕكه‌ره‌كان، له نێوان توركیا و میلیشاكانی سه‌ر به توركیا له لایه‌ك و هێزه‌كانی سوریای دیموكراتیك (هه‌سه‌ده). كه‌چی نه‌یتوانیووه سه‌ركه‌وتوو بێت، چونكه هێزه كوردستانیه‌كان به چه‌كی ئیراده و به‌رگری كردن له نیشتمانی خۆیان هاتوونه‌ته مه‌یدان، كه ئه‌مه‌ش هۆكاری به پێوه‌مانه‌وه‌ی هێزه كوردیه‌كانه له رۆژئاوای كوردستان.
له ناوه‌ڕاستی ئۆكتۆبه‌ری 2017 و دووساڵ به‌ر له ئێستا باشوری كوردستان رووبه‌ڕووی هه‌وێكی دیكه‌ی داگیركاری بوویه‌وه، به‌ڵام لێكه‌وته‌و كاریگه‌ریه‌كانی ئه‌و رووداوه زۆر به گه‌وره‌ی له‌سه‌ر باشوری كوردستان و خه‌لكه‌كه‌ی وه‌ستا، به جۆرێك رووداوه‌كه بووه هۆی له ده‌ستدانی زیاتر له %51ـی خاكی باشوری كوردستان و به‌رته‌سككردنه‌وه‌ی ده‌سه‌ڵاته سیاسی و ئیداریه‌كانی هه‌رێم و ته‌عریبكردنه‌وه‌ی كه‌ركووك و سنوره‌كه‌ی بۆ جارێكی دیكه.
ناخوازم به‌رگری و قاره‌مانیه‌كانی رۆژئاوای كوردستان به‌راوردی خیانه‌تێكی نیشتمانی وه‌ك 16ـی ئۆكۆتبه‌ر بكه‌م، به‌ڵام وێكچووی رووداوه‌كانی پشت هه‌ردوو داگیركاریه‌كه له به‌ری دووژمن هانمان ده‌دات كه خوێندنه‌وه‌یه‌كی واقع بینانه بۆ ردووداوه‌كه بخه‌ینه روو بۆ ئه‌وه‌ی ئه‌وانه‌ی تا ئه‌مڕۆ له ژێر كاریگه‌ری حزبی و یان ئه‌وانه‌ی ویژدان كڕاون تێبگه‌ن له دوو ئۆكۆتبه‌ر چ ئافاتێك به‌سه‌ر كوردستان هاتووه، له ئۆكۆتبه‌ر یه‌كه‌م چیمان له ده‌ستداو له ئۆكۆتبه‌ری دووه‌م چیمان به‌ده‌ست هێنا.
خیانه‌تی 16ـی ئۆكۆتبه‌ر پیلانێك و رێككه‌وتنێكی ژێر به‌ژێری نێوان گرووپی خیانه‌تكاری یه‌كێتی و میلیشاكانی حه‌شدی شه‌عبی و سوپای پاسداران بوو، ئه‌گه‌ر چی پێشمه‌رگه پلانی به‌رگری بۆ هه‌موو ناوچه‌كان هه‌بوو، به‌ڵام كه‌ركووك له ده‌ست چوو، دوای داگیركردنی كه‌ركووك خانه‌تكاران و نوسه‌ر و میدیاكاره ویژدان كڕاوه‌كانی سه‌ر به‌و گرووپه‌كه به ده‌یان وتارو لێدوانی كرچو و كاڵ هاتنه مه‌یدانی میدیای و سۆشیالمیدایی كوردی تا رووداوه‌كه وه‌ك رووداوێكی ئاسایی ببێننه زمان، یانژی پاساوی نابه‌رامبه‌ری هێز و نه‌خواستنی به عه‌فرین بوونی كه‌ركووك هۆكاری راده‌ستكردنی كه‌ركووك بوو به میلیشا چه‌كداره شیعه‌كان و سوپای پاسداران.
هیچ گومانێك له‌سه‌ر خیانه‌ته‌كه نه‌ماوه‌ته‌وه كه خیانه‌تێكی گه‌وره‌ی نیشتمانی بوو به‌ڵام ئه‌گه‌ر بابه‌ته‌كه په‌یوه‌ندی به نابه‌رامبه‌ری هێزه‌وه بێت، سوپای توركیا و سوپای عێراق ئه‌رز و ئاسمان جیاوازیان، هه‌یه، بۆچی له رۆژ ئاوا ده‌توانرێت به‌رگری بكرێت، لێره نه‌توانرا به‌رگری بكرێت، ئه‌گه‌ر مه‌به‌ست لێی به عه‌فرین نه‌كردنی كه‌ركووك بێت، سه‌یری رووداوه‌كانی كه‌ركووك و عه‌فرین بكه‌ن له ماوه‌ی دووساڵی داگیركردنی هه‌ردوو شاره‌كه بۆت ده‌رده‌كه‌وێت كه تاوانه‌كانی دژ به كورد له كه‌ركووك زیاترن له‌و تاوانانه‌ی له عه‌فرین سوپای داگیركاری توركیا دژ به كوردانی رۆژئاوا ئه‌نجامی داوه.
خۆ ئه‌گه‌ر بابه‌ته‌كه په‌یوه‌ندی به به‌رگری پێشمه‌رگه‌وه بێت هێز و چه‌كی پێشمه‌رگه كه‌متر نیه له هێز و چه‌كی هێزه‌كانی سوریایی دیموكراتیك، هێنده نه‌بێت له كه‌ركووك خیانه‌ت ته‌نانه‌ت له خودی پێشمه‌رگه‌و شكۆی پێشمه‌رگه كرا، بۆیه كۆمه‌لگای نێوده‌وله‌تی نه‌جولاند، خۆ ئه‌گه‌ر وه‌ك ئه‌مڕۆی رۆژ ئاوا ته‌نها شه‌ش رۆژ به‌رگری كرابایه ئێستا هه‌موو جیهان له‌باریه‌وه ده‌هاتنه ده‌نگ و ته‌نانه‌ت شه‌ڕی له شوێنێكدا ده‌وه‌ستان كه له دڵنیاییه‌وه بۆ پێشمه‌رگه ئه‌و شوێنه باشوری كه‌ركووك ده‌بوو.
یاد سرێشمه‌یی
